އަންނަ އަހަރު ހަފުތާ ބަންދު ދުވަސްތަކުގައިވެސް ކޯޓުގައި ކައިވެނިކޮށް ދޭނެ

އަންނަ އަހަރު ހަފުތާ ބަންދު ދުވަސްތައްވެސް ހިމެނޭހެން ހުރިހާ ދުވަހެއްގައި ކޯޓުގައި ކައިވެނިކޮށްދޭން ފެމެލީ ކޯޓުން ނިންމައިފިއެވެ.

ފެމެލީ ކޯޓުން ވިދާޅުވީ އަންނަ އަހަރު ހުރިހާ ދުވަހެއްގައި ކައިވެނިކޮށްދޭނެ ކަމަށެވެ. އަދި ކުރީގެ އަހަރުތަކުގައި ހަފުތާ ބަންދު ދުވަސްތަކުގައި ކޯޓުގައި ކައިވެނިކޮށް ނުދިން ނަމަވެސް ގިނަ މީހުންގެ އެދުމުގެ މަތިން އަންނަ އަހަރު ހަފުތާ ބަންދު ދުވަސްތަކުގައި ކޯޓުގައި ކައިވެނިކޮށްދޭނެ ކަމަށް އެ ކޯޓުން ވިދާޅުވެއެވެ.

މިގޮތުން ހަފުތާ ބަންދު ދުވަސްތަކުގެ ތެރެއިން ހުކުރު ދުވަހު ކައިވެނިކޮށް ދޭނީ މެންދުރުފަހު 3 އިން ފެށިގެން ރޭގަނޑު 9:30 އާހަމައަށެވެ. އަދި ހޮނިހިރު ދުވަހު ކައިވެނިކޮށް ދޭނީ ހެނދުނު 10 އިން ފެށިގެން ރޭގަނޑު 9:30 އާ ހަމައަށެވެ.

މީގެއިތުރުން ރަސްމީ ދުވަސްތަކުގައި ހެނދުނު 9 އިން ރޭގަނޑު 9:30 އާ ހަމައަށް ކޯޓުގައި ކައިވެނިކޮށް ދިނުމަށް ނިންމަފައިވެއެވެ. އަދި ކޯޓުން ބޭރުގައި ނަމަ މެންދުރުފަހު 3 އިން ފެށިގެން ރޭގަނޑު 9:30 އާ ހަމައަށް ކައިވެނިކޮށް ދޭނެ ކަމަށް ފެމިލީ ކޯޓުން ވިދާޅުވެއެވެ.

ފެމިލީ ކޯޓުން ވިދާޅުވީ ރިސޯޓްތަކާއި ސަފާރީތަކުގައި ކައިވެނިކޮށް ދޭނެ ވަގުތުތައް ކަނޑައަޅާނީ އެކަމަށް އެދި ހުށަހެޅުމުން ކަމަށެވެ. އަދި އަންނަ ރަމަޟާން މަހު ކައިވެނިކޮށްދޭނެ ގަޑިތައްވެސް ފަހުން އިޢުލާން ކުރާނެކަމަށް ފެމެލީ ކޯޓުން ވިދާޅުވެއެވެ.