ސޫރިޔާގައި ހަރަކާތްތެރިވާ ކުރުދީ ހަތިޔާރު އެޅި ޖަމާޢަތްތަކަށް ތުރުކީވިލާތުގެ ރައީސް ރަޖަބް ޠައްޔިބް އުރްދުޣާން ނުރައްކާތެރި އިންޒާރެއް ދެއްވައިފިއެވެ. އޭނާ ކުރުދީ ހަތިޔާރު އެޅި ޖަމާޢަތްތަކަށް އިންޒާރު ދެއްވާފައި މި ވަނީ، ސޫރިޔާގެ ރައީސް ބައްޝާރް އަލް-އަސަދުގެ ސަރުކާރު ވައްޓައިލުމާ ގުޅިގެން އެ ޤައުމުގައި ހަރަކާތްތެރިވާ ކުރުދީ ހަތިޔާރު އެޅި ޖަމާޢަތްތަކުން އަސްކަރީ ހަރަކާތްތަކާއި ޙަމަލާތައް އިތުރު ކޮށްފައިވާ ދަނޑިވަޅެއްގައެވެ.
އަސަދުގެ ސަރުކާރާ ދެކޮޅަށް ހަނގުރާމަ ކުރި ޖަމާޢަތްތަކުގެ ތެރޭގައި ތުރުކީވިލާތުން ވާގިވެރިވެދީފައިވާ ޖަމާޢަތްތައް ހިމެނޭއިރު، ކުރުދީ ހަނގުރާމަވެރިން ދަނީ އެ ޖަމާޢަތްތަކާ ދެކޮޅަށް ޙަމަލާތައް އަމާޒު ކުރަމުންނެވެ. ޑިސެންބަރު 8ވަނަ ދުވަހު އަސަދުގެ ސަރުކާރު ވައްޓައިލި ފަހުން، ކުރުދީ ޖަމާޢަތްތަކުން ތުރުކީވިލާތުން ވާގިވެރިވެދޭ ޖަމާޢަތްތަކާ ދެކޮޅަށް ދެމުންދާ ޙަމަލާތައް ވަނީ އިތުރު ކޮށްފައެވެ.
އަސަދުގެ ސަރުކާރު ވައްޓައިލާފައި ވަނީ އޭނާގެ ސަރުކާރާ ދެކޮޅަށް ހަނގުރާމަ ކުރި ހަޔިއަތު ތަޙްރީރް އަލް-ޝާމް (އެޗްޓީއެސު)ންނެވެ. އެ ޖަމާޢަތުގެ ހަނގުރާމަވެރިން ވެރިރަށް ދިމިޝްޤަށް އެރުމާ އެކު އަސަދު ވަނީ، ފިއްލަވައިގެން އޭނާގެ ޢާއިލާއާ އެކު ރަޝިޔާއަށް ދަތުރު ކުރައްވާފައެވެ. އަދި، މޮސްކޯގެ ޙިމާޔަތަަށް އެދިވަޑައިގަންނަވާފައެވެ. ސޫރިޔާގައި މި ވަގުތު ވެރިކަން ކުރަނީ އެޗްޓީއެސުން އެކުލަވައިލާފައިވާ އިންތިޤާލީ ސަރުކާރަކުންނެވެ.
ސޫރިޔާގެ ދާޚިލީ ހަނގުރާމަ ނިމުމަކަށް ގެނެސް، އެ ޤައުމުގައި ދެމެހެއްޓެނިވި ގޮތެއްގައި ސުލްޙަ ޤާއިމު ކުރަން އެޗްޓީއެސުން ދަނީ މަސައްކަތް ކުރަމުންނެވެ. އަދި، ހަތިޔާރު ބެހެއްޓުމަށް އެ ޖަމާޢަތުން ވަނީ ސޫރިޔާގައި ހަރަކާތްތެރިވާ ހަތިޔާރު އެޅި ހުރިހާ ޖަމާޢަތަަކަށް ގޮވައިލާފައެވެ. އަދި، ސޫރިޔާގައި އަމަން ބެލެހެއްޓުމަށް އެކުލަވައިލާ ސަލާމަތީ ބާރުތަކުން އެ ޖަމާޢަތްތަކަށް ފުރުޞަތު ދިނުމަށް ވެސް އެޗްޓީއެސުން ވަނީ ނިންމާފައެވެ. ނަމަވެސް، މަސްރަޙު ދިރާސާ ކުރާ ފަރާތްތަކުން ބުނީ، ސޫރިޔާގައި ހަރަކާތްތެރިވާ ކުރުދީ ހަނގުރާމަވެރިންގެ އިތުރުން އެމެރިކާއިން ވާގިވެރިވާ ސީރިޔަން ޑިމޮކްރެޓިކް ފޯސަސް (އެސްޑީއެފު)ން ވެސް ހަތިޔާރު ބަހައްޓަން އެެއްބަސްވެފައި ނުވާ ކަމުގައެވެ.
އުރްދުޣާންގެ އިންޒާރު ރައްދު ކުރައްވާފައި ވަނީ ސޫރިޔާގައި ހަރަކާތްތެރިވާ ކުރުދީ ވައިޕީޖީ ގުރޫޕަށެވެ. އޭނާ ވިދާޅުވީ، އެ ގުރޫޕަށް އޮތީ ދެ ގޮތެއް ކަމުގައެވެ. އެއީ، ހަތިޔާރު ބެހެއްޓުން ނުވަތަ ނެތި ދިޔުން ކަމުގައެވެ. މާނައަކީ، އެ ޖަމާޢަތުން ހަތިޔާރު ބަހައްޓައި ސުލްޙަވާން އެއްބަސްނުވެއްޖެ ނަމަ، އެ ޖަމާޢަތާ ދެކޮޅަށް ތުރުކީވިލާތުން ވަރުގަދަ އަސްކަރީ ކެމްޕޭނެއް ހިންގުން ކަމުގައި މަސްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ.
