2022 ވަނަ ވަނަ ބަޑި ޖައްސާ ބިރު ދައްކައިގެން ފްރާންސްގެ މިޑްފީލްޑަރ ޕޯލް ޕޮގްބާ އަތުން ފައިސާ ހޯދި މައްސަލައިގައި ޖަލަށް ލާން ހުކުމް ކުރި ހަ މީހުންގެ ތެރޭގައި ޕޮގްބާގެ ބޭބެ ހިމެނިއްޖެ އެވެ.
އުމުރުން 31 އަހަރުގެ ޕޮގްބާ ކުރިން ބުނެފައިވަނީ 2022 ވަނަ އަހަރު އޭނާގެ ބޮލުގައި ބަޑި ޖައްސާ ބިރު ދެއްކުމަށްފަހު އޭނާގެ ކުޑައިރުގެ އެކުވެރިންނާއި އޭނާގެ އެއްބަނޑު އެއްބަފާ ބޭބެ މަސައްކަތް ކުރީ 13 މިލިއަން ޔޫރޯ ހޯދުމަށް ކަމަށެވެ. ނަމަވެސް އޭނާ އަތުން އެވަގުތު އެމީހުންނަށް ހޯދިފައިވަނީ އެއް ލައްކަ ޔޫރޯ ކަމަށްވެސް ޕޮގްބާ ވަނީ ބުނެފަ އެވެ.
ޕޮގްބާގެ ބޭބެ މަތިއަސް ޕޮގްބާ ތިން އަހަރު ދުވަހަށް ޖަލަށް ލުމަށް އިއްޔެ ފްރާންސްގެ ކޯޓަކުން ހުކުމް ކޮށްފައިވާއިރު އޭނާ ވަނީ ވިހި ހާސް ޔޫރޯ އިން ޖުރިމަނާވެސް ކޮށްފަ އެވެ. އޭނާ ޖަލަށް ލުމަށް ހުކުމް ކުރި ނަމަވެސް ޖަލުގައި ހުރުމުގެ ބަދަލުގައި ޓެގް އެޅުވުމަށްފަހު ވަނީ ދޫކޮށްލާފަ އެވެ. މަތިއަސް ޕޮގްބާ ވަނީ 2022 ވަނަ އަހަރާއި ހަމަށް ފްރާންސްގެ ދަށް ފެންވަރުގެ ލީގު ތަކުގައި އެކި ކްލަބްތަކަށް ކުޅެފަ އެވެ.
މަތިއަސް ޕޮގްބާގެ އިތުރުން މި މައްސަލައިގައި ދެން ހުކުމް ކުރި ފަސް މީހުންނަށް އެކި ތުހުމަތުތައް ކުރެވިފައިވާއިރު އެމީހުން ވަނީ ފަސް އަހަރާއި އަށް އަހަރާއި ދެމެދުގެ މުއްދަތަށް ޖަލަށް ލުމަށް ހުކުމް ކޮށްފަ އެވެ.
އަލް ޖަޒީރާއަށް މިދިޔަ އަހަރު ޕޯލް ޕޮގްބާ ދީފައިވާ އިންޓަވިއު އެއްގައި އޭނާ ބުނެފައިވަނީ މި މައްސަލައާއި ގުޅިގެން އޭނާ ފުޓްބޯޅަ ކުޅުން ހުއްޓާލުމުގެ ވިސްނުންވެސް ގެންގުޅެފައިވާ ކަމަށެވެ. އަދި ފައިސާ އަކީ އެކުވެރިންނާއި އާއިލާ ތެރޭގައި މައްސަލަ ޖެހޭ އެއްޗެއްގެ ގޮތުގައި އޭނާ ވަނީ ސިފަ ކޮށްފަ އެވެ.
އިޓަލީގެ ޔުވެންޓަސް އަށް ކުޅެމުންދިޔަ ޕޮގްބާ މަނާ ބޭހަށް ޕޮޒިޓިވްވެ ހަތަރު އަހަރު ދުވަހަށް ދާދި ފަހުން ވަނީ ސަސްޕެންޑްކޮށްފަ އެވެ. ނަމަވެސް އޭނާ އެ މައްސަލަ އިސްތިއުނާފު ކުރުމުން އޭނާގެ ސަސްޕެންޝަނުގެ މުއްދަތު ވަނީ 18 މަސް ދުވަހަށް ކުޑަކޮށްފަ އެވެ.