ސްޕެނިޝް ލީގުގައި ވާދަކުރަމުން އަންނަ ވެލެންސިއާގެ ކޯޗަކަށް ވެސްޓް ބްރޮމްގެ ކޯޗު ކާލޯސް ކޯބެރަން ހަމަޖައްސައިފިއެވެ.
އުމުރުން 41 އަހަރުގެ ކޯބެރަން ހޯދުމަށް ވެލެންސިއާ އިން ވަނީ ވެސްޓްބްރޮމް އަށް ތިން މިލިއަނާއި ހަތަރު މިލިއަން ޕައުންޑާއި ދެމެދުގެ ފީއެއް ދައްކާފަ އެވެ. ވެލެންސިއާ އިން ކޯޗެއް ހޯދުމުގެ މަސައްކަތް ފަށާފައިވަނީ ކުރިން އެ ޓީމުގެ ކޯޗަކަށް ހުރި ރުބެން ބަރާހާ މަގާމުން ވަކި ކުރުމަށްފަހުގަ އެވެ. ވެލެންސިއާ އިން ބުނެފައިވާ ގޮތުގައި ކޯބެރަން އާއި އެ ކްލަބުން ވަނީ ތިން އަހަރު ދުވަހުގެ އެއްބަސްވުމެއްގައި ސޮއި ކޮށްފަ އެވެ. އެހެންކަމުން 27-2026 ވަނަ އަހަރުގެ ސީޒަނުގެ ނިޔަލަށް އޭނާ އެ ކްލަބުގައި މަޑުކުރާނެ އެވެ.
ބަރާހާގެ އިރުޝާދުގެ ދަށުން ވެލެންސިއާ މި ސީޒަނުގައި ލަލީގާގައި ކުޅުނު 17 މެޗުގެ ތެރެއިން މޮޅުވެފައިވަނީ އެންމެ ދެ މެޗުންނެވެ.
ވެސްޓްބްރޮމް އިން ކޯބެރަން އެ މަގާމަށް އައްޔަން ކޮށްފައިވަނީ 2022 ވަނަ އަހަރު އެވެ. އޭނާގެ ފުރަތަމަ ސީޒަނުގައި އެ ކްލަބަށް ނުވަވަނަ މަގާމް ހޯދަދީފައިވާއިރު އޭނާ ވަނީ ދެވަނަ ސީޒަނުގައި ފަސްވަނަ ހޯދަދީފަ އެވެ. އަދި ޕްރިމިއާ ލީގުގެ ޕްލޭއޮފްގެ ސެމީ ފައިނަލުން އެ ކްލަބް ބަލިވެފައިވަނީ ސައުތެމްޓަން އަތުންނެވެ.
ސްޕެއިންގެ ވެލެންސިއާއަށް އުފަން ކޯބެރަންގެ އެހީތެރިކަން ހޯދުމަށް އެ ކްލަބުން މަސައްކަތް ފެށިއިރު ވެލެންސިއާ އޮތީ ލަލީގާގެ ރެލިގޭޝަނުގެ ބިރާއި ކުރިމަތިލާ ހިސާބުގަ އެވެ. އަދި އަންނަ ޖެނުއަރީ މަހުގެ 3 ވަނަ ދުވަހު ރެއާލް މެޑްރިޑް އަތުން ބަލިވެއްޖެނަމަ އެ ޓީމަށް އިތުރު މައްސަލަތަކާއި ކުރިމަތިލާން ޖެހޭނެ އެވެ.