ތިމަރަފުށީ މާރާމާރީ: ހައްޔަރުކުރި 5 މީހުން ބަންދަށް

ތ. ތިމަރަފުށީގެ ގެއަކަށް ވަދެ މާރާމާރީއެއް ހިންގި މައްސަލާގައި ހައްޔަރުކުރި 5 މީހުން ބަންދުކުރަން ކްރިމިނަލް ކޯޓުން އަމުރުކުރައްވައިފިއެވެ.

ތ. ތިމަރަފުށީ ގެއަކަށް 5 މީހުން ވަދެ މާރާމާރީ ހިންގި މައްސަލަ ފުލުހުންނަށް ރިޕޯޓުކޮށްފައިވަނީ އިއްޔެ މެންދުރުފަހު 1:27 ހާއިރުކަމަށެވެ. މި މައްސަލައިގައި ހައްޔަރު ކޮށްފައިވަނީ އެ ރަށު ޖަހާމުގުރިގެ، އަހުމަދު އަމީން (36އ)، އާއި ސަލްވާ، އަހްމަދު ޝަހުދީ ( 38އ)، އާއި ހިރި، ޢާޞް އިބްރާހިމް (32އ)، އާއި ގުލްބަކާވިލާ، ޢަބްދުﷲ އަޝްރަފް (39އ) ގެ އިރުތުން ވިލިމާލޭ ވަވަތް، މުހަންމަދު ރައޫފު (54އ)އެވެ. މި ފަސް މީހުންވެސް ހައްޔަރު ކޮށްފައިވަނީ ކޯޓު އަމުރެއްގެ ދަށުންނެވެ.

ފުލުހުން ވިދާޅުވީ މި މީހުންގެ ތެރެއިން ޢަބްދުﷲ އަޝްރަފާއި ޢާޞް އިބްރާހިމާއި މުހަންމަދު ރައޫފުގެ ބަންދަށް ކޯޓުން 10 ދުވަސް އިތުރުކޮށް ދެއްވާފައިވާކަމަށެވެ. އަދި މި މައްސަލާގައި ހައްޔަރުކުރި މުހައްމަދު އަމީން 7 ދުވަހަށް، އަދި އަހުމަދު ޝަހުދީގެ ބަންދަށް 5 ދުވަސް ކޯޓުން އިތުރުކޮށް ދެއްވާފައިވާކަމަށެވެ.

މި މައްސަލަ ދިވެހި ފުލުހުންގެ ޚިދުމަތުން އަންނަނީ އިތުރަށް ތަޙުޤީޤުކުރަމުންނެވެ.