ތެވެލި ކޮންފަރެންސްގެ އެއް ދުވަސް ދަރިވަރުންގެ ދިރާސާތަކަށް ޚާއްސަކުރަނީ

ޤައުމީ ޔުނިވަރސިޓީން އަންނަ އަހަރު ބާއްވާ "ތެވެލި ބައިނަލްއަގުވާމީ ކޮންފަރެންސަށް" އެބްސްޓްރެކްޓް ހުށަހެޅުމުގެ ފުރުޞަތު ހުޅުވާލައިފިއެވެ.

ތެވެލި ކޮންފަރެންސްއަކީ ޤައުމީ ޔުނިވަރސިޓީން 2017ވަނަ އަހަރުން ފެށިގެން ކޮންމެ އަހަރަކުވެސް ބާއްވަމުން އަންނަ ބައިނަލްއަޤްވާމީ ކޮންފަރެންސްއެކެވެ.

ތެވެލި ކޮންފަރެންސްގެ އަންނަ އަހަރުގެ ތީމަކީ "އިވޯލްވިން ޕެރެޑައިމްސް: މާޖިން ރިސާޗް، އެވިޑެންސް، އެންޑް ޕްރެކްޓިސް"އެވެ. މި ކޮންފަރެންސް އަންނަ އަހަރު ބޭއްވުމަށް ހަމަޖެހިފައިވަނީ އޯގަސްޓްމަހުގެ 18 އިން 20 ވަނަ ދުވަހަށެވެ.

އެހެން އަހަރުތަކާ ޚިލާފަށް، އަންނަ އަހަރު އެމްއެންޔޫގައި ބެޗެލާސް ޑިގްރީ ކިޔަވާ ހުރިހާ ދަރިވަރުންނަށް ޚާއްސަކޮށްގެން ދަރިވަރުންގެ މެދުގައި ދިރާސާކޮށް، ސައިންޓިފިކް ޕޭޕަރު ލިޔުމާއި ސައިންޓިފިކް ޕްލްޓްފޯމްތަކުގައި ދިރާސާގެ އަލީގައި ހޯދާ ހޯދުންތައް ހުށަހެޅުމުގެ ގާބިލްކަން އިތުރު ކުރުމަށް "ސްޓޫޑަންޓް ރިސާޗް ސިމްޕޯޒިއަމް" އެއް ބޭއްވުމަށްވެސް ހަމަޖެހިފައިވާކަމަށް އެމްއެންޔޫއިން ވިދާޅުވިއެވެ.

އެ ސިމްޕޯޒިއަމް އޮންނާނީ ކޮންފަރެންސްގެ ފުރަތަމަ ދުވަސް ކަމުގައިވާ، އޮގަސްޓު މަހުގެ 18 ވަނަ ދުވަހުގައެވެ. އަދި ކޮންފަރެންސްގެ ކީނޯޓް ސްޕީކަރުން ވާހަކަދައްކަވާނީ 21ވަނަ ދުވަހުގައެވެ.

އެމްއެންޔޫގެ ޑީން އޮފް ސްޓޫޑެންޑް ލީލާ އަޙުމަދު ވިދާޅުވީ، ޔުނިވަރސިޓީގެ އެންމެ މުހިންމު ބޭނުމަކީ ވަޒީފާއަށް ދަރިވަރުން ތައްޔާރު ކުރުން އެކަނި ނޫންކަމަށެވެ. އަދި ޔުނިވަރސިޓީން ތައުލީމް ނިންމާއިރު ކޮންމެ ދަރިވަރެއްގެ ކިބައިގައި ވަކި ކޮލިޓީއެއް ހުންނަން ޖެހޭ ކަމަށާއި އެކަން ކުރުމަށްޓަކައި މިފަދަ ޕްލެޓް ފޯމެއް ވަރަށް މުހިންމު ކަމަށް ލީލާ ވިދާޅުވިއެވެ.

ލީލާ ވިދާޅުވީ ދަރިވަރުންގެ ސިމްޕޯޒިއަމް ރާވާ އިންތިޒާމް ކުރާނީ ވެސް ދަރިވަރުން ކަމަށާއި ހުރިހާ ފެކަލްޓީއަކާއި ދަރިވަރުން އެކީގައި ހަރަކާތްތެރިވާނެ އަހަރަކަށް އަންނަ އަހަރު ވާނެ ކަމަށެވެ.

