ލިވަޕޫލާ ދެކޮޅަށް ޔުނައިޓެޑް: "ކުޅުންތެރިން ތިބީ ހާސްވެފައި، ބިރުވެސް ގަނޭ"

ޓޭބަލުގެ އެއްވަނާގައިވާ އަދި އެންމެ ވާދަވެރި ލިވަޕޫލާ ދެކޮޅަށް އިނގިރޭސި ޕްރެމިއާ ލީގުގައި މިރޭ ކުޅެން ނުކުންނައިރު ޔުނައިޓެޑްގެ ކުޅުންތެރިން ތިބީ ހާސްވެ، ބިރުގެންފައި ކަމަށް ކޯޗު ރުބެން އަމޮރިމް ބުނެފި އެވެ.

އޭނާ މިހެން ބުނީ ޔުނައިޓެޑް އެންމެ ފަހުން ކުޅުނު ހަތަރު މެޗުން ވެސް ބަލިވެފައިވާތީ އެވެ. އަދި މިއިން މެޗެއްގައި ގޯލެއް ވެސް ޖެހިފައިނުވެ އެވެ. ޓޭބަލުގައި ޓީމު މިވަގުތު އޮތީ 22 ޕޮއިންޓާއެކު 14 ވަނާގަ އެވެ. ލިވަޕޫލް އެއްވަނާގައިވަނީ 45 ޕޮއިންޓާއެކުގަ އެވެ.

އަމޮރިމް ބުނީ މިފަދަ ތަފާތު ސަބަބުތަކާހުރެ ކުޅުންތެރިން ދަނޑަށް ނުކުންނަން ވެސް ޖެހިލުންވާ ކަމަށެވެ.

"

ކުޅުންތެރިން ތިބީ ހާސްވެފައި. ދަނޑުމަތީގައި ބިރު ވެސް ގަނޭ ބައެއް ފަހަރު. އެކަމަކު އަހަރުމެން މިކަމާ ކުރިމަތިލާންޖެހޭނެ. އަހަރެންނަކީ ނަތީޖާ ނެރުމަށް ބާރު އަޅާ އަދި ނަތީޖާއާ މެދު އެންމެ ބޮޑަށް ޒިންމާވާންޖެހޭ ފަރާތް. އެކަމަކު ޓީމުގައި ތިބި ހަރު ކުޅުންތެރިން އެމީހުންގެ ލީޑަރޝިޕް ދައްކަންޖެހޭ ވަގުތުމިއީ،

ކޯޗު ރުބެން އަމޮރިމް

މިދިޔަ ނޮވެމްބަރު މަހު ޓީމާ ހަވާލުވި ކޯޗުގެ ބެލުމުގެ ދަށުން ޔުނައިޓެޑް މިހާތަނަށް ކުޅުނު 11 މެޗުގެ ތެރެއިން ހަ މެޗުން ވަނީ ބަލިވެފަ އެވެ. ނަމަވެސް ކޯޗު ބުނީ އޭނާގެ މޫނުމަތިން ނޫސްވެރިންނަށް ހާސްކަމުގެ އެއްވެސް ނިޝާނެއް ނުފެންނާނެ ކަމަށެވެ.

"

އެކަމަކު މިއީ އަހަރެން ޕްރެޝަރުގައި ނެތުމެއްނޫން. ވަރަށް ޕްރެޝަރު އެބައޮތް. އަހަރެންގެ މޫނުމަތިން އެކަން ނުދައްކަނީ. ޔުނައިޓެޑްގެ ނަތީޖާ ގޯސްވާނަމަ އަބަދުވެސް ޕްރެޝަރު އޮންނާނެ. އަމުދުން ނަތީޖާ ގޯސްވާނަމަ އެކަމުން އަރައިގަތުމަށް ވެސް ދަތިތަކެއް ހުންނާނެ. މިކަން ހައްލު ކުރެވޭނީ ގިނައިން ޕްރެކްޓިސްކޮށް، ގަދަ އަޅައި މަސައްކަތްކޮށްގެން. އަހަރެންގެ އާއިލާ މިހާރު އަހަރެންގެ ގާތަށް އައިސްފި. އެއީ ހާސްކަން ފިލާ ސަބަބެއްވެސްމެ،

ކޯޗު ރުބެން އަމޮރިމް

މިރޭގެ މެޗު ފަށާނީ މާލޭ ގަޑިން 21:30ގަ އެވެ.