އައްޑޫ ސިޓީން ކަރަންޓު ކެނޑޭ މައްސަލައަށް ވަގުތީ ޙައްލެއް ދަނީ ހޯދަމުން: ފެނަކަ

އައްޑޫ ސިޓީގެ ޖެންސެޓްތަކަށް ދިމާވެފައިވާ މައްސަލަ ޙައްލުކުރުމުގެ މަސައްކަތުގެތެރެއިން އެއް ޖެންސެޓްގެ މައްސަލަ މިއަދު ހައްލުވާނެކަމަށް ފެނަކައިން ވިދާޅުވެއްޖެއެވެ.

އައްޑޫ ސިޓީގެ ކަރަންޓުގެ މައްސަލައަށް ދާއިމީ ހައްލެއް ނުލިބި، ރަށުން ކަރަންޓު ކެނޑުމުގެ މައްސަލަ ކުރިމަތިވާތާ އަހަރުތަކެއްވަނީ ވެފައެވެ.

މަޢުލޫމާތު ލިބޭގޮތުގައި އައްޑޫ ސިޓީގެ ގުޅިގައިވާ ރަށްތަކަށް ކަރަންޓު ފޯރުކޮށްދޭ ސެންޓްރަލް ޕަވަރ ހައުސްގައި ބޭނުންކުރާ 20 އިންޖީނުގެ ތެރެއިން 5 އިންޖީނަކަށް ވަނީ މައްސަލަ ކުރިމަތިވެފައެވެ. ފެނަކައިން ވިދާޅުވީ މިއާއި ގުޅިގެން އައްޑޫގެ ކަރަންޓުގެ ޚިދުމަތަށް ބުރޫ އަރާފައިވާކަމަށެވެ. ލޯޑު ނުހިފެހެއްޓޭތީ ވޭތުވެ ދިޔަ 3 ދުވަހު އައްޑޫގެ އެކި ރަށްތަކުން އެކި ވަގުތުތަކުގައި ދަނީ ކަރަންޓު ކަނޑަމުންނެވެ.

މި މައްސަލައާއި ގުޅިގެން، އައްޑޫ ސިޓީއަށް ކަރަންޓުގެ ޚިދުމަތްދޭ ފެނަކަ ކޯޕަރޭޝަނުން ވިދާޅުވީ އެސިޓީގެ ކަރަންޓުގެ ޚިދުމަތަށް ބުރޫ އަރާފައިވާކަމަށާއި އެ މައްސަލަ ޙައްލުކުރުމަށް ފިޔަވަޅުތައް އަޅަމުންދާކަމަށެވެ. އެގޮތުން 1 ޖެންސެޓްގެ މައްސަލަ މިއަދުގެ ވަގުތެއްގައި ޙައްލުކުރާނެކަމަށެވެ. މައްސަލަ ފުރިހަމައަށް ޙައްލުކުރެވެންދެން ކަރަންޓު ލޯޑު ހިފެހެއްޓުމަށްޓަކާ، ގުޅިފައިވާ ރަށްތަކުގެ އެކި ސަރަޙައްދުތަކުން، ވަކި ތާވަލަކާ އެއްގޮތަށް ކަރަންޓު ކެނޑުމަށް ހަމަޖެހިފައިވާކަމަށެވެ. މިމައްސަލަ ވީހާވެސް އަވަހަށް ހައްލުކޮށް ކަރަންޓުގެ ޚިދުމަތް އާންމު ހާލަތަށް ގެނައުމަށް ފެނަކައިން މެދު ނުކެނޑި މަސައްކަތް ކުރަމުންދާކަމުގެ ޔަގީންކަން ފެނަކައިން ވަނީ ދެއްވާފައެވެ.

އައްޑޫ ސިޓީގެ ކަރަންޓުގެ މައްސަލައަށް ހައްލެއް ނުލިބި އެތައް އަހަރެއް ވަނީ ވެފައެވެ. މީގެ ސަބަބެއްގެ ގޮތުގައި ފެނަކައިން ފާހަގަކުރަނީ އިންޖީނުތައް ރަނގަޅަށް އޯވަހޯލްކޮށް، ބޭނުންވާ މަރާމާތުތައް ކޮށްފައި ނެތުމެވެ. އައްޑޫ ސިޓީގައި މިވަގުތު 26.8 މެގަވޮޓްގެ ކަރަންޓު ކެޕެސިޓީ ޤާއިމުކޮށްފައިވީނަމަވެސް އޭގެތެރެއިން ބޭނުންކުރެވޭ ހާލަތުގައި ހުރީ 15.5 މެގަވޮޓްގެ ކެޕޭސިޓީއެވެ.

އައްޑޫ ސިޓީގެ ކަރަންޓުގެ މައްސަލައަށް ދާއިމީ ހައްލެއް ގެނައުމަށް އެ ސިޓީގައި 32 މެގަވޮޓްގެ ޕަވަރ ހައުސްއެއް އެޅުމުގެ މަސައްކަތް ވަނީ ފަށާފައެވެ. އެ މަސައްކަތްވެސް ހުއްޓި ދިގުމުއްދަތެއް އޮތުމަށްފަހު، އެ މަސައްކަތް އަވަސްކުރުމަށް އަޅަންޖެހޭ ފިޔަވަޅުތައް މިސަރުކާރުން ގެންދަވަނީ އަޅުއްވަމުންނެވެ.