ދިވެހި ޔޫތު ލީގުގެ 16 އަހަރުން ދަށުގެ މުބާރާތުގައި ކުލަބު ވެލެންސިއާއިން ތާވަލުގެ އެއްވަނައިގައި ލީޑު ނަގައިފިއެވެ. މުބާރާތުގައި އިއްޔެ ހަވީރު ސުޕަ ޔުނައިޓެޑް ސްޕޯޓްސް (ސަސް) އާ ދެކޮޅަށް ކުޅުނު މެޗު ވެލެންސިއާއިން ކާމިޔާބުކޮށްފައިވަނީ 3-2 ގެ ނަތީޖާއަކުންނެވެ.
އިއްޔެގެ ނަތީޖާއަށްފަހު ވެލެންސިއާއިން ކުރީގައި އޮތީ ތިން ޕޮއިންޓުގެ ލީޑަކާ އެކު އެވެ. ވެލެންސިއާއަށް ހަތަރު މެޗުން 12 ޕޮއިންޓް ލިބިފައިވާއިރު، ސަސް އިން ދެ ވަނައިގައި އޮތީ ހަތަރު މެޗުން ނުވަ ޕޮއިންޓް ހޯދައިގެންނެވެ. ތިން ވަނައިގައި އޮތް ޓީސީ ސްޕޯޓްސް ކްލަބާއި ހަތަރެއްގައި އޮތް މާޒިޔާ ސްޕޯޓްސް އެންޑް ރެކްރިއޭޝަނަށް ވަނީ ތިން މެޗުން ހަ ޕޮއިންޓް ލިބިފަ އެވެ.
ހެންވޭރު ދަނޑުގައި ކުޅުނު މެޗުގައި، ސަސްގެ ގޯލުތައް ޖަހައިދިނީ، އަނާން އިބްރާހިމް، އަބްދުﷲ އައިދާން ސާޖިދު އެވެ. އަދި ވެލެންސިއާ އިން ލަނޑުތައް ޖެހީ ކެޕްޓަން، އީތަން އިބްރާހިމް ޒަކީ، އާއިދު މުހައްމަދު ޖަވީޒު ދެ ގޯލެވެ.
ވިކްޓަރީ އާއި ހުރާ ކުޅުނު މެޗު ރޭ ވަނީ 1-1 އިން އެއްވަރުވެފަ އެވެ. ފަސް ވަނައިގައި އޮތް ވިކްޓަރީއަށް ހަތަރު މެޗުން ހަތަރު ޕޮއިންޓް ލިބިފައިވާއިރު، ހަ ވަނައިގައި އޮތް ހުރާއަށް ހަތަރު މެޗުން ލިބިފައިވަނީ ދެ ޕޮއިންޓެވެ. އަދި ހަތް ވަނައިގައި އޮތް އީގަލްސްއަށް ތިން މެޗުން ޕޮއިންޓެއް ލިބިފައިވާއިރު، ފުލުގައި އޮތް ޔުނައިޓެޑް ވިކްޓަރީއަށް އަދި ޕޮއިންޓެއް ނުލިބެއެވެ. ރޭ ވިކްޓަރީގެ ގޯލު ޖެހީ ބާސިލް އަހުމަދު އެވެ. އަދި ހުރާ އިން ލަނޑު ކާމިޔާބުކުރީ، މުހައްމަދު ސަމްއާން ސައްމޫންއެވެ.
ދިވެހި ޔޫތު ލީގުގެ ކުޅުން މި މަހުގެ 28 ގެ ނިޔަލަށް ކުރިޔަށްދާނެއެވެ.