ފަލަސްޠީނުގެ ހުޅަނގު އައްސޭރީގައި އަލް ޖަޒީރާ ޓީވީ ބްރޯޑްކާސްޓު ކުރުން މަނާކޮށްފިއެވެ. މި ގޮތަށް އަމަލު ކުރުމަށް ނިންމާފައި ވަނީ ހުޅަނގު އައްސޭރީގައި ވެރިކަން ކުރާ ޕަލަސްޓީނިޔަން އޮތޯރިޓީ (ޕީއޭ)ގެ ސަރުކާރުންނެވެ. އަލް ޖަޒީރާގެ ޚަބަރާއި މަޢުލޫމާތު ހިމެނޭ ޕުރޮގުމާރުތައް ހުޅަނގު އައްސޭރީގައި ބްރޯޑްކާސްޓު ކުރުން މަނާކޮށްފައި މި ވަނީ، ހަމަނުޖެހުން އުފެދޭ ފަދަ ޚަބަރާއި މަޢުލޫމާތު ފަތުރާ ކަމުގައި ތުހުމަތު ކުރުމަށް ފަހުއެވެ.
ޤަޠަރުގައި ޤާއިމު ކޮށްފައިވާ ޚަބަރާއި މަޢުލޫމާތު ގެނެސްދޭ ޓީވީ ސްޓޭޝަން، އަލް ޖަޒީރާގެ ޕުރޮގުރާމުތައް ބްރޯޑްކާސްޓު ކުރުން ވަގުތީ ގޮތުން މެދުކަނޑައިލުމަށް ނިންމާފައި ވަނީ ޕީއޭގެ ދާޚިލީ، ސަޤާފީ އަދި މުއާޞަލާތާ ބެހޭ ވަޒީރުންގެ މެދުގައި ކުރެވުނު މަޝްވަރާތަކަށް ފަހުގައެވެ. އެ ގޮތަށް އަމަލު ކުރުމަށް ނިންމާފައި ވަނީ، ހަމަނުޖެހުމާއި ދެބަސްވުންތަކަށް ބާރުއަޅައި، ސައްޙަ ނޫން މަޢުލޫމާތު ހިމެނޭ ޕުރޮގުރާމުތައް އެ ޓީވީ ޗެނަލުން ބްރޯޑްކާސްޓު ކުރަމުންދާތީ ކަމުގައި ފަލަސްޠީނުގެ ވަފާ ނޫސް އޭޖެންސީން ރިޕޯޓު ކުރިއެވެ. އަލް ޖަޒީރާގެ ބްރޯޑްކާސްޓުތައް ހުޅަނގު އައްސޭރީގައި ދެން ފަށާނެ ތާރީޚެއް ސާފެއް ނޫނެވެ.
ހުޅަނގު އައްސޭރީގައި އަލް ޖަޒީރާ ޓީވީ ބްރޯޑްކާސްޓު ކުރުން ހުއްޓުވާފައި މި ވަނީ، ފަަލަސްޠީނުގެ ޣައްޒާގެ މުސްލިމުންގެ ނަސްލުހޭދު ކުރަން ޔަހޫދީ ފައުޖުން ލާއިންސާނީ ޖަރީމާތަކެއް ހިންގަމުންދާ ދަނޑިވަޅެއްގައެވެ. 2023ވަނަ އަހަރުގެ އޮކްޓޫބަރު މަހުގެ 7ވަނަ ދުވަހު ފެށި ޢުދުވާނުގެ ދަށުން ޣައްޒާއިން 45,000އަށްވުރެ ގިނަ މީހުން ވަނީ ޝަހީދު ކޮށްލާފައެވެ. އަދި، ޢާންމުންގެ ގެދޮރާއި، ރެފިއުޖީ ކޭމްޕުތަކާއި، ހަސްފަތާލުތަކާއި، މަދަރުސާތަކުގެ އިތުރުން މިސްކިތްތައް ވަނީ ސުންނާފަތިކޮށް ބިމާ ހަމަކޮށްލާފައެވެ.
ޕީއޭގެ ސަރުކާރުން ބުނީ، އަލް ޖަޒީރާ ޓީވީ ބްރޯޑްކާސްޓު ކުރުން ހުއްޓުވާފައި ވަނީ، ހުސްވި ހަފުތާއެއްހާ ދުވަހުގެ ތެރޭގައި އެ ނޫހުން ގެނެސްދީފައިވާ ޚަބަރުތަކާއި ރިޕޯޓުތަކާ ގުޅިގެން ކަމުގައެވެ. އެއީ، ހުޅަނގު އައްސޭރީގައި ހުންނަ ޖިނީން ރެފިއުޖީ ކޭމްޕުގައި، ފަލަސްޠީނުގެ ސަލާމަތީ ބާރުތަކާއި މުޖާހިދުންގެ ޖަމާޢަތްތަކާ ދެމެދު ހިނގާފައިވާ ކުރިމަތިލުންތަކުގެ ޚަބަރުތަކާއި ރިޕޯޓުތަކާ ގުޅުންހުރި މައްސަލައެކެވެ.
