ދިވެހި ކަލަންޑަރާއި ނަމާދު ގަޑިތައް ތަރުތީބުކުރުމުގެ މަސައްކަތްކުރެއްވި ހިސާބު ޢިލްމުވެރިޔާ ޢަލީ މާހިރު ނިޔާވެއްޖެ

ހިސާބު ޢިލްމާ ގުޅުންހުރި ދާއިރާތަކުން ރާއްޖެއަށް ގިނަ ޚިދުމަތްތަކެއް ކުރެއްވި ޢަލީ މާހިރު ނިޔާވެއްޖެއެވެ.

ޢަލީ މާހިރު މަތީ ތަޢުލީމު ޙާސިލުކުރެއްވީ މިޞްރުގެ އަލްއަޒްހަރު ޔުނިވަރސިޓީން، އިންޖިނިއަރިންގެ ދާއިރާއިންނެވެ.
ގިނަ ބަޔަކު މާހިރު ދަންނަނީ މޮޅު ހިސާބު ޢިލްމުވެރިއެއްގެ ގޮތުގައެވެ. ހިސާބު ޢިލްމާއި ފަލަކީ ޢިލްމާ ގުޅުންހުރި މުހިންމު މަސައްކަތްތައް ކުރެއްވުމުގެ އިތުރުން، ހިސާބު ޢިލްމު އުނގަންނައި ދިނުމަކީވެސް އަމިއްލަ ޝަޢުގުގައި އަލީ މާހިރު ކުރެއްވި ވަރަށް މުހިންމު މަސައްކަތްޕުޅެކެވެ.

ޤައުމީ ގޮތުން ކުރެއްވި ބައެއް މުހިންމު ޚިދުމަތްތަކުގެތެރޭގައި ދިވެހި ކަލަންޑަރު ހެދުމުގެ މަސައްކަތްތަކާއި، ދިވެހިރާއްޖެއަށް ނަމާދު ގަޑިތައް ތަރުތީބުކުރެއްވުންފަދަ ގިނަ މަސައްކަތްތަކެއް ކުރެއްވިއެވެ. އެފަދަ ގިނަ މަސައްކަތްތައް ކުރައްވާފައިވަނީ ހިސާބު ޢިލްމަތް އޮތް ލޯތްބާއި ޝަޢުގުވެރިކަމުގެތެރެއިންނެވެ.

ޢަލީ މާހިރަކީ ސަރުކާރުގެ އިސް ގިނަ މަޤާމުތަކެއްވެސް ފުރުއްވި ބޭފުޅެކެވެ. އެގޮތުން، ފަޑިޔާރުގޭގެ ނުވަތަ މަޙަކަމަތުއްޝަރުޢިއްޔާގެ އިސްމަޤާމުތަކެއްވެސް އަދާކުރެއްވިއެވެ. އަދި ޝަރީޢަތް ކުރެއްވުންވެސް ހިމެނެއެވެ. އެދާއިރާގެ އިތުރުން ސަރުކާރު ބޮޑުއިސްޓޯރުގެ މެނޭޖަރުކަމުގެ މަޤާމާއި ޤައުމީ ކުތުބުޚާނާގެ ވެރިޔާކަމުގެ މަޤާމުވެސް މާހިރު އަދާކުރެއްވިއެވެ.

ޢަލީ މާހިރުގެ ގާތް މީހުން އެބޭފުޅާ ސިފަކުރައްވަނީ ވަރަށް މަޑުމައިތިރި، ހިތްހެޔޮ ޚުލްގުހެޔޮ ބޭފުޅެއްގެ ގޮތުގައެވެ.

ޢަލީ މާހިރު ކުރައްވަމުން ގެންދެވި މަސައްކަތްތަކާއި ދުރަށް ޖެހިވަދައިގަތީ އާލަސްކަންފުޅުގެ ސަބަބުންނެވެ. ނިޔާވިއިރު އުމުރުފުޅަކީ 90 އަހަރެވެ.