ކުއްލި ގޮތަކަށް ނިމުމަކަށް އައިސްފައިވާ ސޫރިޔާގެ ކުރީގެ ރައީސް ބައްޝާރް އަލް-އަސަދުގެ ވެރިކަމުގެ ފަހު ވަގުތުކޮޅު ކަންތައްތައް ހިނގައި ދިޔަ ގޮތް އޭނާ ކިޔައިދެއްވައިފިއެވެ.
އަސަދާއި އޭނާގެ ޢާއިލާ، ސޫރިޔާ ދޫކޮށް ފިއްލަވައިގެން ވަޑައިގަންނަވާފައި ވަނީ، ހަޔިއަތު ތަޙްރީރް އަލް-ޝާމް (އެޗްޓީއެސް) އަދި އެ ޤައުމުގައި ޙަރަކާތްތެރިވާ ހަތިޔާރު އެޅި އެހެން ޖަމާޢަތްތަކުން ނުރައްކާތެރި ޢުދުވާނެއް ފަށައި، ވެރިރަށް ދިމިޝްޤަށް ވެރިވެގަތުމާ އެކުގައެވެ. އޭގެ ފަހުން އެ ޤައުމުގެ އަސްކަރިއްޔާއިން ވަނީ އަސަދުގެ 24 އަހަރުވީ ދިގު ވެރިކަން ނިމުމަކަށް އައިސްފައިވާކަން އިޢުލާނު ކޮށްފައެވެ.
ވެރިކަން ވެއްޓުނު ފަހުން ނެރުއްވި ފުރަތަމަ ބަޔާނުގައި ބައްޝާރު ވިދާޅުވީ އިދިކޮޅު ހަނގުރާމަވެރިން ވެރިރަށް ދިމިޝްޤަށް ވަދެގަތުމުން އޭނާއަށް ވާގިވެރިވާ ރަޝިޔާގެ ބައިވެރިންނާއެކު ހަނގުރާމައިގެ ކަންކަން ރާއްވަވައި ކުރިއަށް ގެންދިޔުމަށް ދިމިޝްޤް ދޫކުރައްވައި އެ ޤައުމުގެ އަލްލާޒިޤިއްޔާއަށް ވަޑައިގެންނެވި ކަމަށެވެ. އެ ދުވަހު ހެނދުނު ސޫރިޔާގެ ޙުމީމީމުގައި ހުންނަ ރަޝިޔާގެ ވައިގެ މަރުކަޒަށް ވަޑައިގަތުމުން ސޫރިޔާގެ އަސްކަރިއްޔާއިން ހަނގުރާމައިގެ ކުރީސަފުތައް ދޫކޮށް ގޮސްފައިވާ ކަމަށާއި އަސްކަރީ މަޤާމުތަކުގެ ބާރު ގެއްލިފައިވާކަން ކަށަވަރުވި ކަމަށް އަސަދު ވިދާޅުވިއެވެ. އެއަށް ފަހު ޙުމީމީމަށް އިދިކޮޅު ހަނގުރާމަވެރިން ވަރުގަދަ ޑްރޯން ޙަމަލާތަކެއް ދޭން ފެށުމުން، ވައިގެ ސަރަޙައްދު ދޫކޮށް ދެވޭނެ އިތުރު މަގެއް ނެތްކަމަށް ފެނުމުން، ވަގުތުން އޭނާ ރަޝިޔާއަށް ގެންދިޔުމަށް އެ ޤައުމުގެ ސަރުކާރުން އަންގާފައިވާ ކަމަށް އަސަދު ވިދާޅުވިއެވެ.
ސޫރިޔާގެ 13 އަހަރުވީ ދިގު އަހުލީ ހަނގުރާމައިގައި އޭނާއަށް އެންމެ ވާގިވެރިވި ރަޝިޔާގެ ޙިމާޔަތުގެ ދަށުގައި މިހާރު ހުންނެވި އަސަދު ވިދާޅުވީ އެ ކަންކަން ހިނގައި ދިޔައިރު އިސްތިޢުފާ ދެއްވުމަށް ނުވަތަ ބައެއްގެ ޙިމާޔަތް ހޯއްދަވަން އެއްވެސް ވަރަކަށް ނުވިސްނަވައި ކަމަށެވެ. ނަމަވެސް ބައެއް ނޫސްތަކުން ވަނީ ސޫރިޔާ ދޫކޮށް ދިޔުމަށް އަސަދު ދުރާލައި ރާއްވަވަމުން ދިޔަ ކަމަށާއި އޭނާގެ ރޭވުންތައް ތިމާގެ މީހުން ހިމެނޭ ގޮތަށް އެއްވެސް މީހަކާ ޙިއްޞާ ކުރައްވާފައި ނުވާ ކަމަށް ބުނެފައެވެ.