ކޮރަޕްޝަން ހުއްޓުވަން ފާއިތުވި ސަރުކާރުތައް ފެއިލްވީ ފިޔަވަޅުއަޅަން ފަސްޖެހުމުން، މިއަދު މިވަނީ އެކަން ބަދަލުވެފައި: މަޖިލިސް ރައީސް

ކޮރަޕްޝަންގެ ޢަމަލެއް ހިންގައިފިނަމަ، ވަކި މީހަކަށް ނުބަލައި ހިންގި އަމަލަކަށް ފިޔަވަޅު އަޅާނެކަންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ސާބިތުކޮށްދެއްވަމުން ގެންދަވާކަމަށް ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވެއްޖެއެވެ.

ދިވެހިރާއްޖޭގެ އަޑުގެ ޕްރޮގުރާމަކަށް ދެއްވި އިންޓަވިއުއެއްގައި ސަރުކާރު ހިންގާ ޕީޕަލްސް ނެޝަނަލް ކޮންގްރެސް، ޕީއެންސީގެ ޗެއަރޕާސަން އަދި މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވީ ކޮރަޕްޝަންގެ ނޭދެވޭ ޢަމަލުތައް މަދު ކުރެވޭނީ ކިތަންމެ އިސް މަޤާމެއްގައި ނުވަތަ ކިތަންމެ އަރިސް މީހަކު އެފަދަ މަޤާމެއްގައި ހުރެގެން ކޮރަޕްޝަންގެ ޢަމަލެއް ހިންގިނަމަވެސް އެމީހަކަށްވެސް ޖެހިލުމެއްނެތި ފިޔަވަޅު އަޅައިގެން ކަމަށެވެ. އަދި ރާއްޖޭގައި މީގެ ކުރިން ވެރިކަންކުރި ސަރުކާރުތަކުގައި ކޮރަޕްޝަންގެ ޢަމަލުތައް މަދު ކުރެވިފައިނުވަނީ ސަރުކާރުގެ އިސް މަޤާމުތަކުގަޔާއި ރައީސުލްޖުމްހޫރިއްޔާއާ އަރިސް ބޭބޭފުޅުން ހިންގާ ކޮރަޕްޝަންގެ ޢަމަލުތައް ނުބަލައި އެ މީހުންނަށް ފިޔަވަޅު ނޭޅުމުގެ ސަބަބުންކަމަށް ޢަބްދުއްރަޙީމް ވިދާޅުވިއެވެ.

ޢަބްދުއްރަޙީމް ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދިވެހި ޒަޢާމަތާ ހަވާލުވެ، ކޮރަޕްޝަންގެ ޢަމަލުތައް މަދުކުރުމަށްޓަކައި އަޅުއްވަމުން ގެންދަވާ ފިޔަވަޅުތަކުގެ ސަބަބުން މިހާރު މިވަނީ މަންޒަރު ބަދަލުވެފައިކަމަށެވެ. އެގޮތުން މިއަދު ފެންނަނީ ކޮންމެ މީހަކު ކޮރަޕްޝަންގެ ޢަމަލެއް ހިންގިނަމަވެސް އެމީހަކަށް ފިޔަވަޅު އަޅުއްވާ މަންޒަރުކަން ޢަބްދުއްރަޙީމް ފާހަގަކުރެއްވިއެވެ.

"މިއަދު ރައީސް މުޢިއްޒު އައްޔަންކުރެއްވި ބައެއް މެނޭޖިން ޑިރެކްޓަރުން ވަކިކުރި މަންޒަރު ފެނިވަޑައިގަންނަވާނެ. ޤާނޫނުތައް އެދަނީ ތަންފީޒްކުރަމުން. ރައީސް މަޤާމުތަކަށް އައްޔަންކުރެއްވި ބޭފުޅުންގެ މައްސަލަތައް ދަނީ ބަލަމުން. ފުލުހުން އެދަނީ އެ މައްސަލަތައް ތަޙުޤީޤުކުރަމުން. މިއީ ކުރީގެ ސަރުކާރުތަކާ މި ސަރުކާރާ ހުރި ތަފާތަކީ." ޢަބްދުއްރަޙީމް ވިދާޅުވިއެވެ.

ކުރީގެ ސަރުކާރުތަކުގެ އިސްވެރިންގެ މައްޗަށް ކޮރަޕްޝަންގެ ބޮޑެތި ތުހުމަތުތަކެއް ކުރެވިފައިވެއެވެ. ނަމަވެސް މި ތުހުމަތުތަކާ ގުޅިގެން އެފަރާތަކުގެ މައްސަލަތައް ބަލައި މާބޮޑު ފިޔަވަޅުތަކެއް އަޅާފައިނުވެއެވެ.

ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވެރިކަމާ ހަވާލުވެވަޑައިގަންނަވާ އެންމެ ފުރަތަމައަށް ދެއްވި ތަޤުރީރުގައިވެސް ކޮރަޕްޝަނަށް ހަރުއަޑުން ނޫނެކޭ ބުނާނެކަން ފާހަގަކުރެއްވިއެވެ. އަދި އެމަނިކުފާނުގެ ސަރުކާރުގައި އެކަމަށް ފިޔަވަޅުއަޅުއްވާތަން ފެނިގެންދާނެ ކަމުގެ ޔަޤީންކަން ދެއްވިއެވެ. އެ ޔަޤީންކަމުގައި ޢަމަލީ ސިފަ ޖެހޭތަން މިއަދު ވަނީ ފެންނަން ފަށާފައެވެ. އެގޮތުން ކޮރަޕްޝަނަށް ތުހުމަތުކުރެވޭ މައްސަލައެއްގައި ސަރުކާރުގެ އިސް މަޤާމުތަކުގައި ތިއްބެވި ބައެއް ބޭފުޅުންނަށް ވަނީ ފިޔަވަޅުއަޅުއްވާފައެވެ.

މީގެ އެއް މިސާލަކީ ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް ގޯތި ދިން މައްސަލަ ފެންމަތިވުމުން ސަރުކާރުން ޢަމަލުކުރި ގޮތެވެ. މި މައްސަލާގައި ތުހުމަތުކުރެވުނު ހައުސިންގ ޑިވެލޮޕްމެންޓް ކޯޕަރޭޝަން، އެޗްޑީސީގެ އިސް މަޤާމުތަކުގައި ތިބި ބައެއް ވެރިންގެ މައްޗަށް މިހާރު ފުލުހުން ދަނީ ތަޙުޤީޤެއް ހިންގަމުންނެވެ. އަދި މި މައްސާލަގައި އެޗްޑީސީގެ ކުރީގެ މެނޭޖިންގ ޑިރެކްޓަރ އިބްރާހިމް ފަޒުލް ރަޝީދު ހިމެނޭހެން ބައެއް އިސްވެރިން މަޤާމުގެ މަސްއޫލިއްޔަތުތަކުން އެކަހެރިވެސްކުރިއެވެ. އަދި ފަހުން ފަޒުލް ވަނީ އިސްތިއުފާދެއްވާފައެވެ.