ޕޮލިޓެކްނިކަށް ބައިނަލްއަޤުވާމީ މުބާރާތެއްގެ ރިހި މެޑަލް
-
މި މުބާރާތް ބާއްވާފައިވަނީ މިމަހުގެ 16 އިން 20 އަށް ޗައިނާގައި
ޗައިނާގައި ބޭއްވި ބައިނަލްއަޤްވާމީ މުބާރާތެއްގައި މޯލްޑިވްސް ޕޮލިޓެކްނިކުން ރިހި މެޑަލް ހޯދައިފިއެވެ.
މޯލްޑިވްސް ޕޮލިޓެކްނިކުން ރިހި މެޑަލް ހޯދާފައިވަނީ ޗައިނާގެ ބެއިޖިންގ އަދި ޗިންގޑާއޯގައި ބޭއްވި "ތަރޑް ޝަންހާއި ކޯޕަރޭޝަން އޮގަނައިޒޭޝަން ވަރކް ސްކިލްޑް ކޮންޓެސްޓް" މުބާރާތުންނެވެ. މި މުބާރާތް ބާއްވާފައިވަނީ މިމަހުގެ 16 އިން 20 އަށެވެ.
މިއީ މޯލްޑިވްސް ޕޮލިޓެކްނިކުން މިފަދަ މުބާރާތެއްގައި ބައިވެރިވި ފުރަތަމަ ފަހަރެވެ. މި މުބާރާތުގައި މޯލްޑިވްސް ޕޮލިޓެކްނިކް ތަމްސީލުކުރި ޓީމުގައި ހިމެނެނީ ލެކްޗަރަރ މުޙައްމަތު ލަޠީފާއާއި، ދަރިވަރުންކަމުގައިވާ އަޙްމަދު ލިވާޒް އަދި މުޙައްމަދު ނަސީމެވެ. ޝަންހާއީ ކޯޕަރޭޝަން އޮގަނައިޒޭޝަން (އެސް.ސީ.އޯ) އިން އިންތިޒާމުކޮށްގެން ބޭއްވި މި މުބާރާތުގައި އެކި ޤައުމުތަކުގެ ބައިވެރިން ފަންނީ އަދި ވޮކޭޝަނަލް ހުނަރުތައް ދައްކާލާފައިވެއެވެ.
މި ކާމިޔާބީއާ ގުޅޭގޮތުން މޯލްޑިވްސް ޕޮލިޓެކްނިކުން ވިދާޅުވީ ދުނިޔޭގެ ނަން މަޝްހޫރު ޔުނިވަރސިޓީތަކާއި އިންސްޓިޓިއުޝަންތަކުގެ ބައިވެރިންނާ ވާދަކޮށް މިފަދަ ފަހުރުވެރި ކާމިޔާބީއެއް ހޯދުމަކީ، ވޮކޭޝަނަލް ދާއިރާއިން މޯލްޑިވްސް ޕޮލިޓެކްނިކް ކުރިއަރަމުންދާކަމުގެ އަލިގަދަ ހެއްކެއްކަމަށެވެ. މިފަދަ ކުރިއެރުންތަކުން މޯލްޑިވްސް ޕޮލިޓެކްނިކްގެ ދަރިވަރުންގެ ހުނަރުވެރިކަމާއި، ވޮކޭޝަނަލް ތަޢުލީމަށް އޮތް ޝައުޤުވެރިކަން ވަރަށް ސަރީހަކޮށް ދައްކުވައިދޭކަމެއް ކަމަށްވެސް ޕޮލިޓެކްނިކުން ވިދާޅުވިއެވެ.
މި ޓީމުގެ ކާމިޔާބީން، މުސްތަޤުބަލަށް ބޭނުންވާ ހުނަރުތައް ތަރައްޤީކޮށް، ޤައުމީ އަދި ބައިނަލްއަޤްވާމީ ފެންވަރުގައިވެސް ދަރިވަރުން ބާރުވެރިކުރުވުމުގައި މޯލްޑިވްސް ޕޮލިޓެކްނިކްގެ މުހިންމު ދައުރު ފާހަގަކުރެވެއެވެ. މި ކާމިޔާބީގެ ސަބަބުން، ބައިނަލްއަޤްވާމީ މިންގަނޑުތަކަށް ފެތޭ ފަންނީ އަދި ވޮކޭޝަނަލް ތަޢުލީމު ފޯރުކޮށްދިނުމަށް ދޭ އަހައްމިއްޔަތު އިތުރަށް ހަރުދަނާވެގެންދާނެކަމަށްވެސް މޯލްޑިވްސް ޕޮލިޓެކްނިކުން ދެކެއެވެ.