އާއްމު ފަރާތްތަކަށް ވެލިބަސްތާ ދޫކުރުން، ކުރިން ހައުސިންގ މިނިސްޓްރީ ހުރި ބިމުގައި ކުރިއަށްދަނީ

ވިއްސާރައިގައި ފެންބޮޑުވެ ގެއްލުންވެދާނެކަމަށް ލަފާކުރެވޭ ތަންތާންގައި ވެލިބަސްތާ ޖެހުމަށް ބޭނުންވާ އާއްމު ފަރާތްތަކަށް ވެލިބަސްތާ ދޫކުރުމުގެ އިންތިޒާމް ހަމަޖައްސައިފިއެވެ.

ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ އެންޑީއެމްއޭއިން ވިދާޅުވީ ވެލިބަސްތާ ދޫކުރުމުގެ އިންތިޒާމް ހަމަޖައްސާފައިވަނީ ކުރިން ހައުސިންގ މިނިސްޓްރީ ހިންގި ބިމުގައިކަމަށެވެ. އެހެންކަމުން ވެލިބަސްތާ ބޭނުންވާ އާއްމު ފަރާތްތަކަށް، މިރޭ 10 ޖެހުމާ ހަމައަށް އެ ސަރަޙައްދުން ވެލިބަސްތާ ދޫކުރުމުގެ މަސައްކަތް ކުރިއަށްދާކަމަށް އެންޑީއެމްއޭއިން ވިދާޅުވިއެވެ.

ފެންވަދެ ގެއްލުންވާ ތަންތަނުގައި ވެލި ބަސްތާ ޖެހުމަށް ވެލިބަސްތާ ބޭނުންވާ އާންމު ފަރާތްތަކަށް، ވެލި
ބަސްތާ ދޫކުރުމުގެ އިންތިޒާމް ⁦@MoCLPmv⁩
ގެ އެހީތެރިކަމާއިއެކު، މިރޭގެ 10:00 އާއި ހަމައަށް ކުރީގެ ހައުސިން މިނިސްޓްރީ ހުރި ބިމުގައި ވަނީ ހަމަޖެހިފައި pic.twitter.com/tNoTORqKIc

— NDMA Maldives (@NDMAmv) January 13, 2025

ބޯކޮށް ވާރޭ ވެހޭ ހާލަތްތަކުގައި މާލޭގެ އެކި ހިސާބުގައި ފެންބޮޑުވެ ބޮޑެތި ގެއްލުންތައް ލިބެއެވެ. އެހެންކަމުން މިހާރު މެޓް އޮފީހުން ނެރެފައިދާ މޫސުމީ އިންޒާރުތަކާއެކު، ދުރާލާ ފިޔަވަޅު އެޅުމުގެ މަސައްކަތްތައް ގުޅުންހުރި އިދާރާތަކުން ވަނީ ފަށާފައެވެ.

އެގޮތުން ފެން ވަނުން ކުޑަކުރުމަށް ވެލިބަސްތާ ފޯރުކޮށްދިނުމުގެ އިތުރުން މާލޭގެ އެކި ސަރަހައްދުތަކުގައި ފެން ހިންދަން ޕަމްޕް ވަނީ ބަހައްޓާފައެވެ. އަދި މީގެއިތުރުން ވިއްސާރައިގެ ޙާލަތުގައި އެހީތެރިކަން ފޯރުކޮށްދިނުމަށް، ކަމާ ގުޅުންހުރި އިދަރާތައް ހިމެނޭހެން ޚާއްސަ ޓާސްކް ފޯހެއް އެކުލަވާލައިގެން މިހާރުވަނީ މަސައްކަތްތައް ފަށާފައެވެ.

މިހާރު ކުރަމުންދާ ވިއްސާރައިގެ އަސަރު ހަފްތާ ނިމެންދެން ރާއްޖޭގެ އެކި ސަރަހައްދުތަކަށް ކުރާނެކަމަށް މޫސުމާ ބެހޭ ޤައުމީ އިދާރާއިން ލަފާކުރެއެވެ. އެހެންކަމުން ކަމާގުޅޭ އިދާރާތަކުން ފޯރުކޮށްދޭ އެހީތެރިކަމުގެ އިތުރުން، ފަރުދީގޮތުންވެސް ސަމާލުވެ ރައްކާތެރިކަމުގެ ފިޔަވަޅު އެޅުމަށް އިދާރާތަކުން ދަނީ އިލްތިމާސްކުރަމުންނެވެ.

ކަނޑުތައް ގަދަވުމާއި ދިޔަވަރު ބޮޑުވާ ވަގުތުތަކުގައި އުދައަރަނެކަމަށް ލަފާކޮށްފައިވާތީ އެކަމަށްވެސް ސަމާލުކަންދިނުމަށް ވަނީ އިލްތިމާސްކޮށްފައެވެ.