ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމުކޮށްގެން ކުރިއަށްގެންދާ ގައުމީ ވޮލީބޯލް ލީގު 2024 ގައި މިއަދު ކުޅުނު މެޗުތަކުން ދިވެހި ސިފައިންގެ ކުލަބާއި، ކުލަބު އެޗްޑީސީ މޮޅުވެއްޖެއެވެ.
ޒުވާނުންގެ މަރުކަޒުގެ އެތެރޭ ކޯޓުގައި ކުރިއަށްދާ މި މުބާރާތުގައި އެންމެ ފަހުގެ ޗެމްޕިއަން ސިފައިންގެ ކުލަބުން ކުޅުނު ތިންވަނަ މެޗުން މޮޅުވީ މިއަދު ހަވީރު ތިން ސެޓު އެއް ސެޓުން ވާދަވެރި ޕޮލިސް ކުލަބު ބަލިކުރުމަށްފަހުއެވެ. މި މެޗުގެ ފުރަތަމަ ސެޓު 25-14 އިން ސިފައިންގެ ކުލަބުން ގެންދިޔަ ނަމަވެސް، ދެވަނަ ސެޓު ޕޮލިސް ކުލަބުން ވަނީ 25-22 އިން ކާމިޔާބުކޮށްފައެވެ. އެކަމަކު ޖެހިގެން އައި ދެ ސެޓުގައި ސިފައިންގެ ކުލަބުގެ ފަރާތުން ރަނގަޅު ކުޅުމެއް ފެނިގެންދިޔައިރު، އެ ޓީމުން ވަނީ ފަސޭހަކަމާއެކު މި ދެ ސެޓު ކާމިޔާބުކޮށް މެޗުން މޮޅުވެފައެވެ. ސިފައިންގެ ކުލަބުން މި ސެޓުތައް ގެންގޮސްފައިވަނީ 25-13 އަދި 25-12 އިންނެވެ. މި މެޗުގެ މޮޅު ކުޅުންތެރިއަކަށް ހޮވިފައިވަނީ ސިފައިންގެ ކުލަބުގެ ހުސައިން ރައްޒާނެވެ.
މީގެ އިތުރުން މި މުބާރާތުގައި މިރޭ ކުޅުނު މެޗުން އެޗްޑީސީ މޮޅުވީ ބްލޫސް ފޯރ ވޮލީބޯލް އަތުން ފަސޭހަކަމާއެކު ސީދާ ތިން ސެޓުންނެވެ. މި މެޗުގައި އެޗްޑީސީގެ ފަރާތުން މޮޅު ކުޅުމެއް ފެނިގެންދިޔައިރު، މެޗުގެ ސެޓުތައް އެ ޓީމުން ގެންގޮސްފައިވަނީ 25-23، 25-15 އަދި 25-18 އިންނެވެ. މެޗުގެ މޮޅު ކުޅުންތެރިއަކަށް ހޮވިފައިވަނީ އެޗްޑީސީއަށް ކުޅެމުން އަންނަ ޕާކިސްތާނުގެ މުބައްޝަރް ރަޒާއެވެ.
މި މުބާރާތުގައި މިއަދު ކުޅުނު މެޗުތަކުން ސިފައިންގެ ކުލަބާއި، އެޗްޑީސީ މޮޅުވިއިރު، އެ ދެ ޓީމުންވެސް ވަނީ ލީގުގައި މިހާތަނަށް ކުޅުނު ތިން މެޗުންވެސް މޮޅުވެފައެވެ. އެއާއެކު ތާވަލުގެ ކުރީގައި އޮތް ސިފައިންގެ ކުލަބާއި، އެޗްޑީސީއަށް ވަނީ ނުވަ ޕޮއިންޓް ލިބިފައެވެ. ލީގުގެ ފަހު މެޗުގައި މާދަމާރޭ މި ދެ ޓީމު ވާދަކުރާއިރު، އެ މެޗުން މޮޅުވާ ޓީމަކަށް ގައުމީ ލީގުގެ ޗެމްޕިއަންކަން ލިބިގެންދާނެއެވެ.
ލީގު ތާވަލުގެ ތިންވަނައިގައި އޮތް ސްޕޯޓްސް ކުލަބު ސިޓީއަށް ތިން މެޗުން ތިން ޕޮއިންޓް ލިބިފައިވާއިރު، ހަތަރުވަނައިގައި އޮތީ ހަތަރު މެޗުން ދެ ޕޮއިންޓް ހޯދާފައިވާ ބްލޫސް ފޯރ ވޮލީބޯލްއެވެ. އަދި ފުލުގައި އޮތް ޕޮލިސް ކުލަބަށް ތިން މެޗުން ލިބިފައިވަނީ އެންމެ ޕޮއިންޓެކެވެ.