އާޓިފިޝަލް ބީޗުގައި ހިންގި ހަމަނުޖެހުމުގައި އިސްކޮށް ހުރި މީހާ ޑީޕޯޓުކޮށްލަނީ

އާޓިފިޝަލް ބީޗުގައި ހަމަނުޖެހުން ހިންގި ބިދޭސީންގެ ތެރެއިން އިސްކޮށް ހުރި މީހާ ޑީޕޯޓުކުރުމުގެ މަސައްކަތް ކުރަމުން އަންނަ ކަމަށް މޯލްޑިވްސް އިމިގްރޭޝަނުން ވިދާޅުވެއްޖެއެވެ.

އިމިގްރޭޝަނުން ވިދާޅުވީ މިމަހުގެ 6 ވަނަ ދުވަހު އާންމު މަސްލަހަތަށް ނުރައްކާވާ ގޮތަށް، އާޓިފިޝަލް ބީޗު ސަރަހައްދުގައި ހިންގި މާރާމާރީގައި އެންމެ އިސްކޮށް އުޅުނު ބިދޭސީ މީހާ ފުލުހުންގެ އެހީތެރިކަމާއެކު އިމިގްރޭޝަންގެ ބެލުމުގެ ދަށަށް ގެނެސްފައިވާކަމަށެވެ. އަދި އެމީހާ ޑީޕޯޓްކުރުމުގެ މަސައްކަތް ކުރަމުންދާކަމަށް އިމިގްރޭޝަނުން ވިދާޅުވެއެވެ.

އަނބުރާ ފޮނުވާލުމުގެ މަސައްކަތް ކުރަމުން އަންނަނީ އަމްރީތު ސިންގް ނަމަކަށް ކިޔާ އުމުރުން 25 އަހަރުގެ ފިރިހެނެއްކަމަށް އިމިގްރޭޝަނުން ވިދާޅުވިއެވެ.

މިމަހުގެ 6 ވަނަ ދުވަހު އިރުއޮއްސުނު ގަޑީގައި އާޓިފިޝަލް ބީޗްގައި ގިނަ އަދަދެއްގެ މީހުން ޖަމާވެފައިވަނިކޮށް، ހަމަނުޖެހުން ހިންގީ އެތަނަށް ގޮސް އުޅުނު އިންޑިއާ ބައެއްގެ މެދުގައެވެ. އެކަކު އަނެކަކަށް ހަމަލާދީ، ޒުވާބުކޮށް ހެދުމުން އެތަނުގެ މަސްލަހަތު ގެއްލުނެވެ.

މިކަމާ ގުޅިގެން އިމިގްރޭޝަނުން ކުރިން ބުނެފައިވަނީ މާރާމާރީ ހިންގާ އާންމު މަސްލަޙަތު ނަގާލުމުގައި ބައިވެރިވި ބިދޭސީންގެ މައްސަލަ ޓާސްކް ފޯސްއިން ބަލަމުންދާކަމަށެވެ. އަދި މިކަމުގައި ޝާމިލުވާ ބިދޭސީންނާމެދު ފިޔަވަޅުއަޅުއްވާނެކަމުގެ ޔަގީންކަން ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު ޝަމްޢާން ވަނީ ދެއްވާފައެވެ.