ރައީސުލްޖުމްހޫރިއްޔާ ގދ. ރަތަފަންދޫއަށް ވަޑައިގެންފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުވަދުއަތޮޅަށް ކުރައްވަމުން ގެންދަވާ ދަތުރުފުޅުގައި ގދ. ރަތަފަންދޫއަށް ވަޑައިގެންފިއެވެ.

ރައީސުލްޖުމްހޫރިއްޔާ ރަތަފަންދޫއަށް ވަޑައިގަތުމުން މަރުހަބާ ދެންނެވުމަށްޓަކައި ރަށުގެ ގިނަބަޔަކުވަނީ ބަނދަރު ސަރަހައްދަށް އެއްވެފައެވެ.

ރައީސްގެ މި ދަތުރުފުޅުގައި ހުވަދު އަތޮޅުގެ 9 ރަށަކަށް ވަޑައިގަންނަވާނެއެވެ. އެގޮތުން ރަތަފަންދޫއަކީ ހުވަދުއަތޮޅަށް ރައީސުލްޖުމްހޫރިއްޔާ ކުރައްވާ ދަތުރުފުޅުގައި ވަޑައިގަންނަވާ 5 ވަނަ ރަށެވެ. މި ދަތުރުފުޅުގައި އިއްޔެ އެމަނިކުފާނު ވަނީ އެ އަތޮޅު ހޯނޑެއްދޫއަށާއި ނަޑެއްލާއަށާއި ވާދޫ އަދި ފިޔޯރީއަށް ވަޑައިގެންފައެވެ.

ގދ. ރަތަފަންދޫއަށް ވަޑައިގެން އެރަށު ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިތުރުން ރަށުގެ ރައްޔިތުންނާ ބައްދަލުކުރެއްވުމަށް ހަމަޖެހިފައިވެއެވެ. ހުވަދުއަތޮޅުން ދެކުނުބުރިއަށްފަހު ދެން އެމަނިކުފާނު ވަޑައިގަންނަވާނީ ހުވަދުއަތޮޅު އުތުރުބުރިން ކަނޑުހުޅުދޫ، ނިލަންދޫ، މާމެންދޫ އަދި ދެއްވަދޫއަށެވެ.