ރާއްޖެއަށް ކުރިމަތިވާ ކޮންމެ ދަތިކަމަކުން އަރައިގަތުމަށް އިންޑިއާއިން އަބަދުވެސް އެހީތެރިވާނެ: ޖައިޝަންކަރު

ރާއްޖެއަށް އެހީތެރިކަން އެންމެ ބޮޑަށް ބޭނުންވާ ދަނޑިވަޅުގައި އިންޑިއާއިން އަބަދުވެސް އެހީތެރިކަން ފޯރުކޮށްދެނީ ދެ ޤައުމުގެ ދެމެދު އޮތް ވަރުގަދަ ގުޅުމުގެ ސަބަބުންކަމަށް އިންޑިއާގެ އެކްސްޓާނަލް އެފެއާޒް މިނިސްޓަރ ޑރ. އެސް ޖައިޝަންކަރު ވިދާޅުވެއްޖެއެވެ.

އިންޑިއާގެ އެކްސްޓާނަލް އެފެއާޒް މިނިސްޓަރ މިހެން ވިދާޅުވީ ޚާރިޖީ ވަޒީރު ޑރ. އަބްދުﷲ ހަލީލާއެކު ނިއުދިއްލީގައި ބޭއްވެވި ބައްދަލުކުރެއްވުމުގައެވެ.

ޚާރިޖީ ވަޒީރު ޑރ. އަބްދުﷲ ހަލީލާއެކު ބޭއްވެވި ބައްދަލުކުރެއްވުމުގައި އިންޑިއާގެ އެކްސްޓާނަލް އެފެއާޒް މިނިސްޓަރ ޑރ. އެސް ޖައިޝަންކަރު ދެއްކެވި ވާހަކަފުޅު ޚާރިޖީ ވަޒީރު ޑރ. އަބްދުﷲ ހަލީލަކީ އެމަނިކުފާނު މިއަހަރު ބައްދަލުކުރައްވާ ބޭރުގެ ފުރަތަމަ ޑިޕްލޮމޭޓުކަން ފާހަގަކުރައްވައި، ހޫނު މަރުހަބާއެއް ދެންނެވިއެވެ.

ޖައިޝަންކަރު ދެއްކެވި ވާހަކަފުޅު ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިދިޔަ އޮކްޓޫބަރުމަހު އިންޑިއާއަށް ކުރެއްވި ދަތުރުފުޅުގައި ކުރެވުނު މަސައްކަތްތަކާއެކު ދެ ޤައުމުގެ ގުޅުން އިތުރަށް ބަދަހިވެގެންދިޔަކަން ފާހަގަކުރެއްވިއެވެ. އަދި ދެ ޤައުމުގެ ދެމެދުގައި ކުރެވޭ ވިޔަފާރީގައި އަމިއްލަ ފައިސާ ބޭނުންކުރުމާއި ގުޅޭ އެއްބަސްވުމެއް ޤާއިމްކުރެވިފައިވާކަމާއި މީގެއިތުރުން އެކި ދާއިރާތަކުން ގުޅިގެން ކުރެވޭ މަސައްކަތްތައް އިތުރުވެފައިވާކަންވެސް އެމަނިކުފާނު ފާހަގަކުރެއްވިއެވެ.

