ކެބިނެޓްގައި ކުރެވޭ މަޝްވަރާއާ ހަމައަށް ކައުންސިލްތަކުގެ ވާހަކަތައް ގެނައުމަށް މަގުފަހިކޮށްދިނީ އަދުގެ ސަރުކާރުންކަމަށް ޚާރިޖީ ވަޒީރު ޑރ. އަބްދުﷲ ޚަލީލް ވިދާޅުވެއްޖެއެވެ. ވަޒީރު މިހެން ވިދާޅުވީ، ކަންގަތި އެވޯޑް ދިނުމަށް ބޭއްވި ހަފްލާގައި ވާހަކަދައްކަވަމުންނެވެ.
ކަންގަތި އެވޯޑަކީ ލޯކަލް ކައުންސިލް ޕާރފޯމަންސް އިންޑެކްސްއިން އެންމެ މަތީ ވަނަ ހާސިލްކުރާ ކައުންސިލްތަކަށް ދެމުން އަންނަ އެވޯޑެކެވެ. 2015 ވަނަ އަހަރުން ފެށިގެން އެލްޖީއޭއިން އަންނަނީ މި އެވޯޑް ދެމުންނެވެ.
ކަންގަތި އެވޯޑް ދިނުމަށް ބޭއްވި ހަފްލާގައި ވާހަކަފުޅުދައްކަވަމުން ޚާރިޖީ ވަޒީރު ޑރ. އަބްދުﷲ ޚަލީލް ވިދާޅުވީ، މީގެކުރިން ކައުންސިލްތަކުގެ އޮންނަ އެންމެ ބޮޑު ޝަކުވާއަކީ މައި ސަރުކާރާއި އޮންނަ ގުޅުން ކުޑަވުންކަމަށެވެ. ނަމަވެސް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވެރިކަމާއި ހަވާލުވެވަޑައިގެންނެވުމަށްފަހު ކައުންސިލްތަކާއި ގާތުން މަސައްކަތް ކުރައްވަމުން ގެންދަވާކަމަށެވެ.
ވަޒީރު ޚަލީލު ވިދާޅުވީ، ކައުންސިލްތަކާއި ގާތުން މަސައްކަތްކުރެއްވުމަށް މި ސަރުކާރުން ވަކިން ޚާއްސަ ވުޒާރާއެއް އުފައްދަވާފައިވާކަމަށެވެ. މިއާއިއެކު ސަރުކާރަށް އަންނަ މެސެޖް ވަރަށް ޕޮޒިޓިވްކަމަށް ވަޒީރު ވިދާޅުވިއެވެ. ސަރުކާރާއި ހަމައަށް ކަންކަން ގެނައުމަށް މިއަދު ކައުންސިލްތަކަށް ވަރަށް ބޮޑަށް ފަސޭހަވެފައިވާކަމަށް ވަޒީރު ޚަލީލު ވިދާޅުވިއެވެ.
"ކައުންސިލްތަކަށް މިއަދު ވަރަށް ބޮޑުތަން ފަސޭހަވެއްޖެ ސަރުކާރާއި ހިސާބަށްދާން. ސަރުކާރާއި ހިސާބަށް ކަންކަން ގެންނަން. ޚާއްސަ ގޮތެއްގައި ކެބިނެޓާއި ހިސާބަށް، ކެބިނެޓްގައި ކުރެވޭ މަޝްވަރާގެ މޭޒަށް ކައުންސިލްތަކުގެ ވާހަކަތައް ގެންނަން. އެހެންވީމަ ލޯކަލް ގަވަމަންޓް ނިޒާމެއް ހަރުދަނާވުމުގައި ޖުމްލަކޮށް މި އެކުލެވިގެންވަނީ ކައުންސިލްތަކާއި އަދި އޭގެ އިތުރުން މައި ސަރުކާރާއި އެކުލެވިގެން ކުރެވޭ މަސައްކަތްތަކެއްގެ ތެރެއަށް. އެއަށް ރައްޔިތުން ބޭނުންވާ ކަންކަން އަޅުގަނޑުމެން މި އިންކޯޕަރޭޓް ކުރަނީ. ރައްޔިތުންގެ މުހުތާދުތައް ތަންފީޒްކުރުމަށްޓަކައި އެނިޒާމްގެ ތެރެއިން އަޅުގަނޑުމެން ކަންކަން ކުރެވޭތޯ މަސައްކަތް ކުރަމުން މިގެންދަނީ" ވަޒީރު ޚަލީލް ވިދާޅުވިއެވެ.
ކަންގަތި އެވޯޑް ހަފްލާގައި 2023 ވަނަ އަހަރުގެ ލޯކަލް ކައުންސިލް ޕަރޕޯމަންސް އިންޑެކްސްއިން 1 ވަނަ ހާސިލްކޮށްފައިވާ އަތޮޅު ކައުންސިލްއަކީ ހައްދުންމަތީ އަތޮޅު ކައުންސިލްއެވެ. އަދި 1 ވަނަ ހާސިލްކޮށްފައިވާ ރަށު ކައުންސިލަކަށް ހޮވިފައިވަނީ އަރިއަތޮޅު އުތުރުބުރީ ބޮޑުފުޅުދޫ ކައުންސިލެވެ.