ދުރާލާ 50 އަށްވުރެ ގިނަ ގޭބިސީތަކުގައި ވެލި ބަސްތާ ޖަހައިފި

މި ދުވަސްވަރު ރާއްޖޭގެ އެކި ހިސާބުތަކަށް ކުރަމުންދާ ވިއްސާރައާ ގުޅިގެން މާލޭގެ 50 އަށްވުރެ ގިނަ ގޭބިސީތަކުގައި ވެލި ބަސްތާ ޖަހައިފިއެވެ.

މިއަދުން ފެށިގެން ރާއްޖެއަށް ވިއްސާރަކުރާނެ ކަމަށް މެޓު އޮފީހުން ވިދާޅުވެފައިވުމުން ކަމާ ބެހޭ އިދާރާތަކާއި އާއްމުން ގުޅިގެން ދަނީ ރައްކާތެރިވުމަށްޓަކައި ދުރާލާ ފިޔަވަޅުތައް އަޅަމުންނެއެވެ. އެގޮތުން އާއްމުކޮށް ފެނުގެ އަސަރުކުރާ ގޭބީސީތަކުގައި ވެލި ބަސްތާ ޖެހުމުގެ މަސައްކަތް މިހާރު ދަނީ ކުރަމުންނެވެ.

ވެލި ބަސްތާ ޖެހުމުގެ މަސައްކަތްކޮށްފައިވަނީ މާލެ ސިޓީ ކައުންސިލުންނެވެ. ނެޝަނަލް ޝިޒާސްޓަރ މެނޭޖެމެންޓް އޮތޯރިޓީ، އެންޑީއެމްއޭއިން ވިދާޅުވީ ބޯކޮށް ވާރޭވެހި، މާލޭގައި ފެން ބޮޑުވެއްޖެނަމަ އޭގެ އަސަރުކުރާނެ ކަމަށް ލަފާކުރެވޭ 56 ގޭބިސީއެއްގައި ވެލި ބަސްތާ ޖަހާފައިވާ ކަމަށެވެ.

މިކަމާ ގުޅިގެން މާލެ ސިޓީ ކައުންސިލުން ވިދާޅުވީ ވެލި ބަސްތާ ޖެހުމުގެ މަސައްކަތް ކުރިއަށް ގެންގޮސްފައިވަނީ އިއްޔެ ކަމަށާއި ފެން ވަންނާނެކަމަށް ލަފާކުރެވޭ ގޭބިސީތަކުގައި މިއަދުވެސް ވެލި ބަސްތާ ޖެހުމުގެ މަސައްކަތްކުރަމުން ގެންދާނެ ކަމަށެވެ.

ވެލި ބަސްތާ ޖެހުމުގެ މަސައްކަތް ސިޓީ ކައުންސިލުން ކުރަމުންދާއިރު، ދިވެހިރާއްޖޭގެ ޤައުމީ ދިފާޢީ ބާރުންވެސް ދަނީ ފެން ހިންދުމަށްޓަކައި ދުރާލާ ތައްޔާރުވަމުންނެވެ. އަދި ބައެއް ތަންތަނުގައި ފެން ހިންދުމުގެ މަސައްކަތް މިހާރު ވަނީ ފަށާފައެވެ. އެގޮތުން ވެސްޓްޕާކް ސަރަހައްދުގައިހުރި ޕަންޕު ބޭނުންކޮށްގެން ފެން ހިންދުމުގެ މަސައްކަތް ދިފާޢީ ބާރުން ދަނީ މިހާރު ކުރަމުންނެވެ.

ބޯކޮށް ވާރޭ ވެހި މާލޭގެ ބައެއް މަގުތަކުގައި ފެންބޮޑުވުމާ ގުޅިގެން، ފެން ހިންދުމުގައި އެމްއޭންޑީއެފް ފަޔަރ އެންޑް ރެސްކިޔު ސަރވިސްގެ ސިފައިން ދަނީ ހަރަކާތްތެރިވަމުން. އެގޮތުން ވެސްޓްޕާކް ސަރަޙައްދުގައި ޕަންޕު ބޭނުންކޮށްގެން ފެން ހިންދުމުގެ މަސައްކަތް ދަނީ ކުރަމުން.

— Maldives National Defence Force (@MNDF_Official) January 13, 2025

މޫސުމާބެހޭ ޤައުމީ އިދާރާއިން ވިދާޅުވީ، ރާއްޖޭގެ އިރުން ހުޅަނގު ދެކުނުން، ބޭ އޮފް ބެންގާލްގައި އުފެދިފައިވާ ކޮޅިގަނޑު މިހާރު ރާއްޖޭގެ ހުޅަނގަށް ޖެހި ރާއްޖެއާއި ގާތަށް ޖެހެމުންދާކަމަށެވެ. މިވަގުތު ރާއްޖެ ސަރަޙައްދުގައި ބޯވިލާ ޖަމާވަމުންދާކަމަށާއި މިއަދުގެ ވަގުތުތަކުގައި ރާއްޖެއަށް ކެރީގެ އަސަރު ކުރާނެ ކަމަށައި ދަންވަރާއި އަދި ފަތިހު ބޯކޮށް ވާރޭ ވެހޭނެކަމަށް އެ އިދާރާއިން ލަފާކުރައްވައެވެ. ބައެއް ރަށްރަށަށް އުދަ އަރައި ބޯކޮށް ވާރޭ ވެހުމުގެ ސަބަބުން ފެން ބޮޑުވެދާނެކަމަށް މޫސުމާބެހޭ ޤައުމީ އިދާރާއިން ލަފާކުރައްވައެވެ.