ޗައިނާ-ރާއްޖެ މިނިވަން ވިޔަފާރީގެ އެއްބަސްވުމަށް ބުދަ ދުވަހު އަމަލުކުރަން ފަށާނެ

ޗައިނާ-ރާއްޖެ މިނިވަން ވިޔަފާރީގެ އެއްބަސްވުމަށް ޖެނުއަރީމަހުގެ އެއްވަނަ ދުވަހު އަމަލުކުރަން ފަށާނެކަން އިޢުލާންކޮށްފިއެވެ.

މިނިވަން ވިޔަފާރީގެ އެއްބަސްވުމަށް ޖެނުއަރީމަހުގެ 1 ވަނަ ދުވަހު އަމަލުކުރަން ފަށާނެކަން އިޢުލާންކޮށްފައިވަނީ، ޗައިނާގެ މިނިސްޓަރ އޮފް ކޮމާސް ވަންގ ވެންޓާއޯ އަދި ރާއްޖޭގެ އިޤްތިޞާދީ ތަރައްޤީއާއި ވިޔަފާރިއާއި ބެހޭ ވަޒީރު މުޙައްމަދު ސައީދު ބައިވެރިވެވަޑައިގެންނެވި ހާއްސަ ރަސްމިއްޔާތެއްގައެވެ.

ޗައިނާގެ ކޮމާސް މިނިސްޓަރ އަދި އިސްވެރިން މި ރަސްމިއްޔާތުގައި ބައިވެރިވީ އޮންލައިންކޮށެވެ. މިނިވަން ވިޔަފާރީގެ އެއްބަސްވުމެއްގައި ޗައިނާއާއެކު ރާއްޖެއިން ސޮއިކުރީ 2014 ވަނަ އަހަރުއެވެ. އަދި އެ އެއްބަސްވުމަށް އަމަލުކުރުމަށް 2017 ވަނަ އަހަރު މަޖިލީހުން ރުހުން ލިބިފައިވާއިރު، 2018 ވަނަ އަހަރު ސަރުކާރު ބަދަލުވުމާއެކު އެ އެއްބަސްވުމަށް އަމަލުކުރުން އޮތީ މަޑުޖެހިފައެވެ. ނަމަވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާއި ހަވާލުވެވަޑައިގަތުމަށްފަހު މި އެއްބަސްވުމަށް އަމަލުކުރަން ފެށުމަށްކުރަންޖެހޭ މަސައްކަތްތައް ވަނީ ފަށްޓަވާފައެވެ.

ޖަނަވަރީ މަހުގެ 1 ވަނަ ދުވަހުން ފެށިގެން ޗައިނާ-ރާއްޖެ މިނިވަން ވިޔަފާރީގެ އެއްބަސްވުމަށް އަމަލުކުރަން ފަށާއިރު މިއީ ރާއްޖެއަށް ގިނަ ފައިދާތަކެއް ކުރާނެ އެއްބަސްވުމަކަށް ވާނެކަމަށް ސަރުކާރުން ވިދާޅުވެއެވެ.

އިޤްތިސާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސައީދު ވިދާޅުވީ މި އެއްބަސްވުމުގެ ސަބަބުން ޗައިނާއިން ރާއްޖެއަށް އެތެރެކުރާ މުދަލުގެ އަގު ހެޔޮވެ، އެޤައުމުގައި ހުރި ވިޔަފާރީގެ ފުރުސަތުތަކުގެ ބޭނުން ހިފުމަށް ދިވެހި ވިޔަފާރިވެރިންނަށް ފަހިވެގެންދާނެކަމަށެވެ. އަދި ކުރިމަގުގައި ވިޔަފާރީގެ ގިނަ ފުރުސަތުތެއް ދިވަހިންނަށް ލިބިގެންދާނެކަމަށް ސައީދު ވިދާޅުވިއެވެ.

"ރާއްޖޭގެ ވިޔަފާރީގެ ތާރީޙުގައިވެސް ވިޔަފާރީގެ ދާއިރާއިން ކުރިން ނުލިބޭފަދަ ކުރިއެރުންތައް ހޯދުމުގެ ފުރުސަތު މިހާރު ލިބިގެން މިދަނީ، ދުނިޔޭގެ އެންމެ ބޮޑު މާރކެޓާއި އެކު،" ވަޒީރު ސައީދު ވިދާޅުވިއެވެ.