ހަތިޔާރު ބެހެއްޓުމަށް އެޗްޓީއެސްގެ ސަރުކާރުން ވެސް ވަނީ ވައިޕީޖީ ޖަމާޢަތަށް ގޮވައިލާފައެވެ. އެ ޖަމާޢަތަށް ސޫރިޔާގެ ކުރިމަގުގައި ޖާގައެއް ނޯންނާނެ ކަމުގައި ވެސް އެޗްޓީއެސުން ވަނީ ބުނެފައެވެ. މިއީ، ތުރުކީވިލާތުން ވެސް ބޭނުންވާ ގޮތެވެ. "އެ ޤާތިލުންނަށް [ވައިޕީޖީއަށް] އޮތް ގޮތަކީ ހަތިޔާރުތަކަށް އަލްވަދާޢު ކިޔުން، ނުވަތަ ހަތިޔާރުތަކާ އެކު އެ މީހުން ސޫރިޔާގެ ފަސްގަނޑުގައި ވަޅުލާނަން،" އެ ޖަމާޢަތަށް އިންޒާރު ދެއްވަމުން އުރްދުޣާން ވިދާޅުވިއެވެ.
"އަޅުގަނޑުމެންނާއި އަޅުގަނޑުމެންގެ ކުރުދީ އަޚުންނާ ދެމެދު ނަފްރަތު އުފައްދައި ލެއިން ތަތްތެޅިފައިވާ ފާރެއް ބިނާ ކުރުމަށް މަސައްކަތް ކުރަމުންދާ އެ ނިރުބަވެރި އެ ޖަމާޢަތް ނައްތައިލާނަން،" އުރްދުޣާން ވިދާޅުވިއެވެ. އޭނާ ވައިޕީޖީއަށް އިންޒާރު ދެއްވާފައި ވަނީ ތުރުކީ ވިލާތުގެ ޤާނޫނު ހަދާ މަޖިލީހުގައި ވެރިކަން ކުރާ އޭކޭ ޕާޓީ ތަމްސީލު ކުރައްވާ މެންބަރުންނާ އެކު ބޭއްވި ބައްދަލުވުމެއްގައި ވާހަކަފުޅު ދައްކަވަމުންނެވެ.
ތުރުކީވިލާތުން ޤަބޫލު ކުރާ ގޮތުގައި ވައިޕީޖީއަކީ، ތުރުކީވިލާތުގެ ސަރުކާރާ ދެކޮޅަށް ހަތިޔާރު އުފުލައި، އެ ޤައުމާ ދެކޮޅަށް ހަނގުރާމަ ކުރަމުންދާ ނިރުބަވެރި ޖަމާޢަތެއް ކަމުގައިވާ ކުރްދިސްތާން ވަރކަރސް ޕާޓީ (ޕީކޭކޭ)އާ ގުޅުން އޮތް ނިރުބަވެރި ޖަމާޢަތެކެވެ. ޕީކޭކޭއިން ތުރުކީވިލާތުގެ ސަރުކާރާ ދެކޮޅަށް ހަނގުރާމަ އިޢުލާނު ކޮށްފައި ވަނީ 1984ވަނަ އަހަރުއެވެ. ޕީކޭކޭގެ ހަނގުރާމަވެރިން ސޫރިޔާގައި ހަރަކާތްތެރިވަމުންދާ ކަން އެސްޑީއެފްގެ ކޮމާންޑަރު ދާދިފަހުން އެއްބަސްވެފައިވާ ކަން ފާހަގަ ކޮށްލަން ޖެހެއެވެ.
ތުރުކީވިލާތުގެ އިތުރުން އެމެރިކާއާއި ވިލާތުގެ އިއްތިޙާދު (އީޔޫ)ން ނިރުބަވެރި ޖަމާޢަތެއްގެ ގޮތުގައި ކަނޑައަޅާފައިވާ ޕީކޭކޭން ދަނީ ތުރުކީވިލާތުގެ ސަރުކާރާއި ޢާންމު ރައްޔިތުންނާ ދެކޮޅަށް ނިރުބަވެރި ޙަމަލާތައް އަމާޒު ކުރަމުންނެވެ. ވައިޕީޖީއަށް ވާގިވެރިވުން ހުއްޓައިލުމަށް ތުރުކީވިލާތުން ވަނީ އެމެރިކާގެ ކިބައިން ވެސް އެދިފައެވެ. ވައިޕީޖީއަކީ އެެމެރިކާއިން ވާގިވެރިވާ އެސްޑީއެފާ ގުޅިފައިވާ ގުރޫޕެކެވެ.
ކުރުދީ ވައިޕީޖީއާ ދެކޮޅަށް ތުރުކީވިލާތުގެ އަސްކަރިއްޔާއިން މިހާރު ވެސް ދަނީ ޙަމަލާތައް އަމާޒު ކުރަމުންނެވެ. ތުރުކީވިލާތުގެ ދިފާޢި ވުޒާރާއިން ބުނީ، ސޫރިޔާއާއި ޢިރާޤުގައި ހަރަކާތްތެރިވަމުންދާ ވައިޕީޖީގެ ނިރުބަވެރިންނަށް އަމާޒުކޮށް ދާދިފަހުން ދީފައިވާ ޙަމަލާތަކެއްގައި އެ ޖަމާޢަތުގެ 21 ހަނގުރާމަވެރިން މަރައިލާފައިވާނެ ކަމުގައެވެ.