ފުޓްބޯޅައިގެ ފޯރި ގަދަކުރުމުގެ އަމާޒުގައި ރާއްޖޭގައި ބާއްވާ ނައިންޓީ ޕްލަސް ގޯލްޑް ކަޕް 2024 ގައި ބުރާސްފަތި ދުވަހުގެ ރޭ ކުޅުނު ކުއާޓާފައިނަލުގެ ފަހު މެޗުގައި މާފުށި 3-0 ގެ ނަތީޖާއަކުން ކަޓުވާލުމަށްފަހު އައްޑޫ ސިޓީން ސެމީގެ ފަހު ޖާގަ ކަށަވަރުކޮށްފިއެވެ.
ވާދަވެރި އަދި އެހާމެ ފޯރިގަދަ ކުޅުމެއް ފެނިގެން ދިޔަ މި މެޗުގައި އައްޑޫ ސިޓީގެ ފުރަތަމަ ލަނޑު ކާމިޔާބުކޮށްދީ އެ ޓީމަށް ލީޑް ނަގައިދިނީ މި މެޗުގެ މޮޅު ކުޅުންތެރިޔަކަށް ހޮވުނު އިސްމާއިލް އީސާ އެވެ. އެއީ މެޗުގެ 71 ވަނަ މިނިޓްގައި އޭރިއާ ކައިރިން ލިބުނު ހިލޭ ޖެހުމަކުން އޭނާ ޖަހާދިން ލަނޑެކެވެ.
ދެވަނަ ލަނޑު ޖެހީ މެޗުގެ 75 ވަނަ މިނިޓުގައެވެ. މިއީ އިބްރާހިމް ވަހީދު ހަސަން ނަގައިދިން ކޯނަރެއް ކީޕަރު އަތުގައި ޖެހިފައި، ގޯލު ދަނޑީގައި ޖެހިފައި ނިކުތުމުން، މުހައްމަދު ހާޒިމް ރިފްއަތު މަޑުމަޑުން ފޮނުވާލި ބޯޅައަކުން ކާމިޔާބުކުރި ލަނޑެކެވެ.
އައްޑޫ ސިޓީއަށް ތިންވަނަ ލަނޑު ކާމިޔާބު ކުރެވުނީ މެޗުގެ ފުރިހަމަ ވަގުތުގެ ކުޅުން ނިމި އިތުރު ވަގުތުގައެވެ. މިއީ އިބްރާހިމް މަހުދީ ހުސެއިން (ފޭދޫ އިއްބެ) ހުރަސްކޮށް ދިން ބޯޅައަކުން އައްޑޫގެ އިބްރާހިމް ވަހީދު ހަސަން ކާމިޔާބުކުރި ލަނޑެކެވެ..
މެޗުގެ 91 ވަނަ މިނިޓްގައި ޖެހި ތިންވަނަ ލަނޑާއެކު މި މެޗު ނިމިފައިވާއިރު، މާފުއްޓަށްވެސް ލަނޑު ޖަހާނެ ރަނގަޅު ފުރުސަތުތަކެއް ލިބި ވަނީ ބޭކާރުވެފައެވެ. މެޗު ފަށައިގެން ގިނަ އިރުތަކެއް ނުވަނީސްވެސް މާފުށިން ގެންދިޔައީ އައްޑޫ ސިޓީގެ ގޯލަށް ނުރައްކާތެރި ހަމަލާތަކެއް ފޮނުވަމުންނެވެ. އެހެންނަމަވެސް ދެ ހާފް ނިމިގެންދިޔައިރުވެސް މާފުއްޓަށް ލަނޑެއް ކާމިޔާބު ކުރެވޭ ގޮތެއް ނުވެއެވެ.
ނައިންޓީ ޕްލަސް ގޯލްޑް ކަޕް 2024 ގައި ދެން އޮންނާނީ ސެމީ ފައިނަލްގެ މެޗުތަކެވެ. ސެމީފައިނަލްގެ ފުރަތަމަ މެޗުގައި ނިކުންނާނީ އޭދަފުއްޓާއި މާލެ ސިޓީ ހޮނިހިރު ދުވަހު ހަވީރު 3:50 ގައެވެ. އެރޭ 8:50 ގައި ސެމީގެ ދެވަނަ މެޗުގައި ބައްދަލުކުރާނީ އައްޑޫ ސިޓީއާއި ރ. އަލިފުއްޓެވެ.