ގޯލާންގެ އުސްބިންތަކުގައި ވަޒަންވެރިވުމަށް ޔަހޫދީންކުރާ މަސައްކަތް ރާއްޖެއިން ކުށްވެރިކޮށްފި

ސޫރިޔާގެ ގޯލާންގެ އުސްބިންތަކުގައި ޔަހޫދީން ވަޒަންވެރިކުރުވަން އިސްރާޢީލުންކުރަމުންދާ ކަންކަން ދިވެހި ސަރުކާރުން ކުށްވެރިކުރައްވައިފިއެވެ.

ޚާރިޖީ ވުޒާރާއިން ނެރުއްވި ބަޔާނެއްގައި ވިދާޅުވީ ސޫރިޔާގެ ގޯލާންގެ އުސްބިންތަކުގައި އިސްރާޢީލުގެ ޔަހޫދީން ވަޒަންވެރިވުމަށް ކުރަމުންގެންދާ މަސައްކަތްތައް އިތުރަށް ފުޅާކުރުމަށް ޔަހޫދީ ދައުލަތުން ނިންމާފައިވާ ނިންމުން ދިވެހި ސަރުކާރުން ހަރުކަށި އިބާރާތުން ކުށްވެރިކުރާ ކަމަށެވެ. އަދި އެ ނިންމުމަކީ ބައިނަލްއަޤުވާމީ އެންމެހައި ޤާނޫނުތަކާ ކަނޑައެޅިގެން ޚިލާފުކަމެއްކަމަށްވެސް ޚާރިޖީ ވުޒާރާގެ ބަޔާނުގައިވެއެވެ.

ބައިނަލްއަޤްވާމީ ޤާނޫނާ ޚިލާފަށް ސޫރިޔާގެ ގޯލާންގެ އުސްބިންތަކަށް ނުޙައްޤުން ވެރިވެގަތުމަށް އިސްރާޢީލުން ހިންގަމުންގެންދާ ޖަރީމާތައް ހުއްޓުވުމަށާއި، އިސްރާޢީލުން ސޫރިޔާއަށް ދެމުންގެންދާ ޢުދުވާނީ ޙަމަލާތަށް ނިމުމަކަށް ގެނައުމަށް ޚާރިޖީ ވުޒާރާގެ ބަޔާނުގައި ވަނީ ގޮވާލައްވާފައެވެ. އަދި އދ.ގެ ކަމާބެހޭ ޤަރާރުތަކަށް ޙުރުމަތްތެރިކޮށް ހިތުމަށް އިސްރާޢީލަށް މަޖުބޫރުކުރުވުމަށް އަޅަންޖެހޭ އަވަސް ފިޔަވަޅުތައް އެޅުމަށް ބައިނަލްއަޤުވާމީ މުޖުތަމަޢުތަކަށް މި ބަޔާނުގައި ގޮވާލައްވާފައިވެއެވެ.

ޚާރިޖީ ވުޒާރާއިން ވިދާޅުވީ ސޫރިޔާގެ މިނިވަންކަމާއި ސިޔާދަތާއި ސަރަޙައްދީ ސަލާމަތަށް ތާޢީދުކުރުމުގައި ދިވެހިރާއްޖެ ދެމިއޮންނާނެ ކަމަށެވެ. އަދި ސޫރިޔާގައި ސުލްޙައާއި ސަލާމަތް ޤާއިމްކުރުމަށްކުރެވޭ ސަރަޙައްދީ އަދި ބައިނަލްއަޤްވާމީ ހުރިހާ މަސައްކަތަކަށް ރާއްޖެއިން ފުރިހަމަ އެއްބާރުލުން ދޭނެކަމުގެ ޔަޤީންކަން ޚާރިޖީ ވުޒާރާއިން ވަނީ ދެއްވާފައެވެ.

ސޫރިޔާގައި ހިނގަމުންދިޔަ ދާޚިލީ ހަނގުރާމައިގެ ސަބަބުން 11 އަހަރު ވަންދެން އެ ޤައުމުގައި ވެރިކަންކުރި ރައީސް ބައްޝާރް އަލް-އަސަދުގެ ވެރިކަން ނިމުމަކަށް ގެނެސްފައި ވަނީ ޑިސެންބަރު 8ވަނަ ދުވަހުއެވެ. ބައްޝާރުލް އަސަދު ވަނީ ޤައުމުން ފިއްލަވާފައެވެ.

މި ދަނޑިވަޅާ ދިމާކޮށް ސަރަޙައްދީ ރޮނގުގެ ސަލާމަތީ ފިޔަވަޅުތައް ހަރުދަނާ ކުރުމުގެ ނަމުގައި، ޔަހޫދީ ފައުޖުގެ ނިރުބަވެރި ސިފައިންވަނީ ސީރިޔާއާއި ޔަހޫދީ ދައުލަތްގުޅޭ ސަރަޙައްދީ ރޮނގުގެ ބައެއް ސަރަޙައްދުތަކަށް އަރައިގަނެފައެވެ. އަދި، 1973ވަނަ އަހަރުގެ ޢަަރަބި-އިސްރާއީލު ހަނގުރާމައަށްފަހު ދެ ޤައުމުގެ ދެމެދުގައި ޤާއިމު ކޮށްފައި އޮތް ހަތިޔާރު ގެންގުޅުން މަނާ ސަރަޙައްދު، އެ މީހުންގެ ބާރުގެ ދަށަށް ގެންގޮސްފައެވެ.