ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގެ ދެވަނަ ބުރުގައި މާލޭ ސިޓީ އަތުން ހޯދި މޮޅާއެކު ރ. އަލިފުއްޓަށް ގްރޫޕުގެ އެއްވަނަ ލިބުމާއެކު, ކުއާޓާގައި ފުވައްމުލައް ސިޓީއާ ބައްދަލުކުރަން ޖެހިއްޖެއެވެ.
ގައުމީ ފުޓްބޯޅަ ދަނޑުގައި މިއަދު ހަވީރު ކުޅުނު މެޗު އަލިފުށިން ކާމިޔާބުކޮށްފައިވަނީ 3-1 ގެ ނަތީޖާއަކުންނެވެ. މި މެޗަކީ އިއްޔެ ހަވީރު ކުޅުމަށް އެންމެ ފުރަތަމަ ތާވަލުކުރި މެޗެކެވެ. އެކަމަކު މިދިޔަ ބުރާސްފަތި ދުވަހުގެރޭ ޅ. ކުރެންދުއާ ދެކޮޅަށް ކުޅުނު މެޗުގައި މާލެ ސިޓީއަށް ނިސްބަތްނުވާ ދެ ކުޅުންތެރިއަކު ލައްވާ ކުޅުވާފައިވާ މައްސަލައާ ގުޅިގެން މި މެޗު ވަނީ ފަސްކޮށްފައެވެ.
އެގޮތުން މާލެ ސިޓީގެ ސްކޮޑުގައި ހިމެނޭ އަޙްމަދު މާއިޝް ރަޝީދާއި, އަޙްމަދު ނާހިލް އިބްރާހީމްގެ އައި.ޑީ ކާޑުގައިވާ ގޮތުން އެ ދެ ކުޅުންތެރިންގެ ރަޖިސްޓަރީ އޮންނަނީ ދ. ހުޅުދެލީގައެވެ. އެއާއެކު ކުރެންދޫން އެ މައްސަލަ ހުށަހެޅުމާއެކު، އެންމެ ފުރަތަމަ މައްސަލަ ނިންމާފައިވަނީ މާލެ ސިޓީއާ ދެކޮޅަށެވެ. އެކަމަކު އޭގެ ފަހުން މާލެ ސިޓީން މައްސަލަ އިސްތިއުނާފް ކުރުމާއެކު، ގޯލްޑް ކަޕުގެ ކޮމިޓީން ނިންމާފައިވަނީ މާލޭގެ ކުޅުންތެރިންގެ ކަންކަން އޮތީ ރަނގަޅަށް ކަމަށެވެ.
މިއަދު ކުޅުނު މެޗުގައި އަލިފުށިން ލަނޑުތައް ޖަހާފައިވަނީ މާލެ ސިޓީން ލަނޑެއް ޖަހާފައިވަނިކޮށް ފަހަތުން އަރައެވެ. އެގޮތުން މާލެ ސިޓީން މެޗުގެ ލީޑު ނަގާފައިވަނީ މެޗު ފަށައިގެން ދެވަނަ މިނިޓުގައެވެ. މިއީ ކޯނަަރަކުން ތަޖުރިބާކާރު ޑިފެންޑަރު އަލީ ޝަރީފް ކާމިޔާބުކޮށްދިން ލަނޑެކެވެ. މި ލަނޑަށްފަހު މާލެ ސިޓީއަށް ލީޑު ފުޅާކުރަން ޕެނަލްޓީއެއްވެސް ލިބުނެވެ. އެކަމަކު އަލިފުށީގެ އޭރިއާ ތެރެއިން އެ ޓީމުގެ ކެޕްޓަން މުޙައްމަދު ރަޝީދު، މާލެ ސިޓީގެ އަލީ ޝިޔާހުއަށް ކުރި ފައުލަކަށް ދިން މި ޕެނަލްޓީ ކާމިޔާބުކުރެވޭ ގޮތް ވަނީ ނުވެފައެވެ.
މި މެޗުގައި އަލިފުށިން ނަތީޖާ އެއްވަރުކުރި ލަނޑު ޖަހާފައިވަނީ ފުރަތަމަ ހާފުގެ ފުރިހަމަ ވަގުތު ހަމަވާން ތިން މިނެޓަށްވެފައި ވަނިކޮށެވެ. މިއީ ހިލޭ ޖެހުމަކުން މުޙައްމަދު ރަޝީދު ކާމިޔާބުކުރި ލަނޑެކެވެ.
މި މެޗުގެ ދެވަނަ ހާފުގެ ބޮޑުބައި މާލެ ސިޓީން ކުޅެން ޖެހުނީ އެއް ކުޅުންތެރިއެއް މަދުކޮށެވެ. އެއީ ދެވަނަ ހާފު ފެށުނުތަނާ ހުސެއިން ފަޔާޒްއަށް ދެވަނަ ރީނދޫ ކާޑާއެކު ރަތް ކާޑެއް ދެއްކުމުންނެވެ. އެއަށްފަހު ދެން ފެނުނީ އަލިފުށިން މެޗުގެ ކޮންޓްރޯލް ނެގިތަނެވެ. އެއާއެކު މެޗުގެ 57 ވަނަ މިނެޓުގައި އަލިފުށިން ލީޑު ނެގީ އިބްރާހީމް ސަލާމް ޖެހި ލަނޑުންނެވެ. އަދި އޭގެ ދެ މިނެޓު ފަހުން އެ ޓީމުގެ ތިންވަނަ ލަނޑު ޖަހައިދިނީ ފޯވާޑް އަޙްމަދު ހުސާމްއެވެ.
މި މެޗާއެކު މުބާރާތުގެ ކުއާޓާ ފައިނަލުގައި ބައްދަލުކުރާނެ ޓީމުތައް ވަނީ ކަށަވަރުވެފައެވެ. އެގޮތުން ބުދަ ދުވަހުގެ ހަވީރު ކުޅޭ ފުރަތަމަ މެޗުގައި ބައްދަލުކުރާނީ ބ. އޭދަފުއްޓާއި ޅ. ނައިފަރެވެ. އަދި އެރޭ ކުޅޭ ދެވަނަ މެޗުގައި ބައްދަލުކުރާނީ ކ. ގުރައިދޫ އާއި މާލެ ސިޓީއެވެ. ބުރާސްފަތި ދުވަހުގެ ހަވީރު ކުޅޭ ކުއާޓާގެ މެޗުގައި ރ. އަލިފުއްޓާއި ފުވައްމުލަކު ސިޓީ ބައްދަލުކުރާއިރު، އެ ރޭ ކުއާޓާގެ ފަހު މެޗުގައި ބައްދަލުކުރާނީ އައްޑޫ ސިޓީ އާއި ކ. މާފުއްޓެވެ.