އަމާން، ރައްކާތެރި އަދި ތަރައްޤީވެފައިވާ ދިވެހީންގެ ރާއްޖެއެއް މިސަރުކާރުން ހޯދައިދޭނެ: މަޖިލިސް ރައީސް

އަމާން، ރައްކާތެރި އަދި ތަރައްޤީވެފައިވާ ދިވެހީންގެރާއްޖެއެއް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވެރިކަމުގައި ހޯދައިދެއްވާނެކަމަށް ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވެއްޖެއެވެ.

މަޖިލީހުގެ ރައީސް މިހެން ވިދާޅުވީ 2024 ވަނަ އަހަރު ރައީސް ޑރ. މުޙައްމަދު މުޢިއްޒުގެ ސަރުކާރުން ހޯއްދަވާފައިވާ ކާމިޔާބީތަކުގެ މައްޗަށް އަލިއަޅުވާލައްވައި ޕީއެސްއެމް ނިއުސްގެ ރާއްޖެ މިއަދު ޕްރޮގުރާމްގައި ވާހަކަފުޅުދައްކަވަމުންނެވެ.

ވެރިކަންކުރާ ޕީޕަލްސް ނެޝަނަލް ކޮންގްރެސް، ޕީއެންސީގެ ޗެއަރޕާސަންކަމުގެ މަޤާމުވެސް ފުރުއްވަމުން ގެންދަވާ، ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވީ 2024 ވަނަ އަހަރަކީ ރައީސް ޑރ. މުޢިއްޒުގެ ސަރުކާރަށް ގިނަ ދަތިތަކެއް ދިމާވި އަހަރެއް ކަމަށާއި، އޭގެތެރޭގައި ރައީސް މުޢިއްޒު ވެރިކަމާއި ހަވާލުވިއިރު، ރާއްޖެއަށް ދިމާވެފައި އޮތް މާލީ ދަތި ޙާލަތު ޢަބްދުއްރަޙީމް ފާހަގަކުރެއްވިއެވެ.

ހަމައެއާއެކު އެމްޑީޕީގެ މެޖޯރިޓީ އޮތް މަޖިލީހުން މިދިޔަ އަހަރަށް ކަނޑައެޅި ބަޖެޓަކީވެސް ރައީސް މުޢިއްޒުގެ ވަޢުދުތައް ފުއްދުމަށް އެކަށީގެންވާ ބަޖެޓެއް ނޫންކަން ޢަބްދުއްރަޙީމް ފާހަގަކުރެއްވިއެވެ. އެހެންނަމަވެސް ދިމާވި ދަތިތަކާއެކުވެސް ރައީސް މުޢިއްޒު ހޯއްދެވި އެންމެ ބޮޑު ކާމިޔާބީއަކީ ޤައުމު ބަނގުރޫޓުވިޔަނުދީ، މެދުކެނޑުމެއްނެތި އަސާސީ ޚިދުމަތްތައް ރައްޔިތުންނަށް ފޯރުކޮށްދިނުންކަމަށް މަޖިލީހުގެ ރައީސް ފާހަގަކުރެއްވިއެވެ.

މަޖިލީހުގެ ރައީސް ވަނީ ދިމާވި ދަތިތަކާއެކުވެސް މިދިޔަ އަހަރުގެ ތެރޭގައި ރައީސް މުޢިއްޒުގެ ސަރުކާރުން ހޯއްދެވި ބައެއް ކާމިޔާބީތައް ފާހަގަކުރައްވާފައެވެ.

"ރައީސް މުޢިއްޒު ވެރިކަމާ ހަވާލުވިއިރު ހުރިހާ ކަމެއް އޮތުން ފާލުން ނައްޓާފައި. ހަމެޖެހުމާއި އިޖުތިމާޢީ އަދާލަތާއި އިންސާފު ޤާއިމްކުރުމާއި މާލީ ހާލަތު އޮތީ ފެއިލްވެފައި. އެހެން އޮތްވާ 1 އަހަރު ދުވަހުގެ ތެރޭގައި ވަރަށް ބޮޑެތި ކާމިޔާބީތަކެއް ރައީސް މުޢިއްޒުގެ ސަރުކާރުން ހޯއްދަވައިފި. އިޤުތިޞާދު ފުޅާކުރުމަށް ޑިވެލޮޕްމެންޓް ބޭންކެއް އުފައްދަވައިފި. ޗައިނާއާއި ރާއްޖެއާ ދެމެދު މިނިވަން ވިޔަފާރީގެ އެއްބަސްވުމެއްގައި ސޮއިކޮށްފި. މިހާތަނަށް ރާއްޖެއަށް ފަތުރުވެރިން ނާންނަ މިންވަރަށް 2 މިލިޔަން ފަތުރުވެރިން ޒިޔާރަތްކޮށްފި" ޢަބްދުއްރަޙީމް ވިދާޅުވިއެވެ.

