ގަޑިއިރެއްހާއިރު ތެރޭގައި މާލެއަށް ރެކޯޑް އަދަދަކަށް ވާރޭ!

ރާއްޖެއަށް މިހާރު ކުރަމުންދާ ވިއްސާރާގައި އެންމެ ގިނައިން ވާރޭވެހިފައިވަނީ މާލެއަށްކަމަށް މޫސުމާބެހޭ ޤައުމީ އިދާރާއިން ވިދާޅުވެއްޖެއެވެ.

ރާއްޖެ ސަރަޙައްދުގައި އުފެދިފައިވާ ސަރކިއުލޭޝަނެއްގައި ސަބަބުން ރާއްޖޭގެ ބޮޑު ބަޔަކަށް މިހާރުދަނީ ވިއްސާރަކުރަމުންނެވެ.

ޕީއެސްއެމް ނިއުސްއަށް މަޢުލޫމާތު ދެއްވަމުން މޫސުމާބެހޭ ޤައުމީ އިދާރާގެ މީޓިއޮރޮލޮޖިސްޓް އަޙްމަދު ޝަހުދު ވިދާޅުވީ ވޭތުވެދިޔަ 24 ގަޑިއިރުގެ ތެރޭގައި އެންމެ ގިނައިން ވާރޭވެހިފައިވަނީ މާލެއަށްކަމަށެވެ. މިގޮތުން މިދިޔަ 24 ގަޑިއިރުގެ ތެރޭގައި މާލެއަށް 162 މިލިލީޓަރުގެ ވާރޭވެހިފައިވާކަމަށް ޝަހުދު ވިދާޅުވިއެވެ. އަދި ހަވީރު 5:00 އިން 6:00 ޖެހުމާއި ހަމައަށް އެއްގަޑިއިރުގެ ތެރޭގައި 60 މިލިލީޓަރުގެ ވާރޭވެހިފައިވާކަމަށެވެ.

އަތޮޅުތެރޭގެ ރަށްތަކަށް ބަލާއިރު އެންމެ ގިނައިން ވާރޭވެހިފައިވަނީ އދ.މާމިގިއްޔަށެވެ. އެގޮތުން އެރަށަށް 135 މިލިލީޓަރުގެ ވާރޭ ވެހިފައިވާކަމަށް މެޓު އޮފީހުން ވިދާޅުވެއެވެ. އަދި ލ.ކައްދޫއަށް 92 މިލިލީޓަރުގެ ވާރޭވެހިފައިވާކަމަށްވެސް އެ އިދާރާއިން ވިދާޅުވެއެވެ.

Orange Warning extended till 23:00. pic.twitter.com/ApfWSJkskX

— Maldives Meteorology (@MetMaldives) January 3, 2025

މޫސުމާ ބެހޭ ޤައުމީ އިދާރާއިން ވިދާޅުވީ ރާއްޖެ ސަރަޙައްދުގައި އުފެއްދިފައިވާ ކޮޅިގަނޑު މިހާރު އޮތީ ރާއްޖެމަތީގައިކަމަށެވެ. އެހެންކަމުން ކުރިއަށް އޮތް 24 ގަޑިއިރުވެސް ރާއްޖޭގެ ބޮޑު ބަޔަކަށް ވިއްސާރަކުރާނެކަމަށާއި މިގޮތުން މެދުރާއްޖޭގެ ރަށްތަކަށް ބޯކޮށްވާރޭ ވެހޭނެކަމަށް މޫސުމާބެހޭ ޤައުމީ އިދާރާއިން ލަފާކުރައްވައެވެ.

މޫސުމާބެހޭ ޤައުމީ އިދާރާއިން ވަނީ ބޯކޮށް ވާރޭވެހޭނެކަމަށް ލަފާކޮށް، ބ.އަތޮޅުން ފެށިގެން ތ.އަތޮޅާއި ހަމައަށް މެންދުރުފަހު 3:00 އިން ފެށިގެން މިރޭ 11:00 ޖެހުމާއިހަމައަށް އޮރެންޖް އެލާޓްވެސް ނެރެފައެވެ. އަދި އެވަގުތުތަކުގައި މެދުރާއްޖެއާއި ދެކުނުގެ ކަނޑުތައް ގަދަވާނެކަމަށާއި އޮރެންޖް އެލާޓްގެ ވަގުތުގައި ކަނޑު ދަތުރުނުކުރުމަށްވެސް މެޓު އޮފީހުން އިލްތިމާސްކުރައްވައެވެ.

މާލެއަށް ވާރޭވެހި ގިނަ ފިހާރަތަކަށާއި ގެބިސީތަކަށް ފެންވަނުމާއި ގުޅިގެން ޢާއްމުންނާއި ކަމާބެހޭ ފަރާތްތައް ގުޅިގެން ދަނީ ފެން ހިންދުމުގެ މަސައްކަތްކުރަމުންނެވެ. ހަމައެއާއެކު މާލޭގެ އެކި ސަރަހައްދުތަކުގައި ޕަމްޕު ޖަހައިގެން ފެން ހިންދުމުގެ މަސައްކަތް ސިފައިން ގެންދަވަނީ ކުރިއަށްގެންދަވަމުންނެވެ.

މި ވިއްސާރާގައި 4 އަތޮޅަކުން ވަނީ އުދައަރައިގެން ރިޕޯޓްކޮށްފައެވެ. އަދި ބޯކޮށްވާރޭވެހި އެކިވަރުގެ ގެއްލުން ލިބިގެން 6 ރަށަކުން ވަނީ މިހާތަނަށް ޑިޒާސްޓަރ މެނޭޖްމަންޓް އޮތޯރިޓީއަށް ރިޕޯޓުކޮށްފައެވެ.