ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑްކަޕް 2024 ކުއާޓާ ފައިނަލުގައި ޕެނަލްޓީ ޖަހައިގެން ފުވައްމުލަކު ސިޓީ ބަލިކޮށް މުބާރާތުގެ ސެމީ ފައިނަލުން ރ.އަލިފުށި ޖާގަ ހޯދައިފިއެވެ.
ގައުމީ ފުޓްބޯޅަ ދަނޑުގައި މިއަދު ކުޅުނު މެޗުގެ ފުރިހަމަވަގުތު ހަމަވިއިރު 2-2 ގެ ނަތީޖާއަކުން ދެ ޓީމު ވަނީ އެއްވަރުވެފައެވެ. ނަތީޖާ ނެރުމަށް ޖެހި ޕެނަލްޓީ ޝޫޓްއައުޓްގަ އަލިފުށިން ކުރިހޯދީ 6-5 ނަތީޖާއަކުންނެވެ.
ފޯރިގަދަ ކުޅުމެއް ފެނިގެންދިޔަ މެޗުގެ ފުރަތަމަ ލަނޑު ޖަހާ އަލިފުށިން ކުރިހޯދީ ހުސެއިން ނިހާން ކާމިޔާބުކުރި ލަނޑުންނެވެ. ފުވައްމުލަކުން އެއްވަރުކުރީ ހުސެއިން ޝަރީފް ކާމިޔާބުކުރި ލަނޑުންނެވެ. ފުރަތަމަ ހާފު ނިމުމުގެ ކުރިން ފުވައްމުލަކަށް ލީޑު ނަގައިދިނީ އެޓީމުގެ ބިދޭސީ ކުޅުންތެރިޔާ އަހުމަދު މަހުމޫދް ފައްތާހު ނަގައިދިން ހިލޭ ޖެހުމަކުން އަލިފުށީ ނިހާން ބޮލުގަ ޖެހިފަ ގޯލަށް ވަނުމުންނެވެ.
މެޗުން ފުވައްމުލަކު މޮޅުވާން ދަނިކޮށް އަލިފުށިން އެއްވަރުކުރީ މެޗުގެ ފަހުބައިގަ އަހުމަދު ސަމީޒް ކާމިޔާބުކުރި ލަނޑުންނެވެ. ޕެނަލްޓީގައި ފުވައްމުލަކުގެ ފަސް ޕެނަލްޓީ ތެރެއިން ދެ ޕެނަލްޓީ ނާކާމިޔާބުވި އެވެ. އަލިފުށިން ވަނީ ފަސް ޕެނަލްޓީގެ ތެރެއިން ހަތަރު ޕެނަލްޓީ ކާމިޔާބުކޮށްފައެވެ. ފުވައްމުލަކުގެ ފުރަތަމަ ޕެނަލްޓީ ސާދު ނިޒާރު ނާކާމިޔާބު ވިއިރު އަލިފުށިން ފޮނުވާލި ޕެނަލްޓީ އަހުމަދު ވިޖުދާން އަތުން ވެސް ވަނީ ނާކާމިޔާބުވެފައެވެ. ދެން ފުވައްމުލަކުން ފައްތާޙު ޖެހި ޕެނަލްޓީވެސް ވަނީ ނާކާމިޔާވެފައެވެ.