" ރިސަރޗް ކަލްޗަރއެއް ޔުނިވަރސިޓީގެ ތެރޭގައި ޤާއިމް ކުރުމަށް މަސައްކަތް ކުރަމުންދާއިރު، މާނައަކީ ސްޓާފުންނާއި ދަރިވަރުން ވެސް އެއްވަރަކަށް އޭގެ ތެރޭގައި އުޅޭނެއޭ. އަންޑަގުރެޖުއޭޓުން ފެށީގެން ޕީއެޗްޑީއާ ހަމައަށް ކިޔަވާ ހުރިހާ ދަރިވަރުންނަކީ ދިރާސާކުރާ ބަޔަކަށް ހެދުން ބޭނުންވަނީ"އެމްއެންޔޫގެ ޑީން އޮފް ސްޓޫޑެންޑް ލީލާ އަޙްމަދު ވިދާޅުވިއެވެ.

ތެވެލި ކޮންފަރެންސްގައި އެކި ދާއިރާތަކުން އިނގިރޭސި، ދިވެހި އަދި އަރަބި ބަހުން ޕޭޕަރު ހުށަހެޅޭނެއެވެ. އޭގެ ތެރެއިން 'އައުޓް ސްޓޭޑިން ޕޭޕާ' އާއި "އާލީ ކެރިއާ ރިސާޗާ" އެވޯޑު ހޮވާނެއެވެ.

ކޮންފަރެންސްގެ މުހިއްމު ސުންގަޑިތައް

• އެބްސްޓްރެކްޓް ހުށަހެޅުމުގެ އެންމެ ފަހު ތާރީޚު: 31 މޭ 2025
• ފުލް ޕޭޕަ ހުށަހެޅުމުގެ އެންމެ ފަހު ތާރީޚު: 30 ޖޫން 2025
• ޕްރެޒެންޓޭޝަންތައް ފޮނުވުމުގެ އެންމެ ފަހު ތާރީޚު: 31 ޖުލައި 2025
• ޕޯސްޓް ކޮންފަރެންސް ސެޝަންތަކުގައި ބައިވެރިވުމަށް ރެޖިސްޓާ ވުމަށް ހުޅުވާލުން: 5 ޖުލައި 2025
• ޕޯސްޓް ކޮންފަރެންސްގައި ބައިވެރިވުމަށް ރެޖިސްޓާ ވުމުގެ އެންމެ ފަހު ތާރީޚު: 5 އޮގަސްޓް 2025

ޤައުމީ ޔުނިވަރސިޓީން ވިދާޅުވީ ތެވެލި ކޮންފަރެންސްގެ ބޭނުމަކީ އައު އިލްމީ ހޯދުންތަކުގެ 'އަލިކަން' ނުވަތަ 'ތެވެލި' ރާއްޖޭގެ އިތުރުން މި ސަރަހައްދުގެ ގައުމުތަކަށާއި މުޅި ދުނިޔެއަށް ފެތުރުންކަމަށެވެ. މި ކޮންފަރެންސްގެ މައިގަނޑު މަގުސަދަކީ ދިރާސާ ކުރާ ފަރާތްތަކަށާއި ދިރާސާގެ އަލީގައި ހޯދާ ހޯދުންތައް ހުށަހެޅުމަށް ފުރުސަތު ދިނުން އެފަދަ ސަގާފަތެއް ދަރިވަރުންގެ މެދުގައި އަށަގެންނެވުމެވެ. އަދި ދިރާސާ ކުރާ ފަރާތްތަކާއި ބޭރުގެ ފުންނާބު އުސް ދިރާސާ ވެރިންނާ އެއް ޕްލެޓްފޯމަކަށް ގެނެސް ގުޅުވައިދީ ދިރާސާ ކުރުމުގެ އާ ގޮތްތަކާއި އާ ޚިޔާލުތަކަށް ފުރުސަތު ހުޅުވުމަށް މަގުފަހިކުރުމަކީވެސް މި ކޮންފަރެންސްގެ ބޭނުމެކެވެ.