މެންޗެސްޓާ ޔުނައިޓެޑުގެ ޑިފެންޑަރު ހެރީ މެގުއާ ސަސްޕެންޑްކޮށް، ޖޫރިމަނާކޮށްފިއެވެ. އިނގިރޭސި ގައުމީ ޓީމަށް ވެސް ކުޅެމުން އަންނަ ޑިފެންޑަރަށް މި އަދަބު ދިނީ މާ ބާރަށް ކާރު ދުއްވުމުގެ ސަބަބުންނެވެ.
ބޯލްޓަން މެޖިސްޓްރޭޓް ކޯޓުން ބުނީ މިދިޔަ އަހަރުގެ މާޗު މަހުގެ 5 ވަނަ ދުވަހު މެންޗެސްޓާގެ އެއާޕޯޓުގެ ރަންވޭ ދަށުގައި އޮންނަ ވިލްމްސްލޯ މަގުގެ ޓަނަލުން މެގުއާ އޭނާގެ ރޭންޖް ރޮވާ ކާރުގައި ނުކުތީ 85 މޭލުގެ ބާރުމިނުގައި ކަމަށެވެ. މި މަންޒަރު ޓީވީ ފުޓޭޖްތަކުން ފެންނަން އެބަހުރި ކަމަށެވެ.
މިކަމުގެ އަދަބެއްގެ ގޮތުން އޭނާ ސަސްޕެންޑް ކުރީ 56 ދުވަހަށެވެ. ޖޫރިމަނާ ކުރީ 666 ޕައުންޑާއި އޭނާގެ މައްސަލަ ބަލަން ހޭދަވި ހަރަދު ކަމަށްވާ 120 ޕައުންޑާއި ސާޗާޖްގެ ގޮތުގައި ކަނޑައަޅާފައިވާ 266 ޕައުންޑް ކަމަށެވެ.
އުމުރުން 31 އަހަރުގެ މެގުއާ މި މައްސަލާގައި ކޯޓަށް ހާޒިރުވެފައެއް ނުވެއެވެ. އޭނާގެ ބަދަލުގައި ހާޒިރުވީ އޭނާގެ ގާނޫނީ ވަކީލުންނެވެ.
މެގުއާ އަކީ ހަފުތާއަކު 189000 ޕައުންޑްގެ މުސާރަވެރިއެކެވެ. އޭނާއަށް އަހަރަކު ގާތްގަނޑަކަށް 10 މިލިއަން ޕައުންޑް ލިބެއެވެ.