އެކުވެރިކަމުގެ މެޗެއްގައި މިއަދު އިންޑިޔާގެ ގައުމީ އަންހެން ފުޓްބޯޅަ ޓީމުން ރާއްޖެ ކޮޅަށް 14 ލަނޑު ޖަހައި އަހަރު ނިންމާލައިފިއެވެ.
މި ނަތީޖާ އިންޑިޔާގެ މީޑިއާތަކުން ސިފަކޮށްފައިވަނީ ލަނޑު ޖެހުމުގެ ފެސްޓިވަލެއްގެ ގޮތުގަ އެވެ. އަދި މިއީ 2024 ވަނަ އަހަރު ނިންމާލަން ހޯދުނު ވަރަށް ރަނގަޅު ނަތީޖާއެއް ކަމަށެވެ. މެޗުގެ އެއް ކޮމެންޓޭޓަރު ބުނީ ދިވެހި ޓީމުގެ ކޯޗު މުހައްމަދު ނިޒާމަށް ޓީމު ހަމައަކަށް އަޅުވައި ބައިކޮޅަށް ވަންނަ ބޯޅަތައް ހުއްޓުވޭނެ ގޮތެއް ހޯދަންޖެހިފައިވާ ކަމަށެވެ.
ބެންގަލޫރުގައި ކުޅުނު މެޗުގެ ފުރަތަމަ ހަތް މިނިޓްގައިތެރޭގައި އިންޑިޔާއިން ދެ ލަނޑު ޖެއްސެވެ. މި ދެ ލަނޑު ވެސް ޖެހީ ޕިޔާރީ ޒާޒާ އެވެ. ތިން ވަނަ ލަނޑު 11 ވަނަ މިނިޓްގައި ޖެހީ ގައުމީ ޓީމަށް އަލަށް ކުޅުނު ލެންޑާ ކޮމް އެވެ. އޭގެ ހަތަރު މިނިޓް ފަހުން ޕިޔާރީ ވަނީ ލަނޑެއްޖަހައި ހެޓްރިކް ހަދައިފަ އެވެ.
މެޗުގެ 16 ވަނަ މިނިޓްގައި އިންޑިޔާގެ ފަސް ވަނަ ލަނޑު ޖެހީ ނެހާ އެވެ. އަދި 20 ވަނަ މިނިޓާއި 28 ވަނަ މިނިޓްގައި ލަނޑު ޖަހައިގެން ލެންޑާ ވެސް ހެޓްރިކް ހެދި އެވެ. މެޗުގެ މޮޅު ކުޅުންތެރިއަކީ ވެސް އޭނާ އެވެ.
ކުޅަދުރުގެ އުނދަގުލާހެދި ފުރަތަމަ ހާފު ނިމުމުގެ ކުރިން ކުޑަވަގުތުކޮޅަކަށް މެދުކަނޑާލަން ޖެހުނު މެޗުގައި އެސިސްޓެންޓް ރެފްރީ ދަނޑުމައްޗަށް ވެއްޓި ފަރުވާދޭން ޖެހުނެވެ. މެޗު މެދަށް ހުއްޓިއިރު އިންޑިޔާއިން ވަނީ ނެހާ 44 ވަނަ މިނިޓްގައި ޖެހި ލަނޑާއެކު ރާއްޖެ ކޮޅަށް އަށް ލަނޑު ޖަހައިފަ އެވެ.
ދެ ވަނަ ހާފުގައި އިންޑިޔާއިން ލަނޑު ޖެހަން ފެށީ 51 ވަނަ މިނިޓްގައި ސަންގީތާ ބަސްފޯ ޖެހި ގޯލާއެކުގަ އެވެ. އަދި 52 ވަނަ މިނިޓްގައި ލެންޑާ އޭނާގެ ހަތަރު ވަނަ ގޯލު ޖެހި އެވެ. މެޗުގެ 11 ވަނަ ލަނޑު 54 ވަނަ މިނިޓްގައި ޖެހީ ރަންޖަނާ ޗާނޫ އެވެ. 12 ވަނަ ލަނޑު ޖެހީ 59 ވަނަ މިނިޓްގައި ކާޖޮލް ސޮއޫޒާ އެވެ. އޭގެ ތިން މިނިޓް ފަހުން ރިމްޕާ ހަލްޑާ 13 ވަނަ ޖަހައި މެޗުގެ ފަހު ލަނޑު ޖެހީ 66 ވަނަ މިނިޓްގައި އަނެއްކާ ވެސް ކާޖޮލް އެވެ.
މި މެޗުގައި އިންޑިޔާއިން 20 ޝޮޓް ރާއްޖޭގެ ގޯލަށް ފޮނުވާލިއިރު ރާއްޖެ އަށް އިންޑިޔާގެ ގޯލާ އަމާޒުކޮށް އެންމެ ބޯޅައެއް ވެސް ފޮނުވާލެވިފައިނުވެ އެވެ.
އިންޑިޔާގެ މީޑިއާތަކުން ބުނާ ގޮތުގައި މި މެޗުގައި މިހާވަރަށް ގޯލު ޖެހުމުން އިންޑިޔާއިން މެޗުގެ ފަހުބައި ކުޅުނީ މެޗު ވަރަށް ބޮޑަށް ލަސްކޮށްގެން ކަމަށެވެ. ސަބަބަކީ މި މެޗަށް ނުކުތްއިރު ވެސް ރާއްޖެގެ މައްޗަށް ގަދަވެގަންނާނީ އިންޑިޔާ ކަމަށް އެ ގައުމުން ގަބޫލުކުރުމެވެ.
އިންޑިޔާގެ ކޯޗު ޖޯހިމް އެލެގްޒެންޑަސަން މެޗުގެ ކުރިން ބުނީ ރާއްޖެ އެންމެ ފަހުން ކުޅުނު މެޗުތައް ބެލިއިރު އެއީ ގަދަ ޓީމެއްނޫން ކަމަށެވެ. މިހެންވެ މެޗަށް ގަދަވެގަންނާނީ ޒުވާން ކުޅުންތެރިން ހިމެނޭ އޭނާގެ ޓީމު ކަމަށެވެ. މި މެޗަށް އިންޑިޔާއިން އެކުލަވާލި 23 ކުޅުންތެރިންގެ ތެރެއިން 14 ކުޅުންތެރިންނަކީ 20 އަހަރުން ދަށުގެ ގައުމީ ޓީމުގެ ކުޅުންތެރިންނެވެ.
މި ނަތީޖާއާއެކު ރާއްޖޭގެ އަންހެން ފުޓްބޯޅަ އަށް ވެސް 2024 ވެގެންމިދިޔައީ ވަރަށް ނާކާމިޔާބު އަހަރަކަށެވެ. ދިވެހި ޓީމު އެންމެ ފަހުން ކުޅުނު މުބާރާތަކީ މި އަހަރު ފަހުކޮޅު ކުޅުނު ސާފް ޗެމްޕިއަންޝިޕެވެ. މި މުބާރާތުގައި ބޫޓާން އަތުން 13-0އިން ބަލިވެ، ރާއްޖެ ވަނީ ނޭޕާލް އަތުން 11-0އިން އަދި ލަންކާ އަތުން 1-0އިން ބަލިވެ ކެޓީ ގްރޫޕް ސްޓޭޖުންނެވެ.
