ކުރިން ހުއްދަ ދޫކޮށްފައިވާ މަތީ ތަޢުލީމުދޭ މަރުކަޒުތައް އައު ދަފްތަރުގައި ރަޖިސްޓްރީވާން އެދިއްޖެ
-
މަތީ ތަޢުލީމާބެހޭ ވުޒާރާއިން އައު ދަފްތަރެއް ހަދަން ފެށީ ސަރުކާރު ބަދަލުވުމާއެކު
-
އައު ދަފްތަރުގައި ރީ-ރަޖިސްޓްރީ ނުވާ 101 މަރުކަޒެއް އެބައޮތް
މަތީ ތަޢުލީމާއި ތަމްރީންދޭ މަރުކަޒުތަކުގެ އައު ދަފްތަރުގައި ރަޖިސްޓްރީނުވާނަމަ، އެ މަރުކަޒަކުން ހިންގާ ކޯސްތައް ޤަބޫލުނުކުރާނެކަމަށް މޯލްޑިވްސް ކޮލިފިކޭޝަންސް އޮތޯރިޓީ، އެމްކިޔުއޭއިން ވިދާޅުވެއްޖެއެވެ.
ގިނަ އަދަދެއްގެ މަތީ ތަޢުލީމުދޭ މަރުކަޒުތައް ރަޖިސްޓްރީވެފައިވާ މަތީ ތަޢުލީމާއި ތަމްރީންދޭ މަރުކަޒުތަކުގެ ދަފްތަރެއް މީގެ ކުރިންވެސް އޮވެއެވެ. ނަމަވެސް މިދަފްތަރުގެ ބަދަލުގައި އައު ދަފްތަރެއް އެކުލަވާލުމުގެ މަސައްކަތް މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމު ބެހޭ ވުޒާރާއިން ފެށީ ސަރުކާރު ބަދަލުވުމާއެކުގައެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން އެމްކިޔުއޭއިން ވިދާޅުވީ ކުރީގެ ދަފްތަރުގައި ރަޖިސްޓްރީވެފައިވާ 101 މަރުކަޒެއް އައު ދަފްތަރުގައި ރީ-ރަޖިސްޓްރީނުވެ އެބައޮތް ކަމަށެވެ. އަދި އައު ދަފްތަރުގައި ރަޖިސްޓްރީނުވެ މަރުކަޒުތަކުން ހިންގާ ކޯސްތައް އެމްކިޔުއޭއިން ޤަބޫލުނުކުރާނެކަމަށްވެސް އެ އޮތޯރިޓީން ވިދާޅުވިއެވެ.
ކޯސް ހިންގަން ކުރިން ދަފްތަރުވެ، އައު ދަފްތަރުގައި ރަޖިސްޓްރީވެފައިނުވާ މަރުކަޒުތަކުގެ ލިސްޓު އެމްކިޔުއޭއިން ވަނީ ސޯޝަލް މީޑިޔާގައި ޙިއްސާކުރައްވާފައެވެ.
އެމްކިޔުއޭއިން ވިދާޅުވީ ކުރީ ދަފްތަރުގައި ހުއްދަ ދީފައިވާ މަރުކަޒުތަކުން ކޯހެއް ފުރިހަމަކުރުމަށްފަހު، އެމްކިޔުއޭއަށް ބެޗް އޮޑިޓަށް ފޮނުވާފައިވާ ދަރިވަރުންގެ ސަނަދު ޤަބޫލުކުރާނެ ކަމަށެވެ.
މަތީ ތަޢުލީމާއި ތަމްރީންގެ ޤާނޫނުގެ ދަށުން މަރުކަޒުތަކުން ހިންގާ ކޯސްތަކުން ދޫކުރާ ސަނަދު އެމްކިޔުއޭއަށް ޤަބޫލުކުރެވޭނީ އެ މަރުކަޒަކީ މަތީ ތަޢުލީމާ ބެހޭ ވުޒާރާއިން އެކުލަވާލާ ދަފްތަރުގައި ރަޖިސްޓްރީވެފައިވާ މަރުކަޒަކަށްވާނަމަ އެކަންޏެވެ.