ނިމިދިޔަ ހޫނު މޫސުމުގައި ކުޅުންތެރިން ނުހޯދުމަށް ކްލަބުގެ ވެރިން ކައިރި ބުނުމަކީ ހެދުނު ގޯހެއް ކަމަށް މެންޗެސްޓަރ ސިޓީގެ ކޯޗު ޕެޕް ގަޑިއޯލާ ބުނެފި އެވެ.
ޕްރިމިއާ ލީގުގައި ބްރެންޓްފޯޑް އާއި ދެކޮޅަށް މިއަދު ކުޅޭ މެޗުގެ ކުރިން ނޫސްވެރިންނާ ވާހަކަ ދައްކަމުން ގަޑިއޯލާ ބުނެފައިވަނީ މިދިޔަ ހޫނު މޫސުމުގައި ކުޅުންތެރިން ހޯދުމަށް ކްލަބުން މަސައްކަތް ކުރި ކަމަށާއި ނަމަވެސް އޭނާ އިތުރު ކުޅުންތެރިން ބޭނުންނުވާ ކަމަށް ކްލަބުގައި ބުނި ކަމަށެވެ.
"މިދިޔަ ހޫނު މޫސުމުގައި ކުޅުންތެރިން ހޯދުމަށް ކްލަބުން މަސައްކަތްކުރި. ނަމަވެސް އިތުރު ކުޅުންތެރިން ބޭނުންނުވާ ކަމަށް އަހަރެން ކްލަބުގެ ވެރިންކައިރި ބުނުމުން އެ މަސައްކަތް ހުއްޓާލީ. އެއީ އަހަރެންނަށް ހެދުނު ގޯހެއް." ގަޑިއޯލާ ބުނެފައިވެ އެވެ.
"މިހާރު އޮތް ސްކޮޑަށް އަހަރެންގެ ފުރިހަމަ އިތުބާރާއި ޔަގީންކަން އޮތް. އަދި އަހަރެން އުންމީދު ކުރީ މި ކުޅުންތެރިންނާއިއެކު ކުރިން ހޯދި ކާމިޔާބީ ދެމެހެއްޓޭނެ ކަމަށް. ނަމަވެސް އަނިޔާގެ މައްސަލަތައް ކުރިމަތިވެ ހުރިހާކަމެއް މިވަނީ ބަދަލުވެފަ" ގަޑިއޯލާ އިތުރަށް ބުންޏެވެ.
ޕްރިމިއާ ލީގުގެ ހަވަނައިގައި މިވަގުތު ސިޓީ އޮތްއިރު ގަޑިއޯލާގެ ކޯޗިން ހަޔާތުގައި ޖެހިޖެހިގެން ގިނަ މެޗުތަކަކުން މީގެ ކުރިން ބަލިވެފައެއް ނުވެއެވެ. އަދި ޖުމްލަ 36 ޓީމު ވާދަކުރާ ޗެމްޕިއަންސް ލީގުގެ 22 ވަނައިގައި މިވަގުތު ސިޓީ އޮތްއިރު މުބާރާތުގެ ދެވަނަ ބުރަށް ކޮލިފައިވުމަކީވެސް އެ ޓީމަށް ދަތި ކަމަކަށް މިހާރުވަނީ ވެފަ އެވެ.
އަނިޔާގެ މައްސަލަ ސިޓީ އަށް ކުރިމަތިވެފައިވާއިރު އެ ޓީމުން ވަނީ ދާދި ފަހުން ފްރާންސްގެ ލެންސް އަށް ކުޅޭ އުޒްބެކިސްތާނުގެ އަބްދުކާދީ ކުސަނޯވް ހޯދުމަށް 33.6 މިލިއަން ޕައުންޑުގެ ފީއަކަށް އެއްބަސްވެފަ އެވެ. އަދި ވަރަށް އަވަހަށް އޭނާ ސިޓީ އާއި ގުޅޭނެކަމަށް މީޑިޔާ ރިޕޯޓްތައް ވަނީ ބުނެފަ އެވެ.