މައްސަލަޖެހިގެން އުޅޭ ބިންވެރިޔާ ސްކީމްގެ ލިޔެކިޔުންތައް ދޫކޮށްފައިވަނީ ނިމިދިޔަ ސަރުކާރުގައި: ފުލުހުން
-
މައްސަލަ އުފެދިގެން އުޅެނީ 3 ސްލޮޓެއް ހޯދުމަށް ހުށައަޅާފައިވާ ލިޔުންތަކުގައި
-
ބައެއް ސްލޮޓްތަކަށް އެކަށްވުރެ ގިނަ މީހުން ހުށަހަޅާފައިވޭ
މައްސަލަޖެހިގެން އުޅޭ ބިންވެރިޔާ ސްކީމްގެ ލިޔެކިޔުންތައް އެޗްޑީސީއަށް ހުށަހަޅާފައިވަނީ ބިންވެރިޔާ ސްކީމްގެ ދަށުން ގޯތި ހޯދުމަށް ހުށަހަޅާފައި ނުވާ ފަރާތްތަކެއްކަން ތަހުޤީގަށް ފާހަގަވެފައިވާކަމަށް ދިވެހި ފުލުހުންގެ ޚިދުމަތުން ވިދާޅުވެއްޖެއެވެ.
ފުލުހުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ސެންޓްރަލް އިންވެސްޓިގޭޝަން ކޮމާންޑްގެ ހެޑް، އެސިސްޓަންޓް ކޮމިޝަނަރ އޮފް ޕޮލިސް އަބްދުﷲ ޝަރީފް ވިދާޅުވީ، ބިންވެރިޔާ އަދި ގެދޮރުވެރިޔާ ސްކީމްގެ ލިސްޓުގައި ނެތް މީހުން ސައްހަ ނޫން ލިޔެކިޔުންތައް ހޯދައިގެން ގޯތި ހޯދަން މަސައްކަތްކޮށްފައިވާކަމަށެވެ. އެގޮތުން 3 ސްލޮޓެއް ހޯދުމަށް ހުށައަޅާފައިވާކަން މިހާތަނަށް ތަހުޤީޤަށް ފާހަގަވެފައިވާކަމަށްވެސް ޝަރީފް ވިދާޅުވިއެވެ.
ޝަރީފް ވިދާޅުވީ، ބައެއް ލޮޓްތަކަށް އެއް ފަރާތަކަށްވުރެ ގިނަ ފަރާތް ހުށައަޅާފައިވާކަމަށާއި، އަދި އެކަމާއި ގުޅިގެން އެއީ ސައްހަ ލިޔެކިޔުންތަކެއްތޯ ބެލުމަށް އެޗްޑީސީން ހައުސިން މިނިސްޓްރީގައި އެދިފައިވާކަމަށެވެ. އަދި އެ ބުނާ ލިޔެކިޔުންތަކަކީ ބިންވެރިޔާގެ ލިސްޓުގައި ނުހިމެނޭ ފަރާތްތަކަކުން ހުށަހަޅާފައިވާ ލިޔެކިޔުންތަކެއްކަމަށް ހައުސިން މިނިސްޓްރީން ހާމަކޮށްފައިވާކަމަށްވެސް ޝަރީފް ވިދާޅުވިއެވެ.
"އަޅުގަނޑުމެންނަށް މިހާހިސާބަށް ކުރެވުނު ތަހުޤީގުން މި ފަރާތްތަކާއި ސުވާލުކުރެވި މަސައްކަތް މިދަނީ ކުރަމުން. ސުވާލުކުރިއިރު ފާހަގަކުރެވުނީ ކުރިމަތިލާފައި ހުރި ފަރާތްތަކުންވެސް ޝަރުތު ހަމަނުވާކަމަށް ނިންމީމައި އެކަން ގަބޫލުނުކުރެވިގެން އޭރުގެ ހައުސިން މިނިސްޓްރީގައި އިސްވެރިންނާއި ބައްދަލުކުރަން މަސައްކަތްކޮށްފައި ހުރިކަން." އަބްދުﷲ ޝަރީފް ވިދާޅުވިއެވެ.
ޝަރީފް ވިދާޅުވީ މިހާތަނަށްް ބެލިބެލުމުން މައްސަލަ އުފެދިގެން އުޅޭ ލިޔެކިޔުންތައް ދޫކޮށްފައިވަނީ މިދިޔަ ސަރުކާރުގައިކަމަށެވެ.
"އަޅުގަނޑުމެންނަށް މިހާތަނަށް ފާހަގަވީ އަދި ސުވާލުކުރެވުނު ފަރާތްތަކުން ދީފައިވާ މައުލޫމާތުންވެސް ހާމަވީ މިފަރާތްތަކަށް ލިބިފައި ހުރި ޑޮކިއުމެންޓްތަކަކީ ކުރީ ދައުރުގައި އެ ބޭފުޅުންނަށް ލިބިފައި ހުރި ޑޮކިއުމެންޓްތަކެއްކަމަށް" ޝަރީފް ވިދާޅުވިއެވެ.
މި މައްސަލައިގައި އެއްވެސް މުވައްސަސާއަކުން އިހުމާލުވެފައިވޭތޯ ބަލަމުންދާކަމަށްވެސް ފުލުހުން ވިދާޅުވެއެވެ. އަދި މަގާމުގެ ނުފޫޒު ފޯރުވާފައިވޭތޯ ބެލުމަށް ތަހުޤީގު ކުރިއަށްގެންދާނެކަމުގެ ޔަޤީންކަން ފުލުހުން ވަނީ ދެއްވާފައެވެ.