ފާއިތުވި 24 ގަޑިއިރު މާލެއަށް 136 މިލިމީޓަރުގެ ވާރޭ

ފާއިތުވީ 24 ގަޑިއިރު އެންމެ ގިނައިން ވާރޭވެހިފައިވަނީ މާލެއަށް ކަމަށް މޫސުމާބެހޭ ޤައުމީ އިދާރާގެ ތަފާސްހިސާބުން ދައްކައިފިއެވެ.

ރާއްޖެއާ ކައިރި ދެ ސަރަހައްދެއްގައި އުފެދިފައިވާ ކޮޅިގަނޑެއްގެ ސަބަބުން މޫސުން ގޯސްވެ، ރާއްޖޭގެ އެކި ހިސާބުތަކަށް ދަނީ ވިއްސާރަކުރަމުންނެވެ.

މޫސުމާބެހޭ ޤައުމީ އިދާރާގެ ތަފާސްހިސާބުން ދައްކާގޮތުން ހުކުރު ދުވަހުގެ ހެނދުނު 8:00 އިން ފެށިގެން ހޮނިހިރު ދުވަހުގެ ހެނދުނު 8:00 އާ ހަމައަށް އެންމެ ގިނައިން ވާރޭވެހިފައިވަނީ މާލެއަށެވެ. އެއީ 136.5 މިލިމީޓަރުގެ ވާރޭއެވެ.

ދެން އެންމެ ގިނައިން ވާރޭވެހިފައިވަނީ ހުޅުލެއަށެވެ. އެއީ 117.4 މިލިމީޓަރުގެ ވާރޭއެވެ. މިވިއްސާރައިގައި އަތޮޅު ތެރޭގެ ރަށްތަކުގެ ތެރެއިން އެންމެ ގިނައިން ވާރޭވެހުނީ ބ. ދަރަވަންދޫއަށެވެ. ދަރަވަންދޫއަށް 111.5 މިލިމީޓަރުގެ ވާރޭވެހިފައިވެއެވެ.

Automatic weather station in Male' recorded 136.5mm of rainfall during the past 24hrs.

Visit our viber group for daily rainfall information, weather forecast and alerts: https://t.co/xWbPDxfjYi pic.twitter.com/dPvpKFot4A

— Maldives Meteorology (@MetMaldives) December 21, 2024

ފާއިތުވީ 24 ގަޑިއިރަށް ބަލާއިރު ރާއްޖޭގެ ހުރިހާ ހިސާބަކަށްވެސް ވާރޭ ވެހިފައިވެއެވެ. މުޅި ރާއްޖެއަށް މޫސުން ގޯސްވެފައިވާއިރު ކަނޑު ދަތުރުފަތުރުކުރާ ފަރާތްތަކުން މޫސުމަށް ސަމާލުކަން ދިނުމަށް ކަމާބެހޭ ފަރާތްތަކުން ވަނީ އިލްތިމާސްކޮށްފައެވެ.

ރާއްޖެއަށް މިހާރު ކުރަމުންދާ ވިއްސާރަ އަލިވާނެކަމަށް މޫސުމާބެހޭ ޤައުމީ އިދާރާއިން ލަފާކޮށްފައިވަނީ އަންނަ ހޯމަ ދުވަހުއެވެ.