މީގެއިތުރުން ޢަބްދުއްރަޙީމް ވަނީ ރައީސް މުޢިއްޒުގެ ސަރުކާރުން ކުރިއަށް އޮތް އަހަރުތަކުގައި ޙާސިލުކުރަން ބޭނުންވާ ނަތީޖާއާ ބެހޭގޮތުންވެސް ވާހަކަފުޅު ދައްކަވާފައެވެ. އެގޮތުން މީގެ ކުރިން ދިވެހިންގެ މެދުގައި އޮތް ސުލްޙަވެރިކަމާއި އަމާންކަމާއި އެކުވެރިކަން އަލުން އިޢާދަކުރުމަށް ރައީސް މުޢިއްޒު ޚާއްސަ އިސްކަމެއް ދެއްވާކަމަށް ޢަބްދުއްރަޙީމް ވިދާޅުވިއެވެ. އަދި ރާއްޖެއަށް ދިމާވެފައިވާ އިޖުތިމާޢީ ބޮޑެތި މައްސަލަތައް ޙައްލުކުރެއްވުމަށްވެސް ގިނަ މަސައްކަތްތަކެއް ސަރުކާރުން ކުރައްވަމުން ގެންދަވާކަން ޢަބްދުއްރަޙީމް ފާހަގަކުރެއްވިއެވެ. އެހެންކަމުން ރައީސް މުޢިއްޒުގެ 5 އަހަރުގެ ތެރޭގައި އަމާން، ރައްކާތެރި އަދި ތަރައްޤީވެފައި އޮތް ދިވެހީންގެ ރާއްޖެއެއް އެމަނިކުފާނު ހޯއްދަވާދެއްވާނެކަމަށް ޢަބްދުއްރަޙީމް ވިދާޅުވިއެވެ.

"ތަނެއްގައި ހަމަޖެހުމެއް ނެތިއްޔާ ކުރިއެރުމެއް ނުހޯދޭނެ. އެގޮތުން މަސްތުވާތަކެއްޗާ ދުރަށް ޒުވާނުން ގެންދިއުމަކީ ވަރަށް މުހިންމު ކަމެއް. ގޭންގު ކުށްތައް ހުއްޓުވުން ވަރަށް މުހިންމު. އެ ދެ ކަން ކުރުމަށް ޤާނޫނުތަކަށް ގެންނަންޖެހޭ އިސްލާޙުތައް ފާސްކުރުމަށް މިހާރު ވަނީ މަޖިލީހަށް ހުށައަޅާފައި. ހަމައެހެންމެ އެމަނިކުފާނު ވަނީ ދުންފަތުގެ އިސްތިޢުމާލުކުރުމުން ދިވެހި މުޖުތަމަޢު ދުރުކުރުމަށްވެސް މުހިންމު ފިޔަވަޅުތަކެއް އަޅުއްވާފައި" ޢަބްދުއްރަޙީމް ވިދާޅުވިއެވެ.

މަޖިލީހުގެ ރައީސް ޢަބްދުއްރަޙީމް ވިދާޅުވީ ރައީސް މުޢިއްޒުގެ ސަރުކާރުން ޙާސިލުކުރަން ބޭނުންވާ ނަތީޖާ ޙާސިލުކުރުމުގައި ރައްޔިތުންގެ މަޖިލީހުން ދޭންޖެހޭ ފުރިހަމަ އެއްބާރުލުމާއި އެހީތެރިކަން ސަރުކާރަށް ދެއްވާނެ ކަމަށެވެ.