އެމްޑަބްލިޔުއެސްސީގެ ޚިދުމަަތްތައް އޮންލައިންކޮށްދޭނެ ޚާއްޞަ ޕޯޓަލެއް

މާލޭ ވޯޓާރ އެންޑް ސްވަރޭޖު ކޮމްޕެނީ، އެމްޑަބްލިޔުއެސްސީގެ ޚިދުމަތްތައް އޮންލައިންކޮށް ފޯރުކޮށްދޭނެ ޚާއްޞަ ޕޯޓަލެއް ތަޢާރަފްކޮށްފިއެވެ. އެމްޑަބްލިޔުއެސްސީގެ އެކި ޚިދުމަތަށް އެދި ހުށައެޅުމާއި، އެޕްލިކޭޝަންތައް ކުރިޔަށްދާ މަރުޙަލާތައް ފަސޭހަކަމާއެކު ބަލާލުންފަދަ ޚިދުމަތްތައް މި ޕޯޓަލުން ލިބޭނެކަމަށް އެކުންފުނިން ވިދާޅުވިއެވެ.

އޮންލައިން ޕޯޓަލް އިފްތިތާޙްކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން އެމްޑަބްލިޔުއެސްސީގެ މެނޭޖިން ޑިރެކްޓަރ ޢަބްދުލް މަތީން މުޙައްމަދު ވިދާޅުވީ އެކުންފުނިން މަސައްކަތްކުރަމުންދަނީ ޢާންމު ރައްޔިތުންނަށް ފޯރުކޮށްދެވޭ ޚިދުމަތްތަކުގެ ފެންވަރު ރަނގަޅުކޮށް، ވީހާވެސް އަވަހަށް ޚިދުމަތްތައް ދިނުމަށްކަމަށެވެ. އެހެންކަމުން އަލަށް ތަޢާރަފްކުރި ޕޯޓަލަކީ ޚިދުމަތްތައް އަވަސްކުރުމުގެ ގޮތުން ފަރުމާކޮށްފައިވާ ޕޯޓަލެއްކަމަށް މަތީން ވިދާޅުވިއެވެ.

"މި އަހަރުގެ ތެރޭގައި 23،000 ކަސްޓަމަރުން އެބަވޭ ކައުންޓަރުން ޚިދުމަތް ހޯދާފައި. 80،000 ކަސްޓަމަރުން ގުޅާފައެބަވޭ. ނަމަވެސް މި ކޯލުތަކާއި މިގޮތަށް ދެވޭ ޚިދުމަތްތައް ޕޯޓަލްގެ ތެރެއިން ވަރަށް ބޮޑަށް މަދުކުރެވޭނެ." މަތީން ވިދާޅުވިއެވެ.

އެމްޑަބްލިޔުއެސްސީގެ އޮންލައިން ޕޯޓަލް އިފްތިތާޙްކޮށްދެއްވީ އެކުންފުނީގެ މެނޭޖިން ޑިރެކްޓަރ ޢަބްދުލް މަތީން މުޙައްމަދާއި ޗެއަރޕާރސަން ޝަމްޙޫޒާ އަޙުމަދެވެ.

އެމްޑަބްލިޔުއެސްސީގެ ޕޯޓަލްގެ ޚިދުމަތް ލިބޭނީ އީ-ފާސް ނިޒާމު ބޭނުންކޮށްގެންނެވެ. އޮންލައިން ޕޯޓަލް މެދުވެރިކޮށް، ކަސްޓަމަރުން ހުޅުވާފައިވާ ހުރިހާ އެކައުންޓެއްގެ މަޢުލޫމާތު ބެލޭނެކަމަށާއި، އެއް އެކައުންޓެއް މެދުވެރިކޮށް އެއް ބިލަށްވުރެ ގިނަ ބިލުތަކަށް އެއްފަހަރާ ފައިސާ ދެއްކުމުގެ މަގު ފަހިވާނެކަމަށްވެސް އެމްޑަބްލިޔުއެސްސީން ވިދާޅުވިއެވެ.

މީގެ އިތުރުން ސްމާޓް މީޓަރު ހަރުކޮށްފައިވާ ގޭބިސީތަކުގެ ކަސްޓަމަރުންނަށް ވަކިވަކި މީޓަރުތަކުން ފެން ބޭނުން ކުރެވިފައިވާ މިންވަރުގެ ތަފުސީލާއި، ފެން މީޓަރުގެ ރީޑިންގެ އިތުރުން ފެން ބިލުތަކުގެ ތަފުސީލުތައްވެސް ޕޯޓަލް މެދުވެރިކޮށް ބެލޭނެކަމަށް އެމްޑަބްލިޔުއެސްސީން ވިދާޅުވިއެވެ.