މި އަހަރު ބާއްވަން ތާވަލުކޮށްފައިވާ ސާފް ޗެމްޕިއަންޝިޕް ފުޓްބޯޅަ މުބާރާތް ހޯމް އެންޑް އަވޭ ފޯމެޓަށް ކުޅެން ސައުތު އޭޝިއަން ފުޓްބޯލް ފެޑެރޭޝަނުން ނިންމައިފިއެވެ.
މި ބަދަލު ގެންނަން ސާފް އިން ނިންމާފައިވާކަން އެ ފެޑެރޭޝަނުގެ އޮފިޝަލަކު ވަނީ "ޕީއެސްއެމް ސްޕޯޓްސް" އަށް ކަށަވަރުކޮށްދީފައެވެ. އެގޮތުން މި އަހަރުގެ ޖޫން އަދި ޖުލައި މަހު ބާއްވަން މަސައްކަތްކުރަމުން އަންނަ މުބާރާތް ހޯމް އެންޑް އަވޭ ފޯމެޓަށް ކުޅޭއިރު، ކޮންމެ ގައުމަކަށްވެސް އަމިއްލަ ގައުމުގައި މެޗުތައް ކުޅުމުގެ ފުރުސަތު ލިބޭނެއެވެ.
މި އަހަރުގެ ސާފް ޗެމްޕިއަންޝިޕް ހޯމް އެންޑް އަވޭ ފޯމެޓަށް ބަދަލުކުރިއިރު، 2008 ވަނަ އަހަރުގެ ސާފް ޗެމްޕިއަންޝިޕް ފިޔަވައި އެހެން ހުރިހާ މުބާރާތެއް ބާއްވާފައިވަނީ އެ އަހަރަކު ހޯސްޓްކުރާ ގައުމެއްގައި ސެންޓްރަލައިޒްކޮށް، ކަނޑައެޅި އެއް ދަނޑުގައެވެ. ރާއްޖެއިން 2008 ވަނަ އަހަރު ފުރަތަމަ ފަހަރަށް ސާފް ޗެމްޕިއަންޝިޕް ކާމިޔާބުކުރިއިރު، އެ ފަހަރު މުބާރާތް ބޭއްވީ ރާއްޖޭގެ އިތުރުން ސްރީ ލަންކާގައެވެ.
މީގެ ކުރިން 2022 ވަނަ އަހަރުވެސް ސާފް ޗެމްޕިއަންޝިޕް ހޯމް އެންޑް އަވޭއަށް ކުޅުމަށް ޕްރޮޕޯސަލެއް ހުށަހަޅައި، މަޝްވަރާތައް ވަނީ ކުރިއަށް ގެންގޮސްފައެވެ. އެކަމަކު އެ އަހަރުވެސް އެ ޕްރޮޕޯސަލާއި އެއްގޮތަށް ކުރިއަށް ނުގެންދެވުނީ ބޭނުންވާ ވަރަށް ފައިސާ ހަމަނުޖެހުމުގެ ސަބަބުންނެވެ.
ސާފް ޗެމްޕިއަންޝިޕް ހޯމް އެންޑް އަވޭ ފޯމެޓަށް ބަދަލުކުރިއިރު، އެ ފެޑެރޭޝަނުން މިހާރު ނިންމާފައިވަނީ ދައުވަތުދީގެން ސާފް ޗެމްޕިއަންޝިޕަށް ގައުމުތައް ގެނައުން ރަނގަޅު ނޫން ކަމަށެވެ. ނަމަވެސް އެންމެ ފަހުން އިންޑިއާގެ ބެންގަލޫރުގައި 2023 ވަނަ އަހަރު ބޭއްވި މުބާރާތަށް ދައުވަތުދީގެން ކުވެއިތާއި ލުބުނާންގެ ޓީމު ވަނީ ގެނެސްފައެވެ.