ޗައިނާ ރާއްޖެ މިނިވަން ވިޔަފާރީގެ އެއްބަސްވުމުގެ ދަށުން ފަންނީ ދާއިރާގައި މަސައްކަތްކުރާ މީހުންނަށް މިސާލަކަށް ލޯޗަރުން، އާކިޓެކްޓުން، ސިއްހީ ޚިދުމަތްތެރިން އަދި މިނޫންވެސް ގިނަ ދާއިރާތަކުގައި މަސައްކަތްކުރާ ދިވެހިންނަށް ޗައިނާގެ މާކެޓަށް ޚިދުމަތް ފުޅާކުރުމުގެ ފުރުޞަތު ލިބިގެންދާނެއެވެ. އަދި އަމިއްލަ މަސައްކަތްކުރާ ފަރާތްތަކުގެ އުފެއްދުންތައް ޗައިނާ މާކެޓްއަށް އެކްސްޕޯޓް ކުރުމުގެ ފުރުސަތު ލިބި ވަޒީފާގެ އިތުރު ފުރުސަތުތައް އިތުރުވެ ރާއްޖޭގެ އިޤްތިޞާދު އިތުރަށް ކުރިއަރައިގެންދާނެކަމަށް ސަރުކާރުން ވިދާޅުވެއެވެ.

މިނިވަން ވިޔަފާރީގެ އެއްބަސްވުމަށް އަމަލުކުރަން ފެށުން އިޢުލާންކުރުމަށް ބޭއްވި ރަސްމިއްޔާތުގައި ޗައިނާގެ ކޮމާސް މިނިސްޓަރ ވަންގ ވެންޓާއޯ ވިދާޅުވީ މި އެއްބަސްވުމާއި އެކު ދެޤައުމުގެ ގުޅުން އިތުރަށް ބަދަހިވެގެންދާނެ ކަމަށެވެ.

އަދި މި އެއްބަސްވުމަށް އަމަލުކުރަން ފެށުމަށްޓަކައި ދެޤައުމުންވެސް ގިނަ ކަންތައްތަކެއް ފުރިހަމަކޮށްފައިވާކަންވެސް އޭނާ ފާހަގަކުރެއްވިއެވެ.
"މި އެއްބަސްވުމުގެ ދަށުން ރާއްޖެއިން ޗައިނާއަށް މަސް އެކްސްޕޯޓުކުރުމުގެ ފުރުސަތު ފަހިވެގެންދާނެ، އަދި މި ބާވްތަތައް ޒީރޯ ޓެރިފްގައި ޗައިނާއަށް އެކްސްޕޯޓުކުރެވޭނެ، ގުޅުންތައް ބަދަހިވެ ވަރުގަދަވެގެންދާނެކަމަށް ދެކެން،" ވެންޓާއޯ ވިދާޅުވިއެވެ.

ޗައިނާ މޯލްޑިވްސް ފްރީ ޓްރޭޑް އެއްބަސްވުމުގެ ސަބަބުން އާންމު ރައްޔިތުންނަށްވެސް ގިނަ ފައިދާތަކެއް ކުރާނެއެވެ. އެގޮތުން ޗައިނާއިން އެތެރެކޮށް ވިއްކާ މުދަލުގެ ތެރެއިން އާންމު ދިރިއުޅުމަށް ބޭނުންކުރާ ތަކެތީގެ އަގު ހެޔޮވެ މާކެޓްގައި ގިނަ ބާވަތްތައް ލިބެން ހުންނާނެއެވެ.

ސަރުކާރުން ވިދާޅުވެފައިވާ ގޮތުގައި މިހާރުވެސް ދިވެހިރާއްޖެއާއި ޗައިނާއާ ދެމެދު 700 މިލިއަން ޑޮލަރުގެ ވިޔަފާރި ދަނީ ކުރެވެމުންނެވެ. އަދި މިނިވަން ވިޔަފާރީގެ އެއްބަސްވުމަށް އަމަލު ކުރަން ފެށުމާއެކު މި އަދަދު 1 ބިލިޔަން ޑޮލަރަށް އަރާނެ ސަރުކާރުން ލަފާކުރައްވައެވެ.