ފޯމު ކަޓާފައި ހުރި މެންޗެސްޓާ ޔުނައިޓެޑުގެ ފޯވާޑް މާކަސް ރަޝްފޯޑް، ސްޕެއިންނުގެ ބާސެލޯނާއަށް ގެންދިޔުމުގެ މަސައްކަތް އެ ކުލަބުން ފަށައިފިއެވެ.
ރަޝްފޯޑް ހޯދަން އިޓަލީގެ ޔުވެންޓަސް އާއި އޭސީ މިލާނުންވެސް ދަނީ މަސައްކަތް ކުރަމުންނެވެ. އެ ދެ ކުލަބުން އޭނާ ދާއިމީކޮށް ގަންނަން ބޭނުންވާތީވެ، ފުރުސަތު ބޮޑުކަމަށް ގިނަ ބަޔަކު ބުނަނީ ބާސެލޯނާ އަށެވެ. ސަބަބަކީ ބާސެލޯނާއިން އޭނާ ގެންދަން ބޭނުންވަނީ ކުޅުން ރަނގަޅުވެއްޖެނަމަ ފަހުން ދާއިމީކުރާ ގޮތަށް، މިވަގުތު ލޯނު އެއްބަސްވުމެއްގެ ދަށުންނެވެ.
ބާސެލޯނާގެ ރައީސް ޖޮއާން ލަޕޯޓާ އެންމެ ބޮޑަށް މިހާރު ބޭނުންވެފައިވަނީ ޖެނުއަރީ ޓްރާންސްފާ ބާޒާރު ބަންދުވުމުގެ ކުރިން ފޯވާޑެއް ގެންދިއުމަށެވެ. އެއީ އެއްވަނަ ފޯވަޑް ޕޮލެންޑްގެ ރޮބަޓް ލެވޮންޑޯސްކީއަށް ދޭތެރެ ދޭތެރެއިން ފޯމު ކެޓުމުގެ މައްސަލަ ދިމާވާތީއެވެ.
އުމުރުން 27 އަހަރުގެ ރަޝްފޯޑުވެސް މި ވަގުތު ބޭނުންވަނީ ޔުނައިޓެޑުން ދޫކޮށް ދިޔުމަށެވެ. އެއީ މިހާރުގެ ކޯޗު ރުބެން އަމޮރިމްގެ ޓީމުގައި އޭނާއަށް ޖާގަ ނެތްކަން ކަށަވަރުވާތީއެވެ.
މެންޗެސްޓާގެ ޔޫތު ޓީމުން ތައާރަފުވެ، 2015 ވަނަ އަހަރުން ފެށިގެން އެ ކުލަބުގެ ސީނިއާ ޓީމަށް ކުޅެމުން އަންނަ ރަޝްފޯޑަށް މި ފަހުން އައިސް ގިނައިން ފުރުސަތު ލިބެނީ ބެންޗުންނެވެ. އަދި ފަތިރަކުރުންތަކަށް ފަރުވާތެރިނުވުމާއި، ފިޓްނަސް މައްސަލަ ޖެހުމުން މީގެ މަހެއްހާ ދުވަސް ކުރިން ޓީމުގެ ސްކޮޑުން އޭނާއަށް ޖާގަ ދިނުން ވަނީ ހުއްޓާލާފައެވެ.
ރަޝްފޯޑް ގެންދަން ބާސެލޯނާއިން މަސައްކަތް ފެށީ އޭނާ އަކީ މިވަގުތު ޓްރާންސްފާ ބާޒާރުގައި ތިބި ކުޅުންތެރިންނަށް ބަލާއިރު އެންމެ ފަސޭހައިން ލިބިދާނެ ފޯވާޑަށް ވާތީއެވެ. އަދި އޭނާގެ އަޖުމަ ބަލާލުމަށްފަހު އަންނަ ސީޒަނުގައި ބެހެއްޓުމާމެދު ގޮތެއް ނިންމަންވެސް ވަގުތު ލިބޭނެތީއެވެ.
ރަޝްފޯޑް ވަނީ ޔުނައިޓެޑަށް ކުޅެދިން 287 މެޗުން 87 ލަނޑު ޖަހައިދީފައެވެ. އަދި އިނގިރޭސި ގައުމީ ޓީމަށް ވަނީ 66 މެޗު ކުޅެދީ، 17 ލަނޑު ޖަހައިދީފައެވެ.