ސްޕެނިޝް ލީގުގައި މިދިޔަ ހަފުތާގައި ވެލެންސިއާއާ ދެކޮޅަށް ކުޅުނު މެޗުގައި ރަތް ކާޑު ދެއްކި ރެއާލް މެޑްރިޑުގެ ފޯވާޑް ވިނީޝިއުސް ޖޫނިއަރ ދެ މެޗަށް ސަސްޕެންޑް ކޮށްފައިވާ ކަމަށް އެ ގައުމުގެ ފުޓްބޯޅަ ފެޑެރޭޝަނުން ބުނެފިއެވެ.
ވެލެންސިއާ އަތުން 2-1 ގެ ނަތީޖާއަކުން ރެއާލް މެޑްރިޑް މޮޅުވި މެޗުގެ 79 ވަނަ މިނިޓުގައި ވިނީޝިއުސް ޖޫނިއަރ އަށް ރެފްރީ ރަތް ކާޑު ދައްކާފައިވަނީ އޭނާ ކުޅުމުން ބޭރުގައި ވެލެންސިއާގެ ކީޕަރަށް ހަމަލާ ދިނުމާއި ގުޅިގެންނެވެ.
ވިނީޝިއުސް އަށް ދެއްކި ރަތްކާޑުގެ މައްސަލަ ރެއާލް މެޑްރިޑް އިން ސްޕެއިންގެ ފުޓްބޯޅަ ފެޑަރޭޝަނުގައި އެޕީލް ކުރި ނަމަވެސް އެ ކަމަށް އެއްވެސް ބަދަލެއް އައިސްފައެއް ނުވެއެވެ. ނަމަވެސް އަންނަ ބުރާސްފަތި ދުވަހު ސުޕަރ ކަޕްގައި މަޔޯކާ އާއި ދެކޮޅަށް ރެއާލް މެޑްރިޑް ކުޅޭ މެޗުގައި އޭނާއަށް ކުޅެވޭނެ އެވެ.
ސްޕެނީޗް ލީގުގެ އެއްވަނައިގައި މިވަގުތު އޮތް ރެއާލް މެޑްރިޑް އިން 43 ޕޮއިންޓް ހޯދާފައިވަނީ 19 މެޗުންނެވެ. ދެވަނައިގައި އޮތް އެތްލެޓިކޯ މެޑްރިޑަށް 18 މެޗުން ލިބިފައިވަނީ 41 ޕޮއިންޓެވެ.