އަމާންކަން ދެމެހެއްޓުމަށް ފުލުހުން ކުރާ މަސައްކަތް މިދައުރުގެ ތެރޭގައި އިތުރު: ވަޒީރު ޑރ.ޝަހީމް

މުޖުތަމަޢުގައި އަމާންކަން ދެމެހެއްޓުމަށް ދިވެހި ފުލުހުންގެ ޚިދުމަތުންކުރަމުންދާ މަސައްކަތްތައް މި ދައުރުގެ ތެރޭގައި އިތުރުވެފައިވާކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

ވަޒީރު މިހެން ވިދާޅުވީ ދިވެހި ފުލުހުންގެ ޚިދުމަތާއި އިސްލާމީ ކަންތައްތަކާ ބެހޭ ވުޒާރާއާ ދެމެދު ގުޅުންބަދަހިކުރުމުގެ ފަހުމުނާމާއެއްގައި ސޮއިކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.

ފުލުހުންނާއި އިސްލާމީ ކަންތައްތަކާ ބެހޭ ވުޒާރާއާ ދެމެދު ފަހުމުނާމާގައި ސޮއިކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވީ ދިވެހި މުޖުތަމަޢުގައި އަމާންކަން ދަމަހައްޓައި، ދީނީގޮތުން އެއްބައިވަންތަ މުޖުތަމަޢެއްގެ ގޮތުގައި ދިވެހި މުޖުތަމަޢު ނެގެހެއްޓުމަށް ކުރިއަށްވުރެ ގިނަ މަސައްކަތްތަކެއް ފުލުހުންކުރަމުންގެންދަވާ ކަމަށެވެ. އަދި ފުލުހުންގެ މި މަސައްކަތުގައި އިސްލާމީ ކަންތައްތަކާބެހޭ ވުޒާރާއިން ދެވެން އޮތް އެހީތެރިކަމެއް ދެއްވާނެކަމުގެ ޔަޤީންކަން ވަޒީރު ދެއްވިއެވެ.

ވަޒީރު ޝަހީމް ވިދާޅުވީ ދުނިޔޭގެ އެހެން ޤައުމުތަކެކޭވެސް އެއްގޮތަށް ދިވެހިރާއްޖޭގައިވެސް އިސްލާމް ދީނުގެ ތެރެއިން އުފަންވާ "ހަރުކަށި ފިކުރު" ޤަބޫލުކުރާ މަދު ބަޔަކު ދިރިއުޅޭ ކަމަށެވެ. އަދި އެމީހުން ދީނީގޮތުން ހޭލުންތެރިކުރުވައި، އިސްލާމީ އެއްބައިވަންތަކަން ޤާއިމްކުރުމަށް ކުރިއާއި މިހާރުވެސް ގިނަ މަސައްކަތްތަކެއް ފުލުހުންނާ ގުޅިގެން ކުރަމުންގެންދާކަން ވަޒީރު ފާހަގަކުރެއްވިއެވެ.

"ވުޒާރާއިން މަސައްކަތްކުރަމުންދަނީ ހެޔޮ ރަނގަޅު ފިކުރުތައް ޤާއިމްކުރުމަށް. ޚިޔާލު ތަފާތުވުންތަކުގައި ހުންނަ މައްސަލަތަކުގައި ބަހުސްކޮށްގެން ރަނގަޅުކުރުމަށް މަސައްކަތްކުރިން. ރާއްޖޭގައި ވަކިން ޖަމާޢަތް ހަދައިގެން ނަމާދުކުރުންފަދަ ކަންކަން ގުރޫޕު ހަދައިގެންކުރި. ދެ މުއައްސަސާ ގުޅިގެން ވަރަށް ގިނަ މަސައްކަތްތަކެއް ކުރިން މިކަން ހުއްޓުވުމަށް." ވަޒީރު ވިދާޅުވިއެވެ.

މިރަސްމިއްޔާތުގައި ވާހަކަދައްކަވަމުން ކޮމިޝަނަރ އޮފް ޕޮލިސް ޢަލީ ޝުޖާޢު ވިދާޅުވީ މުޖުތަމަޢުގައި އަމާންކަން ޤާއިމްކުރުމުގެ މޭންޑޭޓާ އެއްގޮތަށް ހޭލުންތެރިކުރުމަށްވެސް ގިނަ ޕްރޮގުރާމްތައް ހިންގާފައިވާ ކަމަށެވެ. އަދި މިއިން ކޮންމެ ޕްރޮގުރާމެއްގައި ދީނީ ބައެއް ހިމެނޭކަން ފާހަގަކުރައްވައި، މިފަދަ ޕްރޮގުރާމްތަކަށް ވުޒާރާއިން ދެއްވާ އެހީތެރިކަމަށް ސީޕީ ޝުކުރުއަދާކުރެއްވިއެވެ.

ސީޕީ ވިދާޅުވީ ފުލުހުންގެ މެދުގައ ދީނީ ހޭލުންތެރިކަން އިތުރުކުރުމަށް އިސްލާމީ ކަންތައްތަކާ ބެހޭ ވުޒާރާއާއެކު ޚާއްސަ ޕްރޮގުރާމެއް ކުރިއަށްގެންދިއުމަށް ނިންމަވާފައިވާ ކަމަށެވެ.

"އަޅުގަނޑުމެން މިހާރު އިންތިޒާރުކުރަމުންދަނީ ފުލުހުންނަށް ހިންގާ ދީނީ ޕްރޮގުރާމް ފެށޭނެ ދުވަހަކަށް. މި ޕްރޮގުރާމްގެ ސަބަބުން ފުލުހުންގެ ޚިދުމަތް އަދާކުރަމުންދާއިރު، ދީނީ ގޮތުން ހޭލުންތެރިވުމުގެ ސަބަބުން ޚިދުމަތް އަދާކުރުމުގައި ފަސޭހަތަކެއް ލިބޭނެ. އަދި މުޖުތަމަޢުގައި އަމަން އަމާންކަން ޤާއިމްކުރުމަށްވެސް ފަސޭހަވާނެ." ސީޕީ ވިދާޅުވިއެވެ.

ފުލުހުންނާއި، އިސްލާމީ ކަންތައްތަކާ ބެހޭ ވުޒާރާއާ ދެމެދު ވެވުނު މިފަހުމުނާމާގައި އިސްލާމީ ކަންތައްތަކާ ބެހޭ ވުޒާރާގެ ފަރާތުން ސޮއިކުރެއްވީ ވަޒީރު ޑރ. މުޙައްމަދު ޝަހީމް ޢަލީ ސަޢީދެވެ. ފުލުހުންގެ ފަރާތުން ސޮއިކުރެއްވީ ކޮމިޝަނަރ އޮފް ޕޮލިސް ޢަލީ ޝުޖާޢެވެ.

މި ފަހުމުނާމާގެ ދަށުން އެކި ދާއިރާތަކުން ދެ މުއައްސަސާގެ ދެމެދުގައި އެހީތެރިކަން ބަދަލުކުރުމަށް ވަނީ ހަމަޖެހިފައެވެ.