ކުރިއަށް އޮތްތަނުގައި ދުންފަތުގެ އިސްތިއުމާލުކުރުން މަނާ ތަންތަން އިތުރުވާނެ: ސިއްޙީ ވުޒާރާ

ދުންފަތުގެ ދުމުން މުޖުތަމަޢު ރައްކާތެރިކުރުމަށް އެކުލަވާލާ ޤަވާއިދާއެކު ދުންފަތުގެ އިސްތިޢުމާލު ނުކުރެވޭނެކަމަށް ކަނޑައަޅާފައިވާ ތަންތަން އިތުރުވެގެންދާނެކަމަށް ސިއްޙީ ވުޒާރާއިން ވިދާޅުވެއްޖެއެވެ.

ސިއްޙީ ވުޒާރާއިން ވިދާޅުވީ ދުންފަތުގެ ދުމުން މުޖުތަމަޢު ރައްކާތެރިކުރުމަށް އެކުލަވާލާ ޤަވާާޢިދުގެ ޑްރަފްޓް މިހާރު ނިމިފައިވާކަމަަށެވެ.

ޕީއެސްއެމްއާއި ސިއްހީ ވުޒާރާއާ ގުޅިގެން ގެނެސްދޭ "ދަފަރާ" ޕެނަލް ޑިސްކަޝަންގައި ސިއްހީ ވަޒީރުގެ ނައިބް އަލްއުސްތާޛު އިސްމާއިލް ޒާހިރު ވިދާޅުވީ ދުންފަތުގެ ދުމުން މުޖުތަމަޢު ރައްކާތެރިކުރުމަށް އެކުލަވާލާ ޤަވާއިދަށް ހިޔާލު ހޯދާ ނިމިފައިވާކަމަށެވެ. އަދި ޤަވާއިދުގެ ޑްރަފްޓް ނިމިފައިވާއިރު ޤަވާޢިދު ގެޒެޓް ކުރުމުން ދުންފަތުގެ އިސްތިއުމާލުކުރެވޭނެ ތަންތަނާއި ނުކުރެވޭނެ ތަންތަނަށް ބޮޑެތި ބަދަލުތަކެއް އަންނާނެއެވެ. އެގޮތުން ދުންފަތުގެ އިސްތިޢުމާލު ނުކުރެވޭނެ ތަންތަން އިތުރު ވެގެންދާނެކަމަށް އޭނާ ވިދާޅުވިއެވެ.

ޒާހިރު ވިދާޅުވީ ގަވާޢިދު އާއްމުކުރާ ހިސާބުން ޤާނޫނު ތަންފީޒުކުރާ އިދާރާތަަކަށްވެސް، މި ޤާނޫނު ތަންފީޒުކުރުމަށް ކުރަންޖެހޭ ކަންކަން ފަސޭހަވެގެންދާނެކަމަށެވެ.

"ދުންފަތް ކޮންޓްރޯލް ކުރުމަށް ޤާނޫނަށް ގެނެވުނު އިސްލާހާގުޅިގެން އަތޮޅުތަކުގައި އާންމުން ހޭލެންތެރިކުރުމަށް، ކައުންސިލްތަކާއި، އަންހެނުންގެ ތަރައްޤީއަށް މަސައްކަތް ކުރާ ކޮމިޓީ، އަދި ޖަމިއްޔާތަކާ ގުޅިގެން މަސައްކަތް ދަނީ ކުރަމުން. ސަރުކާރުގެ މުޢައްސަސާތަކުގެ ކަމާގުޅޭ ފަރާތްތައް އަހުލުވެރި ކުރުމާއި އެފަރާތްތަކާ ގުޅިގެން މަސައްކަތްތަކެއް ދަނީ ކުރަމުން." ސިއްހީ ވަޒީރުގެ ނައިބް އަލްއުސްތާޛު އިސްމާއިލް ޒާހިރު ވިދާޅުވިއެވެ.

ދުންފަތާ ދުރުހެލިވާން ބޭނުންވާ ފަރާތްތަކަށް ސިއްޙީ ވުޒާރާއިން ވަނީ 24 ގަޑިއިރު ޚިދުމަތް ލިބޭނެ ކުއިޓްލައިނެއް ޤައިމްކޮށްފައެވެ. 1676 މި ނަންބަރުން ދުންފަތަށް ދެވި ހިފާފައިވާ ފަރާތްތައް އެކަމުން ދުރުހެލިވުމަށް މަގުފަހިކޮށްދިނުމަށް އެހީތެރިވެދޭނެއެވެ.