އެއިޑްސް، ވައިރަލް ހެޕަޓައިޓިސް، އެސްޓީއައިސްއަށް ފަރުވާދިނުމުގެ ގައިޑްލައިން އިފްތިތާޙުކޮށްދެއްވައިފި

އެއިޑްސް އާއި ހެޕަޓައިޓިސް އަދި ޖިންސީ ގުޅުމުން ފެތުރޭ ބަލިތަކަށް ފަރުވާދިނުމާގުޅޭ ގައިޑްލައިން ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު އިފްތިތާޙުކޮށްދެއްވައިފިއެވެ.

މި ގައިޑްލައިން އިފްތިތާޙްކޮށްދެއްވީ ދުނިޔޭގެ އެއިޑްސް ދުވަސް ފާހަގަކުރުމަށް ބޭއްވި ރަސްމިއްޔާތުގައެވެ. ދުނިޔޭގެ އެއިޑްސް ދުވަހުގެ ގޮތުގައި ކޮންމެ އަހަރަކުވެސް ފާހަގަކުރަނީ ޑިސެންބަރުމަހުގެ ފުރަތަމަ ދުވަހެވެ.

އެއިޑްސް ދުވަސް ފާހަގަކުރުމަށް ބޭއްވި ރަސްމިއްޔާތުގައި އެއިޑްސް ބައްޔަށް ފަރުވާދިނުމަގުޅޭ ގައިޑްލައިންގެ އިތުރުން ވައިރަލް ހެޕަޓައިޓިސްއާއި އެސްޓީއައިސްގެ ގައިޑްލައިންތައްވެސް އިފްތިތާޙްކޮށްފައިވެއެވެ.

މި ރަސްމިއްޔާތުގައި އެޗްއައިވީ އެއިޑްސް، ވައިރަލް ހެޕިޓައިޓިސް، އަދި އެސްޓީއައިސްއަށް ފަރުވާކުރުމާއި މި ބަލިތަކުން މުޖުތަމަޢު ރައްކާތެރިކުރުމަށްކުރެވޭ ކަންތައްތަކާގުޅޭ ޕެނަލް ޑިސްކަޝަނެއްވެސް ވަނީ ކުރިއަށް ގެންގޮސްފައެވެ. މި ޕެނަލް ޑިސްކަޝަންގައި، ރާއްޖޭގައި މި ބަލިތައް ފެތުރުމާއި ބަލިތައް ދެނެގަތުމާއި އަވަސް ފަރުވާ ދިނުމާ ގުޅޭ ގޮތުން ވަރަށް ފުޅާ ދާއިރާއެއްގައި މަޝްވަރާކުރައްވާފައިވެއެވެ.

އެޗްއައިވީއަށް ފަރުވާ ދިނުމާ ގުޅޭ ގައިޑްލައިން އަލުން އެކުލަވާލާފައިމިވަނީ 9 އަހަރުގެ މެދުކެނޑުމަކަށްފަހުގައެވެ. އެޗްއައިވީ ވައިރަލް ހެޕަޓައިޓިސް އަދި ސެކްޝުއަލީ ޓްރާންސްމިޓެޑް އިންފެކްޝަންސް ނުވަތަ ޖިންސީ ގުޅުމުން ފެތުރޭ ބަލިތަކާ ގުޅޭ ގައިޑްލައިންތައް އެކުއެކީގައި މުތާލިއާ ކުރެވި، އެކުލަވާލެވި، އަދާހަމަކުރެވި، ތަންފީޒުކުރެވެން ފެށިގެން ދިއުމަކީ މިދާއިރާއިން ރާއްޖެއަށް ލިބިގެންދާ ވަރަށް ބޮޑު ކުރިއެރުމެކެވެ. މި އިފްތިތާހުކުރެވުނު ގައިޑްލައިންތަކަކީ ދުނިޔޭގެ ޞިއްޙަތު ޖަމިއްޔާގެ އެންމެ ފަހުގެ އިރުޝާދާއި ލަފާގެ މައްޗަށް އެކުލަވާލާފައިވާ ގައިޑްލައިންތަކެކެވެ.

ދުނިޔޭގެ ފެންވަރުގައި އެއިޑްސް ދުވަހެއް ފާހަގަކުރުމުގެ ބޭނުމަކީ އެއިޑްސް ބައްޔާމެދު މުޖުތަމަޢު ހޭލުންތެރިކުރުމާއި މި ބަލިން މުޖުތަމަޢު ރައްކާތެރިކުރުމަށްކުރެވޭ މަސައްކަތްތަކުގެ އަގުވަޒަންކޮށް، އިތުރަށް ކުރެވެންހުރި މަސައްކަތްތައްކުރުމަށް ޢަޒުމް ކަނޑައެޅުމެވެ.