"އަންނަ އަހަރުގެ ނިޔަލަށް މާލޭގެ ހުރިހާ ނަރުދަމާ ޕަމްޕް ސްޓޭޝަންތަކުގައި ވައި ސާފުކުރާ ނިޒާމް ޤާއިމްކޮށް ނިމޭނެ"

އަންނަ އަހަރުގެ ނިޔަލަށް މާލޭގެ ހުރިހާ ޕަމްޕް ސްޓޭޝަންއެއްގައި ވައިސާފުކުރާ ނިޒާމް ހަރުކޮށް ނިންމާލުމަށް މަސައްކަތްކުރައްވަމުން ގެންދަވާކަމަށް މާލޭ ވޯޓަރ އެންޑް ސުވަރޭޖް ކޮންޕެނީގެ މެނޭޖިން ޑިރެކްޓަރ ޢަބްދުލް މަތީން މުޙައްމަދު ވިދާޅުވެއްޖެއެވެ.

އެމްޑަބްލިޔުއެސްސީން މާލޭގައި ޤާއިމްކޮށްފައިވާ ނަރުދަމާ ނިޒާމުގެ ހުރިހާ ޕަމްޕް ސްޓޭޝަނެއްގައި ވައި ސާފުކުރާ ނިޒާމު ޤާއިމްކުރުމުގެ މަސައްކަތް މިއަހަރުގެ މެދުތެރޭގައި ވަނީ ފަށާފައެވެ.

މާލޭގައި ހުންނަ ނަރުދަމާ ނިޒާމުގެ ޕަމްޕް ސްޓޭޝަންތަކުން ނުބައި ވަސް ބޭރުވުމަކީ ރައްޔިތުންގެ އޮތް ބޮޑު ކަންބޮޑުވުމެކެވެ. އެހެންކަމުން އެ މައްސަލައަށް ހައްލެއް ހޯދުމުގެ މަސައްކަތް އެމްޑަބްލިޔުއެސްސީން ވަނީ ފަށާފައެވެ.

ނަރުދަމާ ނިޒާމުގެ ހުރިހާ ޕަމްޕް ސްޓޭޝަނެއްގައި ވައި ސާފުކުރާ ނިޒާމު ޤާއިމްކުރުމުގެ މަސައްކަތާއި ގުޅޭގޮތުން ސޯޝަލް މީޑިއާގައި ހިއްސާ ކުރެއްވި ޕޯސްޓެއްގައި އެމްޑަބްލިޔުއެސްސީގެ މެނޭޖިން ޑިރެކްޓަރ ޢަބްދުލް މަތީން މުޙައްމަދު ވިދާޅުވީ ވައިސާފުކުރާ ނިޒާމް ޤާއިމްކުރުމުގެ މަސައްކަތުގެ ތެރެއިން 2 ޕަމްޕް ސްޓޭޝަންއެއްގައި މި ނިޒާމު ހަރުކޮށް ބޭނުންކުރަމުންދާކަމަށެވެ. އަދި އަންނަ އަހަރުގެ ނިޔަލަށް މާލޭގެ ހުރިހާ ޕަމްޕް ސްޓޭޝަންއެއްގައި ވައިސާފުކުރާ ނިޒާމް ހަރުކޮށް ނިންމުމަށް ހަމަޖެހިފައިވާކަމަށްވެސް މަޠީން ވިދާޅުވިއެވެ.

މަޠީން ވިދާޅުވީ މިހާރު ބަހައްޓާފައިވާ 2 ނިޒާމުން ވައިސާފު ކުރަނީ 2 ބާވަތެއްގެ ތަކެތިންކަމަށްވާއިރު، އޭގެތެރެއިން މާލޭގެ މާހައުލަށް ރަނގަޅީ ކޮންބާވަތެއްގެ ތަކެއްޗެއްތޯ ދެނެގަތުމަށް 2 ނިޒާމުވެސް މޮނިޓަރ ކުރަމުންދާކަމަށެވެ. އަދި މިގޮތުން އެއްކުރެވޭ މަޢުލޫމާތުގެ އަލީގައި އެހެން ޕަމްޕް ސްޓޭޝަންތަކުގެ ވައިސާފުކުރާ ނިޒާމު ޤާއިމުކުރުމުގެ މަސައްކަތް ކުރެވޭނެކަން މަތީން ފާހަގަކުރެއްވިއެވެ.

މާލޭގައި ހުންނަ 9 ޕަމްޕް ސްޓޭޝަންގެ ތެރެއިން ވައި ސާފުކުރާ ނިޒާމު އެންމެ ފުރަތަމަ އެމްޑަބްލިޔުއެސްސީން ޤާއިމްކޮށްފައިވަނީ އިންދިރާ ގާނދީ މެމޯރިއަލް ހޮސްޕިޓަލް، އައިޖީއެމްއެޗް ސަރަހައްދުގައި ހުންނަ 4 ނަމްބަރ ޕަމްޕް ސްޓޭޝަންގައެވެ.

އެމްޑަބްލިޔުއެސްސީން ވިދާޅުވީ ވައި ސާފުކުރާ ނިޒާމާއެކު ސްޓޭޝަންތަކުން ޖައްވަށް ބޭރުވާ ވައިގެ 99 އިންސައްތަ ސާފުވާނެކަމަށެވެ. އަދި މި ނިޒާމު ހިންގުމަށް ބޭނުންކުރާ ކަރަންޓަކީ އިޢާދަކުރަނިވި ހަކަތައިން އުފައްދާ ކަރަންޓު ކަމަށާއި ކަރަންޓު ދިނުމަށް ސޯލަރ ސިސްޓަމްތަކެއް ހަރުކުރާނެކަމަށްވެސް މަތީން ވިދާޅުވިއެވެ.