ބާސެލޯނާގެ ފޯވާޑް ޑެނީ އޮލްމޯ ރަޖިސްޓަރީ ކުރުމަށް އެ ކުލަބުން ދެވަނަ ފަހަރަށް ކުރި މަސައްކަތްވެސް ނާކާމިޔާބުވެއްޖެއެވެ.
ޖަރުމަނުގެ ލައިޕްޒީގުން 65 މިލިއަން ޑޮލަރަށް މިދިޔަ އޮގަސްޓް މަހު ބާސެލޯނާ އިން އޮލްމޯ ގަނެފައިވާއިރު އޭނާ ރަޖިސްޓްރީ ކުރުމަށް ލަލީގާއިން ވަނީ ފުރަތަމަވެސް ދެކޮޅު ހަދާފަ އެވެ. އެގޮތުން އޭނާ އާއިއެކު އެކްލަބުން ހަދާފައިވާ ހަ އަހަރު ދުވަހުގެ އެއްބަސްވުމުގެ ތެރޭގައި އޭނާއަށް މުސާރަ ދިނުމުގައި އެ ކްލަބުގެ މާލީ ހާލަތު ތަން ނުދޭކަމަށް ބުނެ އޮލްމޯ ރަޖިސްޓްރީ ކޮށްދީފައިވަނީ މި އަހަރުގެ ނިޔަލަށެވެ.
ބާސެލޯނާ އަށް މި މައްސަލަ ކުރިމަތިވުމުން އެ ކްލަބުން ވަނީ މި މައްސަލައަށް ވަގުތި ހައްލެއް ހޯދުމުގެ ގޮތުން ކޯޓަށް މައްސަލަ ހުށައަޅާ މި ސީޒަނުގެ ނިޔަލަށް އޮލްމޯ ރަޖިސްޓްރީ ކޮށްދިނުމުގެ އަމުރަކަށް އެދިފައެވެ. ނަމަވެސް އެ މައްސަލަ ބާސެލޯނާ އާއި ދެކޮޅަށް ވަނީ ނިންމާފަ އެވެ.
އެހެންކަމުން ބާސެލޯނާ އިން މިމައްސަލަ މަތީ ކޯޓުގައި އިސްތިއުނާފު ކުރި ނަމަވެސް އިއްޔެ އެ މައްސަލަވެސް ވަނީ ބާސެލޯނާ އާއި ދެކޮޅަށް ނިންމާފަ އެވެ.
ބާސެލޯނާއަށް ލަލީގާއިން ދީފައިވާ ވަގުތީ ހުއްދައިގެ ދަށުން މި އަހަރުގެ ނިޔަލަށް އޮލްމޯ އަށް އެ ކްލަބަށް ކުޅެވުނު ނަމަވެސް ރަޖިސްޓްރީގެ މައްސަލަ ހައްލު ނުކުރެވޭނަމަ ޖެނުއަރީ މަހުގެ އެކަކުން ފެށިގެން އޭނާއަށް ބާސެލޯނާއަށް ނުކުޅެވޭނެ އެވެ.
މިއަދުގެ ނިޔަލަށް ބާސެލޯނާއަށް މިކަމަށް ހައްލެއް ނުލިބިއްޖެނަމަ އޮލްމޯއަށް ފްރީ އެޖެންޓެއްގެ ގޮތުގައި ބޭނުން ކްލަބަކަށް ބަދަލުވުމުގެ ފުރުސަތު އޭނާއަށް ލިބިގެންދާނެ އެވެ.
މީގެ ކުރިން ބާސެލޯނާ އިން ވަނީ އޮލްމޯ ރަޖިސްޓަރީ ކުރުމުގައި ހުރި ގޮންޖެހުންތައް ހައްލު ކުރުމުގެ ގޮތުގައި އެ ކްލަބުގެ ވީއައިޕީ ބޮކްސް ވިއްކާލުމަށްވެސް ނިންމާފަ އެވެ. އަދި ވީއައިޕީ ބޮކްސް ވިއްކާލައިގެން އެ ކްލަބަށް އާމްދަނީގެ ގޮތިގައި 100 މިލިއަން ޔޫރޯ ލިބޭނެކަމަށް ލަފާކޮށްފައިވާއިރު އެކަމަށްވެސް ލަލީގާގެ ހުއްދަ ހޯދަން ޖެހެއެވެ.