މިހާރު ކުރިއަށްދާ ޖެނުއަރީ ޓްރާންސްފާ ބާޒާރުގައި ރެއާލް މެޑްރިޑުން ހޯދަން މަސައްކަތް ކުރަމުން އަންނަ އިނިގިރޭސި ފުލްބެކް ޓްރެންޓް އެލެކްޒެންޑަރ-އާނޯލްޑުގެ ޓްރާންސްފާ ކުރިއަށްދާ ގޮތް ފެންނާނެ ކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފިއެވެ.
މިހާރު ކުރިއަށްދާ ސީޒަނުގެ ނިޔަލަށް އާނޯލްޑް އާއިއެކު ލިވަޕޫލް އިން ހަދާފައިވާ އެއްބަސްވުމުގެ މުއްދަތު ހަމަވާއިރު އެ ކްލަބުން ވަނީ އޭނާގެ އެއްބަސްވުން އައު ކުރުމަށް ހުށައަޅާފަ އެވެ. ނަމަވެސް އެ ހުރިހާ ޕްރޮޕޯސަލަކަށް އާނޯލްޑް ވަނީ ފުރަގަސްދީފަ އެވެ.
އަދި މި މަހުގެ އެއްވަނަ ދުވަހުން ފެށިގެން އިނގިރޭސި ކްލަބްތައް ފިޔަވާ ކޮންމެ ކްލަބަކާއިއެކުވެސް ވާހަކަ ދެއްކުމުން ހުއްދަ އޭނާއަށް ލިބިފައިވާއިރު، ބައެއް ފަރާތްތަކުން ވަނީ އާނޯލްޑް ރެއާލް މެޑްރިޑަށް ދާން ބޭނުންވާކަމަށް ބުނެފަ އެވެ. އަދި ޖުލައި މަހުގެ އެއްވަނަ ދުވަހު ހިލޭ ޓްރާންސްފާ އެއްގެ ދަށުން އޭނާއަށް ބޭނުން ކްލަބަކަށް ދިއުމުގެ ފުރަސަތު ހުޅުވިގެންދާނެ އެވެ.
މީގެ ކުރިން ރެއާލް މެޑްރިޑްއިން އާނޯލްޑް ހޯދުމަށް ލިވަޕޫލްއަށް ޕްރޮޕޯސަލެއް ހުށައެޅުމާއިއެކު ލިވަޕޫލް އިން ވަނީ އޭނާ ޖެނުއަރީ ޓްރާންސްފާ ބާޒާރުގައި ވިއްކާލެވެން ނެތް ކަމަށް އެ ކްލަބަށް އަންގާފަ އެވެ. ނަމަވެސް ރެއާލްއިން އިތުރު ބިޑެއް އާނޯލްޑް ގަތުމަށް ހުށައެޅުމުގެ މަސައްކަތް ކުރަމުންދާ ކަމަށްވެސް ރިޕޯޓްތައް ވަނީ ބުނެފަ އެވެ.
ރެއާލް މެޑްރިޑްގެ ކޯޗު ކާލޯ އަންޗެލޮޓީ ބުނެފައިވަނީ އާނޯލްޑްގެ ކަންތައް ކުރިއަށްދާ ގޮތް ފެންނާނެ ކަމަށާއި، ނަމަވެސް އޭނާއަށް މިވަގުތު އެންމެ މުހިންމު ކަމަކީ ކުރިއަށްހުރި މެޗުތަކުގައި ރަގަޅު ނަތީޖާތަކެއް ހޯދުމަށް، އެ މެޗުތަކަށް ފޯކަސްކުރުން ކަމަށެވެ.