ނައިންޓީ ޕްލަސް ގޯލްޑް 2024 ގެ ފައިނަލް މެޗުގެ ގިނަ އަދަދެއްގެ ޓިކެޓްތައް ގަޑިއެއްހާއިރުގެ ތެރޭގައި ވިކި ހުސްވެއްޖެއެވެ.
ގޯލްޑްކަޕްގެ ފައިނަލް މެޗު އޮންނާނީ އަންގާރަ ދުވަހުގެރޭ ގަލޮޅު ދަނޑުގައެވެ. މި މެޗުގައި ބައްދަލުކުރާނީ އައްޑޫ ސިޓީ އާއި ބ. އޭދަފުށި ޓީމެވެ. މާދަމާ ރޭ 9:00 ގައި ފަށާ އެ މެޗުގެ ޓިކެޓު ވިކަން ފެށީ މިއަދު ހަވީރު 4:00 ގައެވެ. އައްޑޫ ސިޓީގެ ޓިކެޓު ވިއްކަން ހަމަޖެހިފައިވަނީ ސަހަރާ ފަޅި ގޭޓު ޓިކެޓު ކައުންޓަރުންނެވެ. ކޮންމެ ޓީމަކަށް 600 ޓީކެޓް ވިއްކަން ހަމަޖެހިފައިވާ މި މެޗަށް އެންމެ އަވަހަށް ވިކި ހުސްވީ އައްޑޫ ސިޓީގެ ޓިކެޓުތަކެވެ.
އަދި އޭދަފުށީގެ ޓިކެޓު ވިއްކަނީ އޮލިމްޕަސް ފަޅި ޓިކެޓު ކައުންޓަރުންނެވެ. ދެ ޓީމުގެ ސަޕޯޓަރުންވެސް ގިނަ އަދަދެއްގެ ޓިކެޓް ގަނެފައިވާއިރު މި މެޗަށް ގަލޮޅު ދަނޑު ފުރާލާނެ ކަމަށް ބެލެވެއެވެ. މިއީ މި ފަހުގެ ތާރީހެއްގައި ގަލޮޅު ދަނޑަށް އެންމެ ގިނަ ސަޕޯޓަރުން ވަންނާނެ މެޗެވެ. ޓިކެޓް ކައުންޓަރުތައް ކައިރީގައި ގިނަ އަދަދެއްގެ މީހުން ގަޑިއިރެއްހާއިރު ކުރިން ކިއު ހެދި އިރު ގަޑިއިރެއްގެ ތެރޭގައި ގިނަ އަދަދެއްގެ ޓިކެޓް ވިކި ވަރަށް ބޮޑު ތަރްހީބެއް ލިބިފައިވެއެވެ.
މިމުބާރާތުގެ ފައިނަލާހަމައަށް އައްޑޫ ސިޓީ ދަތުރުކުރީ ކުޅުނު އެއްވެސް މެޗަކުން ބަލިނުވެ، ސެމީ ފައިނަލްގައި 2-0 ން ރ. އަލިފުށި ބަލިކޮށްގެންނެވެ. ބ. އޭދަފުށި ފައިނަލަށް ދިޔައީ ސެމީ ފައިނަލްގައި މާލެ ސިޓީގެ މައްޗަށް 3-2 ން ކުރި ހޯދައިގެންނެވެ.
ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ގޯލްޑް ކަޕް 2024 ގައި ޖުމްލަ 17 ޓީމެއް ވާދަކުރިއެވެ. މި މުބާރާތަކީ ދިވެހިންގެ މެދުގައި ފުޓްބޯޅައަށް އޮންނަ ލޯބި އިތުރުކޮށް އަލުން ގަލޮޅޫ ދަނޑަށް ސަޕޯޓަރުން ވެއްދުމުގެ އަމާޒުގައި 90 ޕްލަސްއިން ބާއްވާ މުބާރާތެކެވެ.
ޓިކެޓް ގަތުމަށް 3:00 އިން ފެށިގެން ވަނީ ކިއު ހަދާފައެވެ. ގަޑިއެއްހާ އިރު ތެރޭގައި ޓިކެޓްތައް ވިކި ހުސްވުމާއި ގާތްވެފައިވާ މި މެޗު ޕީއެސްއެމްގެ ޔެސް ޓީވީން ވަގުތުން ގެނެސްދިނުމަށް ވަނީ ހަމަޖެހިފައެވެ.