ފުވައްމުލައް ކައިރިން ފެނުނު ސޯމާލިއާ މީހުން ފުލުހުންނާ ޙަވާލުކޮށްފި
-
ޑިންގީގައި ސޯމާލިޔާގެ މީހުންކަމަށް ޝައްކު ކުރެވޭ 3 މީހުން ތިބި
ފުވައްމުލަކާއި ދިމާލުން ކަނޑުމަތިން ފެނުނު ސޯމާލިއާގެ 3 މީހުން އެމްއެންޑީއެފްއިން ފުލުހުންނާއި ހަވާލުކޮށްފިއެވެ.
މިއަދުގެ ހެނދުނުގެ ވަގުތެއްގައި މި މީހުން ފެނިފައިވަނީ ހުޅަނގު އުތުރުން 10 ވަރަކަށް މޭލު ބޭރުން ޑިންގީއެއްގައި ތިއްބައެވެ. އަދި އެ މީހުން ފެނުމާއެކު އެމްއެންޑީއެފް ސަދަން އޭރިއާ ކޮމާންޑް، ކޯސްޓްގާޑު ފޯތު ސްކޮޑްރަންގެ ހާބަރ ޕެޓްރޯލުން އެ ސަރަހައްދަށް ގޮސް އެޑިންގީ ކޯސްޓްގާޑުގެ ބެލުމުގެ ދަށަށް ގެނައީ މިއަދު ހެނދުނުގެ ވަގުތެއްގައެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން އެމްއެންޑީއެފުން ވިދާޅުވީ ފުވައްމުލަކާއި ދިމާލުން ކަނޑުމަތިން ފެނުނު ސޯމާލިއާ މީހުން ކޯސްޓްގާޑުގެ ބެލުމުގެ ދަށުން ފުވައްމުލަކު ސިޓީ ބަނދަރަށް ވައްދައި، ފުލުހުންގެ ޚިދުމަތާ ހަވާލުކޮށްފައިވާ ކަމަށެވެ. އެމްއެންޑީއެފްއިން ވިދާޅުވީ އެ މީހުން ތިބި ޑިންގީއަކީ ސޯމާލިއާގެ މީހުން ބޭނުންކުރާ ވައްތަރުގެ "ސްކިފް" އެއްގައިކަމަށެވެ.
މީގެކުރިންވެސް ރާއްޖެ ސަރަހައްދުން ސޯމާލިޔާއަށް ނިސްބަތްވާ މީހުން ޑިންގީތަކުގައި ވަނީ ފެނިފައެވެ. ނަމަވެސް މިހާތަނަށް މިފަދަ ހާދިސާއެއްގައި ނުރައްކާތެރިކަމެއް ހިނގާފައެއް ނުވެއެވެ.