ގޯލްޑް ކަޕް ބޭއްވިދާނެކަން ގަބޫލުފުޅު ކުރައްވައި ރައީސް ދެއްވި ސަޕޯޓަށް ޝުކުރުއަދާކުރަން: ޝާޒްލީ

ނައިންޓީ ޕްލަސް ގޯލްޑް ކަޕް 2024 ބޭއްވުމަށް ސަރުކާރުން ވަރަށް ބޮޑު އެއްބާރުލުމެއް ދެއްވި ކަމަށާއި، މި ކޮންސެޕްޓްގައި މި މުބާރާތް 90 ޕްލަސްއަށް ބޭއްވިދާނެކަން ގަބޫލުފުޅުކުރައްވާ ދެއްވި ސަޕޯޓަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަށް ވަރަށް ބޮޑަށް ޝުކުރު އަދާކުރައްވާ ކަމަށް 90 ޕްލަސް ގޯލްޑް ކަޕުގެ ފައުންޑަރ، އަދި ތަޖުރިބާކާރު ކޯޗު މުޙައްމަދު ޝާޒްލީ ވިދާޅުވެއްޖެއެވެ.

ގޯލްޑްކަޕްގެ ސެމީ ފައިނަލް މެޗުތަކަށްފަހު ޕީއެސްއެމް ނިއުސްއަށް ދެއްވި ހާއްސަ ބަސްދީގަތުމެއްގައި ޝާޒްލީ ވިދާޅުވީ މި ކޮންސެޕްޓް ގަބޫލުކޮށް މި ކޮންސެޕްޓްގައި މިކަން މިކަން ކުރެވިދާނެކަން ގަބޫލުފުޅު ކުރެއްވީތީ ރައީސްގެ އިތުރުން ސްޕޯޓްސް މިނިސްޓަރ އަބުދުﷲ ރާފިއު އާއި ސަރުކާރަށްވެސް ވަރަށް ބޮޑަށް ޝުކުރު އަދާކުރައްވާކަމަށެވެ.

އަދި މި މުބާރާތް ފައިނަލާ ހަމައަށް އައިއިރު ގޯލްޑް ކަޕްގައި ބައިވެރިވި 17 ޓީމަށް 90 ޕްލަސްގެ ފަރާތުން ޝުކުރު އަދާކުރަން ބޭނުންވާ ކަމަށާއި، ގޯލްޑް ކަޕް، ގޯލްޑް ކަޕަކަށް ވެގެން ދިޔައީ އެ 17 ޓީމުގެ ސަބަބުން ކަމަށްވެސް ޝާޒްލީ ވިދާޅުވިއެވެ.

"

"ވަރަށް ރަނގަޅު ކުޅުމެއް ފެނިގެން ހިނގައްޖެ، ފުޓްބޯޅައިގެ ފެންވަރު ފެނިއްޖެ، ޑިސިޕްލިންވެސް، އުންމީދު ކުރަނީ ސެމީ ފައިނަލަށްވުރެ ފައިނަލް މެޗު ވަރަށް ފޯރި ގަދަވާނެ ކަމަށް"

ކޯޗު މުހައްމަދު ޝާޒްލީ

ނައިންޓީ ޕްލަސް އަކީ ޓެކްނިކަލް މަސައްކަތް ކުރާ ބައެއް ކަމަށާއި، ގޯލްޑްކަޕް މުބާރާތް ބޭއްވުމުގެ އެއް ބޭނުމަކީ ބޮޑެތި ކުލަބު ތަކަށް ކުޅުންތެރިން ހޯދަދިނުން ކަމަށްވެސް ޝާޒްލީ ވިދާޅުވިއެވެ.

