ތަރައްޤީގެ ޕްލޭންތައް އެކުލަވާލާއިރު ސުނާމީގައި ލިބުނު ގެއްލުންތަކަށް ރިއާޔަތްކުރަންޖެހޭ: ވަޒީރު ޠާރިޤު

ތަރައްޤީގެ ޕްލޭންތައް އެކުލަވާލާއިރު މިއަދުވެސް ސުނާމީ ކާރިސާއިން ލިބުނު ފިލަވާޅުތަކަށް ރިއާޔަތްކުރުން މުހިންމުކަމަށް މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވަޒީރު ޠާރިޤު އިބްރާހިމް ވިދާޅުވެއްޖެއެވެ.

ވަޒީރު މިހެން ވިދާޅުވީ ޤައުމީ އެއްބައިވަންތަކަމުގެ ދުވަހުގެ މުނާސަބަތުގައި ސޯޝަލް މީޑިޔާގައި ޙިއްސާކުރެއްވި ޕޯސްޓެއްގައެވެ.

ރާއްޖޭގައި ޤައުމީ އެއްބައިވަންތަކަމުގެ ދުވަސް ފާހަގަކުރަނީ 2004 ވަނަ އަހަރުގެ ޑިސެންބަރު މަހުގެ 26 ވަނަ ދުވަހު ކުރިމަތިވި ސުނާމީ ކާރިސާގައި ލިބުނު ބޮޑެތި ގެއްލުންތަކުން އަރައިގަތުމަށް ދިވެހި ރައްޔިތުންގެ ފަރާތުން ފެނުނު އެއްބައިވަންތަކަން އަގުވަޒަންކޮށް، ހަނދާކުރުމުގެ ގޮތުންނެވެ.

ސުނާމީ ކާރިސާއަކީ ފަހުގެ ތާރީޚެއްގައި ރާއްޖެ ކުރިމަތިލާންޖެހުނު އެންމެ ނުރައްކާތެރި ޤުދުރަތީ ކާރިސާއެވެ. މި ކާރިސާގެ ސަބަބުން ގިނަ ބަޔަކު އެތައް ދުވަހެއްގެ މަސައްކަތުން ބިނާކުރި ދިރިއުޅުން ބިމާ ހަމަވެގެން ދިޔައެވެ. މި ހާދިސާއަށްފަހު ޤުދުރަތީ ކާރިސާތަކަށް ވިލުންތެރިވުމަށް ރާއްޖެއިން ގިނަ މަސައްކަތްތަކެއް ފެށިއެވެ.

މި ދުވަހުގެ މުނާސަބަތުގައި ސޯޝަލް މީޑިޔާގައި ޙިއްސާކުރެއްވި ޕޯސްޓުގައި މޫސުމީ ބަދަލުތަކާއި ތިމާވެށްޓާއި ހަކަތައާބެހޭ ވަޒީރު ޠާރިޤު އިބްރާހިމް ވިދާޅުވީ ދުރުރާސްތާއަށް އަމާޒުކޮށްގެން އެކުލަވާލާ ތަރައްޤީގެ ޕްލޭންތަކުގައި ސުނާމީ ކާރިސާއިން ލިބުނު ފިލާވަޅުތަަކށް ރިއާޔަތްކުރުން މުހިންމު ކަމަށެވެ. އަދި މޫސުމީ ބަދަލުތަކުގެ ސަބަބުން ދިމާވާ ޤުދުރަތީ ކާރިސާތަކަށް ވިލުންތެރިވުމާއި އިޖާބަދިނުމުގެ މަސައްކަތްތަކަށް ތަރައްޤީގެ ލަނޑުދަނޑިތަކުގެ ތެރޭގައި އިސްކަންދިނުން މުހިންމުކަމަށް ވަޒީރު ވިދާޅުވިއެވެ.

As we mark twenty years to the harrowing 2004 tsunami, we remember those we lost that day.

We also mark the unity and solidarity that Maldivians showed that day.

We must ensure that the lessons we learned from the tsunami are integrated into our long term development planning.… pic.twitter.com/BVnn5bAMpX

— Thoriq Ibrahim (@Thoriqibrahim) December 26, 2024

މޫސުމީ ބަދަލުތަކަށް ވިލުންތެރިވުމަށް ގިނަ މަސައްކަތްތަކެއް ސަރުކާރުން ދަނީ ކުރައްވަމުންނެވެ. އެގޮތުން މޫސުމީ ބަދަލުތަކަށް ވިލުންތެރިވުމަށްކުރާ މަސައްކަތުގައި މާލީ އެހީތެރިކަން ހޯދުމަށް ބައިނަލްއަޤުވާމީ އެކި ޖަމިއްޔާތަކާ ސަރުކާރުން ދަނީ މަޝްވަރާކުރަމުންނެވެ. އަދި އެކަމަށް ބައިނަލްއަޤުވާމީ މައިދާނުގައި ސަރުކާރުން ދަނީ އަޑު އުފުލަމުންނެވެ.

މީގެ އިތުރުން ސަރުކާރުން މިހާރު ވަނީ ދިވެހިރާއްޖޭގެ ޑިޒާސްޓަރ ރިސްކް ރިޑަކްޝަން ސްޓެރެޓީޖިކް ޕްލޭންވެސް އެކުލަވާލައި، ފާސްކޮށްފައެވެ. މި ޕްލޭނަކީ މޫސުމީ ގޮތުންނާއި އެނޫންވެސް ގޮތްގޮތުން ކުރިމަތިވެދާނެ ކާރިސާތަކުގެ ސަބަބުން ރާއްޖޭގެ ތިމާވެށްޓާއި ބިނާވެށި ރައްކާތެރިކުރުމެވެ. އަދި ރައްޔިތުންގެ ގެދޮރާއި މުދާ ހިމާޔަތްކުރުމާއި، ކާރިސާތަކަށް ކުރިއާލާ ތައްޔާރުވުމާއި، ކާރިސާތަކަށް ވިލުންތެރި މުޖުތަމަޢުއެއް ބިނާކުރުމާއި، ދެމެހެއްޓެނިވި ތަރައްޤީގެ ލަނޑުދަނޑިތައް ޙާޞިލުކުރުމަކީވެސް މި ސްޓްރެޓެޖީގެ އަމާޒެކެވެ.