ޖައިޝަންކަރު ވިދާޅުވީ އިންޑިއާގެ ނެއިބަރހުޑް ފަސްޓް ޕޮލިސީގެ ދަށުން އެހީތެރިކަން ފޯރުކޮށްދިނުމުގައި ރާއްޖެއަކީ މިސާލެއްކަމަށާއި، އިންޑިއާއިން އަބަދުވެސް އޮންނާނީ ރާއްޖެއާއެކުކަމަށެވެ. އެގޮތުން އިޤްތިޞާދީގޮތުން އުނދަގޫ މި ދަނޑިވަޅުގައިވެސް އިންޑިއާއިން މާލީގޮތުން ރާއްޖެއަށް އެހީތެރިކަން ފޯރުކޮށްދީފައިވާކަން އެމަނިކުފާނު ފާހަގަކުރެއްވިއެވެ. އަދި ރާއްޖެއަށް ބޭނުންވާ އަސާސީ މުދާވެސް އެއްވެސް ދަތިކަމެއް ނެތި އިންޑިއާއިން ފޯރުކޮށްދެމުންދާކަމަށް އިންޑިއާގެ ޚާރިޖީ ވަޒީރު ވިދާޅުވިއެވެ. އެހެންކަމުން ރާއްޖެއާއި އިންޑިއާގެ ގުޅުމުގެ ސަބަބުން އެންމެ ދަތި ވަގުތުތަކުގައި ރާއްޖެއަށް ބޭނުންވާ އެހީތެރިކަން އަބަދުވެސް ފޯރުކޮށްދެވޭކަން ޖައިޝަންކަރު ފާހަގަކުރެއްވިއެވެ.

ހާރިޖީ ވަޒީރު ޑރ. އަބްދުﷲ ހަލީލް ވިދާޅުވީ، އިންޑިއާއާއިއެކު ސިޔާސީގުޅުން ގާއިމްކުރިތާ 60 އަހަރު ފުރިފައިވާކަމަށާއި، އިންޑިއާގެ ގުޅުމަކީ ރާއްޖެއަށް މުހިންމު ގުޅުމެއްކަމަށެވެ. މި ގުޅުން ގާއިމްވެފައިވަނީ 2 ޤައުމުގެ އިހްތިރާމާއި، އިތުބާރާއި، ރަހުމަތްތެރިކަމުގެ ގާތް ގުޅުމުގެ މައްޗަށްކަންވެސް އެމަނިކުފާނު ފާހަގަކުރެއްވިއެވެ. އަދި ރާއްޖެއިން އެހީތެރިކަން ބޭނުންވެއްޖެ ކޮންމެ ހިނދެއްގައިވެސް އެންމެ ފުރަތަމަ އެހީތެރިކަން ދޭ ޤައުމަކީ އިންޑިއާކަންވެސް އެމަނިކުފާނު ފާހަގަކުރެއްވިއެވެ.

"ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އިންޑިއާއާއިއެކު ގާތުން މަސައްކަތްކުރަން ބޭނުން. މި ގުޅުން މިހާރަށްވުރެވެސް އިތުރަށް ވަރުގަދަކުރުމަށް އެމަނިކުފާނު ބޭނުންވޭ". ވަޒީރު ވިދާޅުވިއެވެ.

ޚާރިޖީ ވަޒީރު ޑރ. އަބްދުﷲ ޚަލީލް އިންޑިއާއަށް ކުރައްވާ މި ދަތުރުފުޅަކީ މިދިޔަ ސެޕްޓެމްބަރުމަހުގެ 30 ވަނަ ދުވަހު މަޤާމާއި ޙަވާލުވެވަޑައިގަތުމަށްފަހު އިންޑިއާއަށް ކުރައްވާ ފުރަތަމަ ދަތުރުފުޅެވެ. މި ދަތުރުފުޅުގައި ދެ ޤައުމުގެ ގުޅުން އެކި ދާއިރާތަކުން އިތުރަށް ފުޅާކޮށް، ބަދަހިކުރުމަށް މަޝްވަރާކުރައްވާނެއެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒުވެސް ވަނީ މިދިޔަ އޮކްޓޫބަރުމަހު އިންޑިއާއަށް ރަސްމީ ދަތުފުޅެއް ކުރައްވާފައެވެ. އެ ދަތުރުފުޅުގެ ތެރެއިންވެސް ވަނީ ދެ ޤައުމުގެ ދެމެދުގައި ރަސްމީ މަޝްވަރާތައް ބާއްވާފައެވެ.