2027 އަދި 2031 ވަނަ އަހަރު ބޭއްވުމަށް ހަމަޖެހިފައިވާ އަންހެނުންގެ ވޯލްޑްކަޕްގެ މެޗުތައް އެމެރިކާ ދެއްކުމުގެ ހުއްދަ ނެޓްފްލިކްސް އިން ހޯދައިފި އެވެ.
ދުނިޔޭގެ ފުޓްބޯޅައިގެ މައި އިދާރާ, ފީފާ އިން ހާމަކޮށްފައިވާ ގޮތުގައި މި ދެ ވޯލްޑްކަޕްގެ ހުރިހާ މެޗެއް ވަގުތުން އެމެރިކާގެ ދެއްކުމުގެ އެއްބަސްވުމެއް އެ އިދާރާ އާއި ނެޓްފްލިކްސް އާއި ދެމެދުވަނީ ވެފަ އެވެ. އަދި މިއީ ނެޓްފްލިކްސް އިން މި ފެންވަރުގެ މުބާރާތެއްގެ ރައިޓްސް ގަނެފައިވާ ފުރަތަމަ ފަހަރެވެ.
މި އެއްބަސްވުމުގެ ދަށުން އަންހެނުންގެ ވޯލްޑްކަޕްގެ މެޗުތައް ނެޓްފްލިކްސް އިން ދައްކާއިރު އެމެރިކާގެ އިތުރުން ޕުއެޓޮރީކޯގެ ސަރަހައްދުވެސް ހިމެނޭނެއެވެ. އަދި އެމެރިކާގައި އާންމުކޮށް ބޭނުންކުރާ ދެ ބަސް ކަމުގައި އިނގިރޭސި އާއި ސްޕެއިން ބަހުން މެޗުގެ ކޮމެންޓްރީ ދޭން ޖެހޭނެ ކަމަށްވެސް ފީފާއިން ވަނީ ބުނެފަ އެވެ.
މި ދެ މުބާރާތުގެ ބްރޯޑްކާސްޓިން ހުއްދަ ނެޓްފްލިކްސް އިން ގަނެ މެޗުތައް ލައިވް ކުރުމުގެ އިތުރުން މި މުބާރާތްތަކަށް ފީފާގެ އިތުރުން ގައުމުތަކުން ވަމުންދާ ތައްޔާރީތަކާއި އަދި ކޮލިފައިން ބުރާއި ގުޅޭ ގޮތުން ޑޮކިއުމެންޓަރީ ތައްޔާރުކޮށް އެ ޕްރިގްރާމްތައް ނެޓްފްލިކްސް އިން ދައްކާނެ އެވެ.
2027 ވަނަ އަހަރުގެ މުބާރާތް ބްރެޒިލްގައި ބާއްވާއިރު މިއީ އަންހެނުންގެ ވޯލްޑްކަޕް ދެކުނު އެމެރިކާގައި ބާއްވާ ފުރަތަމަ ފަހަރެވެ. އަދި 2031 ވަނަ އަހަރުގެ ވޯލްޑްކަޕް ބާއްވާ ގައުމެއް އަދި އިއުލާން ކޮށފައިނުވި ނަމަވެސް އެކަން ވަރަށް އަވަހަށް އިއުލާން ކުރާނެކަމަށް ފީފާއިން ވަނީ ބުނެފަ އެވެ.