ޕީއޭގެ ސަރުކާރުން ވަނީ، އެ ހަމަނުޖެހުންތަކާ ގުޅިގެން އަލް ޖަޒީރާއިން ގެނެސްދީފައިވާ ޚަބަރުތަކަށް ފާޑުކިޔާފައެވެ. ހުޅަނގު އައްސޭރީގައި އަލް ޖަޒީރާ ޓީވީ ބްރޯޑްކާސްޓު ކުރުން މެދުކަނޑައިލުމުން، އެ ޓީވީން ވަނީ ޕީއޭގެ ނިންމުން ކުށްވެރި ކޮށްފައެވެ. އަލް ޖަޒީރާއިން ބުނީ، އެއީ ހުޅަނގު އައްސޭރީގައި ހިނގަމުންދާ ކަންކަމުގެ ޚަބަރާއި މަޢުލޫމާތު ގެނެސްދިނުމަށް ހުރަސް އެޅުމުގެ ގޮތުން ޕީއޭން އަޅާފައިވާ ފިޔަވަޅެއް ކަމުގައެވެ. އަދި، އެ ނިންމުން ބާޠިލު ކުރުމަށް ވެސް އަލް ޖަޒީރާއިން ވަނީ ގޮވައިލާފައެވެ.
ހުޅަނގު އައްސޭރީގެ ސަރަޙައްދުތަކުގައި އަލް ޖަޒީރާ ޓީވީ ބްރޯޑްކާސްޓު ކުރުން މެދުކަނޑައިލުމަށް ޕީއޭގެ ސަރުކާރުން ނިންމާފައިވީ ނަމަވެސް، އެ ނިންމުން ޣައްޒާގައި ތަންފީޒެއް ނުކުރެވޭނެއެވެ. ސަބަބަކީ، ޣައްޒާއަކީ ޕީއޭގެ ބާރު ހިނގާ ސަރަޙައްދެއް ނޫނެވެ. އެ ސަރަޙައްދުގައި ވެރިކަން ކުރަނީ، ފަލަސްޠީނުގެ މިނިވަން ކަމަށް ޖިހާދު ކުރާ ޖަމާޢަތެއް ކަމުގައިވާ ޙަމާސުންނެވެ.
ޙަމާސްގެ އެންމެ ބޮޑު ވާދަވެރިޔަކީ ޕީއޭގައި ހިމެނޭ މައި ޕާޓީ، ފަތުޙް ޖަމާޢަތެވެ. އެ ޖަމާޢަތުން ވެސް ވަނީ އަލް ޖަޒީރާގެ ޚަބަރުތަކާއި ރިޕޯޓުތަކަށް ފާޑު ކިޔާފައެވެ. އަދި، ޢަރަބިންގެ ފަސްގަނޑުގައި ދެބަސްވުންތައް އުފައްދައި، ހަމަނުޖެހުންތަކަށް ހިތްވަރު ދިނުމަށް އަލް ޖަޒީރާއިން މަސައްކަތް ކުރަމުންދާ ކަމަށް ފަތުޙް ޖަމާޢަތުން ވެސް ތުހުމަތު ކުރިއެވެ.
ހުޅަނގު އައްސޭރީގެ ސަރަޙައްދުތަކުގައި އަލް ޖަޒީރާ ޓީވީ ބްރޯޑްކާސްޓު ކުރުން މެދުކަނޑައިލާފައި މި ވަނީ، ރާމަاللهގައި ހުންނަ އަލް ޖަޒީރާގެ މައި އޮފީހަށް ޔަހޫދީ ފައުޖުގެ ނިރުބަވެރި ސިފައިން ރޭޑުޖަހާފައިވާ ދަނޑިވަޅެއްގައެވެ. އެ ޢުދުވާނަށް ފަހު، އެ އޮފީސް ބަންދު ކުރުމަށް ޔަހޫދީންގެ އިސްތިޢުމާރީ ބާރުން ވަނީ އަމުރު ކޮށްފައެވެ. ޒަޔަނިސްޓު އިސްރާއީލުގެ ސަރަޙައްދުތަކުގައި އަލް ޖަޒީރާގެ ބްރޯޑްކާސްޓުތައް ވެސް ވަނީ މަނާކޮށްފައެވެ.
ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޢުދުވާނުގައި ޝަހީދުކޮށްލާފައިވާ މީހުންގެ ޢަދަދު ވަނީ 45,553އަށް އުފުލިފައެެވެ. އޭގެ ތެރޭގައި 17,000އެއްހާ ކުޑަކުދިން ހިމެނޭއިރު, އިތުރު 10,000އެއްހާ މީހުންގެ ހަށިތައް ސުންނާފަތި ކޮށްލާފައިވާ އިމާރާތްތަކުގެ ދަށުގައި ތާށިވެފައިވާ ކަމަށް ޣައްޒާގެ އޮފިޝަލުން ޤަބޫލު ކުރެއެވެ. ޣައްޒާ ޢުދުވާނުގައި ޔަހޫދީ ފައުޖުން ވަނީ 108,379 މީހުން ޒަޚަމު ކޮށްލާފައެވެ.