ޓިބެޓަށް އައި ބާރުގަދަ ބިންހެލުމެއްގައި ބޮޑެތި ގެއްލުންތަކެއްވެ 95 މީހުން މަރުވެ 130 މީހުން ޒަޚަމްފައިވާ ކަމަށް ޗައިނާއިން ބުނެފިއެވެ. ހިމާލަޔާ ފަރުބަދަ ހިމެނޭ ސަރަޙައްދަށް އައި ރިކްޓަރ މިންގަނޑުން 7.1ގެ ބާރުގަދަ ބިންހެލުމުގެ ލޮޅުމުގެ އަސަރު އިންޑިޔާއާއި ނޭޕާލާއި ބޫޓާނަށް ވެސް ކުރިއެވެ. ނަމަވެސް އެ ޤައުމުތަކަށް ލިބުނު ގެއްލުމުގެ ތަފްޞީލެއް ނުލިބެއެވެ.
ބިންހެލުން އައިސްފައި ވަނީ އުތުރުން ހިމާލަޔާ ސަރަޙައްދަށް ވަދެވެން އޮންނަ މަގާ ދިމާލުން ބިމުގެ 10 ކިލޯމީޓަރު އަޑިންނެވެ. އެއީ ދުނިޔޭގެ އެންމެ އުސް ފަރުބަދަ ކަމަށްވާ ހިމާލަޔާއާ 80 ކިލޯމީޓަރު ދުރު ސަރަޙައްދެކެވެ. އެއީ ފަތުރުވެރިންގެ މެދުގައި މަޤްބޫލް ސަރަޙައްދެއް ކަމަށްވި ނަމަވެސް ފިނި މޫސުމުގައި އެއީ މީހުން ގޮސްއުޅޭ ސަރަޙައްދެއް ނޫނެވެ.
1950ވަނަ އަހަރުގެ ފަހުން އެ ސަރަޙައްދަށް ރިކްޓަރ މިންގަނޑުން 6އަކަށްވުރެ ބާރުގަދަ 21 ބިންހެލުން އެ ސަރަޙައްދަށް އައިސްފައިވެއެވެ. އެއީ 30 އަވަށެއްގައި މިލިއަނެއްހާ މީހުން ދިރިއުޅޭ ސަރަޙައްދެކެވެ.