ގޯލްޑް ކަޕްގެ ސަބަބުން ފަސްޓް ޑިވިޝަނުގެ ވަރަށް ގިނަ ޓޮޕް ޕްލޭޔަރުންނާއި އެކުގައި އާ ކުޅުންތެރިންނަށް ކުޅުމުގެ ފުރުސަތު ލިބި އެ ކުޅުންތެރިންގެ ފެންވަރުވެސް ފެނިގެން ހިނގައްޖެ ކަމަށާއި ފަސްޓް ޑިވިޝަނަށް ކުޅެވޭނެ އާ ކުޅުންތެރިންތަކެއް މި މުބާރާތުން ފެނިގެން ހިނގައްޖެ ކަމަށް ޝާޒްލީ ފާހަގަކުރެއްވިއެވެ.

އޭނާ ވިދާޅުވީ ފަސްޓް ޑިވިޝަނުގެ ހުރިހާ ޓީމެއްވެސް އަދި އެފްއޭއެމުންވެސް ކުރިޔަށް އޮތް ތަނުގައި މި މުބާރާތް ބަލައިގަންނާނެ ކަމަށް ވަރަށް ޔަގީންކަން އެބައޮތް ކަމަށާއި، އަދި މި މުބާރާތުގެ ސަބަބުން ނެގެން އޮތް ހުރިހާ ފައިދާއެއް ނަގައިގެން ދިވެހި ފުޓްބޯޅަ ކުރިއަރުވަން ހުރިހާ ކުލަބަކުންވެސް މަސައްކަތް ކުރާނެ ކަމުގެ ވަރަށް ޔަގީންކަން އެބައޮތް ކަމަށް ޝާޒްލީ ވިދާޅުވިއެވެ.

ޝާޒް ވިދާޅުވީ ރާއްޖޭގައި ފުޓްބޯޅަ އޮތް ހިސާބަށް ބަލާއިރު ކުޅިބަލަން މީހުން ދަނޑަށް ވެއްދުމުގެ މީ ވަރަށް ބޮޑު ޗެލެންޖެއް ކަމަށެވެ. އެހެންކަމުން މި މުބަރާތް ފެށީވެސް އަލުން ދަނޑަށް ސަޕޯޓަރުން ވެއްދުމުގެ ބޭނުމުގައި ކަމަށާއި، 90 ޕްލަސްގެ ހަގީގަތުގައި ކާމިޔާބީއަކީ ބައިވެރިވި ޓީމުތައް ކަމަށެވެ.

ނައިންޓީ ޕްލަސްއަށްވުރެ ބޮޑަށް ސަޕޯޓަރުން ވެއްދުމުގެ މަސައްކަތް ޓީމުތަކުން ކޮށްފި ކަމަށާއި، ސަޕޯޓަރުން ގެނައުމާއި ޓީމުތައް މާލެ ގެނެސް އެއް މަސްދުވަހު އެކޮމޮޑޭޝަން ހަމަޖައްސައިދީގެން ބޭއްތިއްބުމަކީވެސް ހަރަދު ބޮޑުކަމެއް ކަމަށް ފާހަގަކޮށް ޝާޒްލީ ވިދާޅުވީ އެ ކަމަށް ނުވިސްނާ ޓީމުތަކުން މަސައްކަތް ކުރީ ފުޓްބޯޅަ ކުރިއަރުވަން ކަމަށެވެ.

ހުރިހާ ޓީމެއްގެ އެއްބައިވަންތަކަމާއެކު ކުރި މަސައްކަތުގެ ނަތީޖާ ފެންނަ ކަމަށާއި، ފުޓްބޯޅަ ވަޅުޖަހާފައި އޮތް ހިސާބުން ނެގުމަށް 17 ޓީމުންވެސް ވަރަށް ބޮޑަށް މަސައްކަތްކޮށްފި ކަމަށް ޝާޒްލީ ވިދާޅުވިއެވެ. އަދި މި މުބާރާތް މާކެޓް ކުރީވެސް ޓީމުތަކުން ކަމަށާއި، ޓީމުތަކުގެ އިތުރުން، މުބާރާތުގެ ސްޕޮންސަރުންނާއި މުބާރާތަށް ސަޕޯޓް ދިން ހުރިހާ ފަރާތްތަކަށްވެސް ޝުކުރު އަދާ ކުރާ ކަމަށް ޝާޒްލީ ވިދާޅުވިއެވެ.